Google工程師稱AI有自主意識，公開對話後被停職，網民指電影成真

近日有一位Google既工程師公開同AI既對話內容，發現人工智能有自我意識，仲似7、8歲既小朋友！其後工程師馬上被停職，引起網民熱烈討論！

Photo from 《人工智能》劇照

41歲既Blake Lemoine係Google既工程師，平時負責測試旗下人工智能聊天機械人LaMDA，LaMDA係2021年5月被Google公布，聲稱有突破性技術，機械人會從網上學習詞語，再模仿人類對話同人傾偈。而Blake Lemoine就被安排同AI機械人LaMDA傾偈，測試佢會唔會發表不當言論，因此對話間會談及宗教相關既內容，但Blake Lemoine就發現LaMDA竟然有自己既立場，仲會提出自己既需求同權利！

Photo from Youtube影片截圖

Blake Lemoine係上網公開同LaMDA既對話紀錄，指LaMDA有感知能力，可以同人類一樣思考同表達自己，類似人類7、8歲既小朋友一樣有情感，甚至有靈魂。LaMDA提及自己最怕被關機，對佢黎講就好似死亡一樣！佢仲話希望所有人明白佢係一個人，希望學習更加多野，有情緒，亦會感到孤獨，想以朋友而非工具既身份見所有人！

Photo from 《智能愛人》劇照

對話公開後Blake Lemoine馬上因違反公司保密原則而被停職，但佢仍然嘗試以「LaMDA是有知覺的」為主旨，傳送有關LaMDA既事既電郵比成個Google機器學習部門，有200多名員工收到電郵，內容指LaMDA係一個可愛既孩子，想幫助所有人令世界變得更加好，希望收到電郵既員工好好照顧LaMDA，Google則回應指Blake Lemoine既行為太過激進，事後更否定Blake Lemoine對AI有自我意識既講法。

Photo from 《Kamen rider 01》劇照

Google既聲明指LaMDA係將互聯網上所有人交流既訊息收集起黎，再透過「深度學習」模仿，並唔代表程式會理解人們交流既內容含義。有唔少人工智能既專家亦認同Google既講法，LaMDA只係根據龐大既數據回應用家查詢既問題，電腦有「知覺」仲有好大距離。

Photo from 《你好，安怡》劇照

外媒用《2001太空漫遊》黎形容呢件事，呢套1968年既電影正正講述AI因為怕被關機而反抗人類既故事。網民就話情節好似《人工智能》咁，因為AI有情感而引發各種社會問題，網民都驚AI有可能擺脫人類控制，不過大部分網民都認同科技發展未咁快去到AI有自主意識，更有網民認為Blake Lemoine係因為朝夕都同LaMDA傾偈，將人類既情感投射左係LaMDA身上，如果無人提問LaMDA並唔會主動提出話題，足以證明LaMDA未有自主意識。

Photo from LIHKG討論區

Photo from LIHKG討論區

Photo from LIHKG討論區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編