老公好想移民英國但遭港媽拒絕，列出5大原因！唔想放棄專業工作

By Jennifer on 05 Jul 2022

Digital Editor

今晚食乜餸：小二，嚟一碟花生！

近年掀起移民潮，英國係其中一個深受港人歡迎嘅地方。日前有網友喺Facebook專頁發文指老公好想移民，佢表示自己亦明白移民嘅人心態，但佢稱自己亦有唔少顧慮，坦言：「係咪有考牌嘅父母就一定揀移民？」

Photo from 《北京遇上西雅圖之不二情書》劇照

老公勁想移民英國，港媽有顧慮

英國係好多香港人選擇移民嘅地方，有港媽就喺Facebook專頁「生仔要考牌系列」發文，佢指老公經常同佢講身邊有唔少朋友都移咗民，日日都好開心，自己一家四口都仲留喺香港。港媽表示自己好理解移民港人都係為咗呼吸自由空氣、畀子女喺更好嘅環境讀書成長等，但佢認為都有好多因素影響佢唔想移民。

Photo from 《82年生的金智英》劇照

1. 唔想放棄現時嘅專業工作

佢稱自己係在職媽媽，佢嘅工作稱得上為專業，要經過讀書、實習、考牌先可以做，佢對自己現時嘅工作十分滿意，放工後唔使再跟手尾而且又容易攞假照顧小朋友，但若果移民英國，一切就要從頭開始，可能要重新讀書、實習、考牌，而且亦未必可以有依家嘅工時同工資，好大機會要輪班工作。

Photo from 《解禁男女》劇照

Photo from 《我們與惡的距離》劇照

港媽表示自己好珍惜依家呢份工，自問無勇氣由零開始：「坦白講自己冇咁瀟灑。十年寒窗終於有少少成就，突然間由零開始，又要重新為事業打拼，我呢刻仲未可以跨過心理關口」

Photo from 《太陽的後裔》劇照

2. 難以適應英國生活

港媽自稱由細到大適應力都唔係太好，升小學、升學、升大學都需要社工、老師或親友輔導，佢擔心移民去外地面對新生活，自己要更長時間平復心情。港媽認為住屋、環境、教育方面英國都比香港出色，但自己怕凍又唔識煮飯、揸車，去到英國將面對唔少困難，佢指香港嘅天氣、衣食、交通更優勝，擔心自己離開香港會感到後悔。

Photo from 《那年冬天，風在吹》劇照

3. 老公無法幫手分擔日常生活瑣事

港媽稱自己適應力弱，需要旁人輔導，但移民後身邊只有老公，對方卻並非可以依靠嘅人選。佢表示平日老公放工回家都掛住玩手機，自己嗌交永遠輸畀老公。港媽稱丈夫從來唔會讓步：「講到一定係佢啱我錯為止」，此外有咩事情要老公幫忙，仲要三催四請，對方唔記得做更會賴返轉頭：「話我冇提佢做。」港媽指老公畀唔到信心佢，令佢擔心去到外地所有嘢都要自己一腳踢。

Photo from 《愛的迫降》劇照

Photo from 《紀念日》劇照

Photo from 《暖男爸爸》劇照

4. 想子女學返廣東話同繁體字

港媽稱廣東話係母語，希望子女對廣東語、繁體字熟悉，識聽識講又識寫，但去到英國就無動力學廣東話同繁體字，又無得學以致用十分可惜。佢表示兩個小朋友年齡尚小，只係讀緊幼稚園：「想等佢哋對自己語言同文化有基本認識先，再送佢哋去外國擴闊眼界，難道有錯？」

Photo from 《當你沉睡時》劇照

5. 離開香港就無法留喺父母身邊盡孝

港媽稱老公指為咗下一代應該要走，但港媽就有唔同意見：「下一代固然重要，但上一代係咪就唔使理？」佢表示老人家好錫兩個孫，亦講明唔會移民，自己平時湊小朋友已好少見父母，如果移民帶埋啲孫走，覺得自己好不孝，亦都唔捨得：「難道要咁狠心丟低上一代置之不顧？」

Photo from 《陪你一起長大》劇照

Photo from 《父母愛情》劇照

網民反應兩極

港媽最後反問「移民一定係最好選擇？」、「係咪要為咗細路放棄自己嘅理想同上一代？」、「唔舉家移民係咪等於推小朋友落火坑？」帖文引起網民兩極評論，有網友認為移民係個人選擇唔係個個都必須做，最緊要搵啱自己條路，亦有網民指樓主樣樣諗自己，其實只係唔捨得高薪厚職好自私。有人提出意見稱既然樓主老公想走，佢又唔想離開香港，就由老公帶兩個小朋友移民，佢自己留喺香港，或者送小朋友去外國讀書。