《開心無敵獎門人》正式回歸！3位新「獎老」加入！曾志偉解釋重啟節目原因：想拍俾年輕人睇！

By Stephanie on 05 Jul 2022

Digital Content Writer

大台經典遊戲節目《獎門人》系列深入民心，陪伴咗唔少港人成長～日前，電視台總經理（節目內容營運）嘅曾志偉宣佈將會重啟《獎門人》節目，引起網民熱議。7月3日，《開心無敵獎門人》就開始首集錄影，仲加入咗3位新「獎老」！

Photo from 娛樂新聞台

《獎門人》1995年開始播放

《獎門人》自1995年開始播放，推出過十輯遊戲節目，並由「獎門人」曾志偉以及「獎老」們主持，邀請嘉賓一齊玩遊戲贏獎品。第一輯嘅「獎老」只得林曉峰、陳小春（其後因工作檔期換上錢嘉樂），呢兩位都可以稱得上係元老級主持；其後亦有王祖藍、阮兆祥、金剛等加入成為「獎老」，主持班底越來越多人！

Photo from 《超級無敵獎門人》

曾志偉宣佈《獎門人》回歸！

早前，電視台總經理曾志偉喺55週年台慶宣佈《獎門人》回歸，揚言要為觀眾帶來歡樂！據悉，今輯一共推出63集，第一集暫定於7月31日推出，橫跨台慶前後，播足3個幾月，希望勾起香港人嘅童年回憶～

Photo from 娛樂新聞台

2位經典「獎老」超感慨：回憶返晒嚟！

3日，《開心無敵獎門人》舉行首次錄影，「獎門人」曾志偉帶同2位舊拍檔錢嘉樂、阮兆祥接受訪問，二人就非常「識做」咁話再度主持節目獲益良多，錢嘉樂表示「我好多嘢都係獎門人度攞返嚟㗎！我成個屋企都係佢度攞㗎！」；而阮兆祥就話玩返過往嘅經典遊戲，令佢回憶不停湧現有啲感動。

Photo from 娛樂新聞台

加入3位新主持人！

今輯《獎門人》將會有3位新「獎老」加入，包括有麥美恩、吳嘉儀及程浩駿。3位新主持都難掩興奮之情，麥美恩表示獲邀成為主持感到十分榮幸；而吳嘉儀就話「一聽到以為係拍緊整蠱節目。」而當日拍攝獲邀嘅嘉賓就有周嘉洛、陳瀅、連詩雅、張頴康及王灝兒（JW）等。

Photo from 娛樂新聞台

解釋重啟節目原因

而闊別主持「獎門人」長達10年嘅曾志偉都坦承有啲緊張，並介紹今次節目嘅亮點「我哋從當年175個遊戲揀大家最鍾意嘅出嚟重溫，暫時揀咗30幾個」，仲表示希望強調今次再次開播節目嘅原因，「成日俾途人問幾時開拍（獎門人），覺得係時候同大家重溫獎門人，最緊要係好多遊戲宜家嘅小朋友或者年輕人未睇過啦，俾佢哋開心下！」

Photo from 娛樂新聞台

大約430位現場觀眾到場支持

曾志偉曾提及希望邀請到過往主持過嘅「獎老」出演節目，而佢就表示「陳小春、王祖藍同林曉峰搵夠就會返嚟，金剛就掛住溝女」，似乎尚未邀請到佢哋。而佢仲表示今季嘅獎品非常豐富「已經有價值1千萬獎品，我哋多多益善、少少無拘！」，而首集拍攝就招待咗大約430位現場觀眾，場面十分熱鬧～

Photo from 《超級無敵獎門人》

Photo from 娛樂新聞台

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

曾志偉宣布重啟經典《獎門人》，稱有信心挽救收視，網民反應一面倒！

27 May , 2022

《獎門人》系列嘅遊戲節目相信係唔少香港人嘅經典回憶，到依家都仲記得獎門人句「打和啦SUPER！」，而曾志偉係擢升為電視台總經理後就透露會重啟《獎門人》系列！不過網民意見似乎唔多睇好！

