伍允龍再度提及與鍾嘉欣昔日情！自爆交往期間甚少外出！工作壓力大導致感情生變？
Photo from 伍允龍IG
鍾嘉欣與伍允龍曾交往8年！
鍾嘉欣喺2004年參加選美比賽奪冠而正式入行，隨後開始拍攝電視劇，人氣急升，成為當年嘅當家花旦。而佢喺2007年因拍攝電影《十分愛》與伍允龍傳出緋聞，仲邀請男方做MV男主角；直到2013年男方去睇女方演唱會、參加生日派對等令地下情逐漸浮面，可惜喺2015年就傳出分手消息，有指二人對未來目標並唔一致，結束8年嘅戀情！
Photo from 鍾嘉欣IG
伍允龍受訪時再度提及昔日情
日前，伍允龍接受節目《星光路上》訪問再次提及過往同鍾嘉欣嘅一段情，指當時對於戀情曝光感到驚訝「嘩！同人拍拖都會上報紙咁搞笑嘅！」；佢表示當時大家都正值事業上升期，工作上嘅壓力難免對二人嘅感情有影響「對方要保護自己嘅事業，咁自己都明白，但我又冇嘢可以做，所以有啲無奈嘅。」
Photo from 《星光路上》
Photo from 《星光路上》
自爆二人交往期間甚少外出
伍允龍更透露當年同鍾嘉欣好少出街拍拖，一方面為咗避免被大眾撞見，另一方面佢自己都唔鍾意出街「我係宅男啲嘅，我唔鍾意周圍去，寧願喺屋企睇電視、打機。」現時單身嘅佢表示渴望能夠搵到一個適合自己嘅伴侶，並且唔會因此而避免同圈內人拍拖，認為投契係最緊要！
Photo from 《星光路上》
過往因與女方事業發展差距大而失望
其實今年初伍允龍就首度開腔於大談昔日戀情，指當時因為與鍾嘉欣嘅事業發展有落差「嗰時佢好紅，我係nobody（無名小卒），我明嘅。」搞到壓力好大，經常被外界稱「XXX男友」、「茄喱啡」等。
Photo from 《諸朋好友》
Photo from 《諸朋好友》
坦承當年並不甘心！
同時，伍允龍表示明白女方因為事業需要低調處理感情事，明白對方壓力都好大。而佢坦承入行拍劇嘅其中一個原因係為咗向大眾證明自己嘅實力「係！嗰時我有啲唔忿氣。」希望能夠令觀眾刮目相看！
Photo from 《諸朋好友》
Photo from 《諸朋好友》
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
44歲伍允龍首談與鍾嘉欣8年地下情！不滿被逼低調，直言：唔忿氣
21 Mar , 2022
Photo from 鍾嘉欣 IG
伍允龍出演TVB節目《諸朋好友》罕談感情事
鍾嘉欣以19歲之齡參選《2004年度國際華裔小姐競選》奪得冠軍後入行，佢簽約後即獲TVB力捧，成為當年嘅當家花旦。一直以嚟佢嘅感情生活都受到外界關注，其中同伍允龍嘅一段情更長達8年，可惜最終分手收場。
Photo from 鍾嘉欣 IG
近日伍允龍與好友安志杰出演TVB節目《諸朋好友》做嘉賓，首次談及當年嘅感情史。主持人崔建邦同麥美恩提到佢哋曾被人冠上「XX男友」嘅稱呼，令伍允龍不吐不快。
Photo from TVB
被稱「奀星」坦言有唔開心
佢指自己當時嘅經歷十分辛苦，出道以嚟一直被傳媒稱為「茄喱啡」，麥美恩指：「你直程畀人叫『奀星』！」伍允龍表示：「『奀星』已經算好，有個『星』字！」佢稱自己當時其實已經拍過好多戲，連男主角都做埋，但都被人叫做「茄喱啡」。
Photo from TVB
Photo from TVB
Photo from TVB
伍允龍表示：「拍《賭城風雲》一個被車撞鏡頭，我撞咗成25次；又試過從一樓跳落嚟，腳差啲斷，但呢啲經歷都無人知。」佢指自己唔係埋怨，但唔明點解外界會將個焦點放喺男女地位嘅差距上，佢坦言睇得多呢啲報道都有唔開心。
Photo from TVB
Photo from TVB
與女友事業發展差距大，承認不滿被逼地下情感受傷
崔建邦即問既然有咁多負面新聞點解仲會繼續段感情，伍允龍稱佢哋拍拖係開心嘅，指女方因為工作關係要「收埋」佢少少佢係理解。麥美恩追問：「你覺得電視台畀咗壓力你哋？」伍允龍指：「總之我相信佢（女友）會有啲壓力。」
Photo from TVB
Photo from TVB
Photo from TVB
佢又重申佢好明白女友要將感情事低調處理：「嗰時佢好紅，我係nobody（無名小卒），我明嘅。」但伍允龍坦言覺得呢件事做得太過分令佢有受到傷害，坦承：「我會有啲不滿同埋唔開心。」
Photo from TVB
Photo from TVB
Photo from TVB
決心拍TVB劇集證明自己：有唔忿氣
崔建邦問佢係咪因為咁而決心一定要入TVB拍劇，伍允龍直認：「係！嗰時我有啲唔忿氣。」表示希望證明畀人睇佢係做得到。雖然佢未有提及女友名字，但憑藉TVB、名氣比佢大嘅女藝人等「蛛絲馬跡」，即時令人估到佢係講緊同鍾嘉欣嘅一段情。
Photo from TVB
Photo from TVB
Photo from TVB
伍允龍與鍾嘉欣低調相戀8年
2007年佢同鍾嘉欣合作拍攝電影《十分愛》結緣，當年鍾嘉欣已憑電視劇《人生馬戲團》、《法證先鋒》等入屋，而伍允龍知名度同女方的確有差距，雖然兩人一直未有承認戀情，但關係已經係「公開嘅秘密」。
鍾嘉欣同伍允龍嘅呢段情常被指「女強男弱」，伍允龍始終未有走紅，但鍾嘉欣毫不介意，仍然對佢不離不棄。兩人雖低調處理感情，但呢段地下情仍維持8年之久！有指佢哋分手係因為大家對未來嘅目標唔一致。
Photo from 鍾嘉欣 IG
分手後，伍允龍拍攝TVB劇集《城寨英雄》知名度上升，事業終於有起色，而鍾嘉欣則與脊醫Jeremy結婚，並移居加拿大生活。今次伍允龍罕有提及往事，睇嚟佢曾一度對呢段關係耿耿於懷。
Photo from TVB
Photo from 鍾嘉欣 IG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
