范冰冰「辟穀」減肥法7日唔食嘢，曾自嘲「范小胖」，為復出極速甩6公斤！

By Moon Lam on 29 Jun 2022

Digital Content Writer

減肥一直被稱為女人嘅終身事業，女明星更加個個都有自己一套方法。范冰冰近日就拍片分享「辟穀」減肥法，7日期間唔食嘢，只飲檸檬百香果水同紅棗水，仲瘦咗6公斤！

Photo from 范冰冰微博

「辟穀」（又稱辟谷）源於先秦，最早係道家記載，係古人延年益壽嘅養生法。字面意思解不食五穀，所以一般代表咩都唔食，只飲水，所以又稱「服氣」。到現代演變成美顏減肥法，減少飲食或者只食某啲特定食物黎比身體臟器得到休息，從而美容瘦身，不過呢種方法並唔適合所有人。

Photo from 范冰冰抖音

范冰冰係第一日嘅影片分享，自己只係朝早飲咗一杯蘋果醋，同埋加咗檸檬、百香果嘅水，到拍片已經飲緊第4大支，同埋行咗大概5、6公里路。佢指呢個方法因為無糖分同脂肪攝入，所以皮膚會變得好咗，佢表示：「你的皮膚看起來非常乾淨、毛孔非常細緻，從裡到外透著光潔、很白的感覺。」

Photo from 范冰冰抖音

到第三日范冰冰再拍片更新情況，佢表示呢兩日一樣都係飲自製嘅檸檬百香果營養水，加上快步、熱瑜伽等運動，但就因為消化太大，都有飲蛋白粉加水補充體力，佢表示已經減咗約3.6公斤，瘦得好快都幾滿意。佢亦提到第二日無打卡，因為覺得「一切都很好」，而且無飢餓感﹐可能係因為消緊水腫，所以好明顯會見到水腫同肉慢慢消沉，睇臉型就最明顯見到效果。

Photo from 范冰冰抖音

佢補充話覺得自己仲好清醒可以做野，透露自己第一次「辟穀」瘦6公斤，最長試過「辟穀」10日。但佢亦表示觀眾未必要學佢咁激進，因為做女明星所以特別有毅力，係重大嘅活動前先需要用呢種方法維持身形，想用「斷食」減肥嘅人可以試下一日先，如果過咗一日覺得可以接受先試下第二日，如果第一日完咗已經好餓就可以慢慢食返少少野。

Photo from 范冰冰抖音

第五日，范冰冰就表示係第四日轉咗飲石斛紅棗水，感覺可以更加補充體力同「補氣」，佢話「感覺身體非常輕盈」，又指工作期間都神清氣爽﹐精神亦都唔錯，又提及減肥非常因人而異，呢個方法係好耐前就循序漸進咁用，一開始都係斷食一兩日，到依家先「辟穀」咁耐。佢又透露因為最近覺得自己水腫，身體有負擔，所以先「辟穀」。

Photo from 范冰冰抖音

到第七日佢再次分享自己已經瘦咗6公斤，不過就話行太多後面有啲心悸，但佢對呢個成果表示好滿意，並且話黎緊會開始食返野，因為「辟穀」咗好耐食返野會有唔適應嘅情況，所以要由流質食物慢慢開始食。

Photo from 范冰冰抖音

雖然范冰冰每次都強調自己係為工作而減肥，呢個方法係根據自己體質同能力制定，又勸網友唔好刻意模仿，要量力而為，但都仍然有唔少批評。有網民話范冰冰係第五日已經睇落有氣無力，到第七日明顯比第一日講野細聲無力，並指呢種減肥方法唔健康，體重容易反彈同甩頭髮。有人就見到唔少人跟風打卡，驚呢種極端減肥方法會帶起壞風氣，呼籲大家循序漸進咁用運動減肥。不過亦有唔少人讚范冰冰真係非常有毅力，令人佩服。