Photo from Youtube 截圖

#重啟經典《獎門人》系列救收視

《獎門人》由1995年開始播出，陸續出過十輯獎門人系列遊戲節目，到2014年完結。第一代《獎門人》由「獎門人」曾志偉、「獎老」林曉峰同陳小春主持，後期曾志偉亦同過其他「獎老」組合，90後最熟悉嘅「獎老」唔少得林曉峰、錢嘉樂、王祖藍同阮兆祥，觀眾真係每個星期都會期待有咩笑料同新遊戲。

Photo from Youtube 截圖

2014年曾志偉曾放言話《超級無敵獎門人終極篇》將會係名副其實最後一輯獎門人，而之後都唔會再做「獎門人」。但電視台正值「收視冰河期」，雖然係節目中否認「出口救收視」，但佢係電視台《周年慶典節目巡禮2022》宣布再推出《獎門人》系列，改名《獎門人開心萬歲》，除此之外仲重啟《殘酷一叮》等經典節目，為咗55周年台慶出盡殺手鐧。

Photo from Youtube 截圖

#重量級嘉賓獎金獎品

曾志偉表示今次《獎門人》將會一共推出63集，由7月做到11月台慶，又提及希望可以邀請一眾元老級「獎老」回歸，亦希望有新人加入，不過就表示曾問過陳小春及金剛兩位長老，可惜未有時間回歸拍攝。

Photo from Youtube 截圖

佢透露想再邀請好友劉德華、張學友等人再上節目，改玩相對輕巧嘅遊戲，希望可以節目可以超越前作，無論獎金、獎品定遊戲方面都可以比過去更加豐富。《獎門人》係咁多年黎總共玩過175個遊戲，要研究重現咩遊戲，亦要構思新遊戲，以前《獎門人》都被批評指抄台灣、日本、韓國嘅節目，睇黎研究遊戲都需要一段時間呀。

Photo from Youtube 截圖

當年蘭茜係《獎門人》中刨西瓜神技令唔少觀眾印象深刻，仲封佢為「地表食西瓜最快嘅女人」！有傳佢依家係電視台任文職工作，曾志偉就爆料話可能蘭茜自己都想「出山」再拍遊戲節目！

Photo from Youtube 截圖

#商標問題已解決

有網民發現ViuTV係2018年註冊咗「獎門人」商標，但曾志偉近日就表示電視台已經買回「獎門人」呢個商標。仲笑言當年ViuTV可能打算請自己過去做主持，但最後放棄咗，所以現時已無條件主動放棄商標。而2018年曾志偉傳同電視台其他管理層不和，同年7月世界盃仲現身ViuTV講波，所以當年傳ViuTV想邀請獎門人過檔可能真係有幾分可信性。

Photo from 討論區截圖

#對重拾收視有信心

曾志偉係訪問中話只要出品係好，自然會有觀眾，收視自然會返黎。對佢黎講最重要係將節目做好，當然希望大家會支持，表示有信心收視會慢慢好返。

Photo from Youtube 截圖

#網民反應唔受落

有網民就係討論區開post講重推《獎門人》計劃，唔少網民都唔太睇好，留言話「老土當時興」、「老人家遊戲節目」、「又食老本」，仲話呢個節目先係「流行經典五萬年」。網民亦翻出曾志偉曾經暗示ViuTV嘅表示意識不良，亦後悔做《獎門人》時會教壞細路，但當年《獎門人》已經比人話係低智粗俗，涉及不雅嘅畫面仲多，要重啟絕對唔會睇！

Photo from 討論區截圖

而上一輯《獎門人》已經係八年前，呢八年間全世界嘅價值觀都產生巨大變化，如果按照以前嘅遊戲玩法，實會收到大量投訴話浪費食物、意識不良等等。有網民更加認真分析，最大問題係電視台請唔返以前嘅嘉賓、嘉賓又唔會好似以前咁玩得放、依家嘅新人又未必好似以前嘅嘉賓咁多人睇。驟眼睇網民反應幾乎一面倒咁嫌棄，睇黎靠獎門人挽回收視都有難度。