台女為「裙腳仔」男友煮飯致分手，4大細節令人心淡，網民斥唔識珍惜好女仔！

By Moon Lam on 19 Jul 2022

Digital Content Writer

唔理係生日定週年紀念，煮下飯仔一向都係唔少情侶嘅情趣，不過就有人因為咁而分手！台灣有女網友發文，指想為男朋友嘅生日煮愛心晚餐，但就因4件事而睇清男友嘅性格，令女網友直指對方係「媽寶」！

Photo from 《逃避可恥卻很有用》劇照

台灣一位女網友係Dcard發文，表示自己同前男友係交友程式識，拍拖大約2個月，日前前男友生日，就上網買咗兩人份嘅海鮮組合，雖然知自己廚藝差，但因為海鮮一早處理好，網上提供嘅料理方法又好簡單，於是決心要煮一餐「豪華海鮮愛妻大餐」！不過期間就發生咗4件事，搞到樓主果斷同前男友分手，隔日直接唔再聯絡！

Photo from Dcard 圖片

1. 要媽咪載到指定地點

女網友話個日一開始前男友嘅態度已經令佢不爽，約好6點半咗右但前男友5點已經到咗，但個陣樓主煮緊野根本行唔開，前男友又不斷催樓主落樓，先發現原來前男友每次出街都係媽咪車佢到指定地點！後來樓主匆忙落樓接前男友，但因為廚房仲焗緊帶子，同前男友媽咪打聲招呼就走，結果前男友一上樓就好嬲咁話：「你對我媽很不尊重沒禮貌」，令樓主一頭問號。

Photo from 《BB來了》劇照

2. 全程無幫手連句多謝都無

之後樓主終於上齊全部餸，但前男友從來無主動清理枱面或者拎餐具，食咗幾啖仲問樓主要唔要下次去佢屋企跟佢媽咪學煮飯，成餐飯仲連一句多謝都無。

Photo from 《媽寶兄弟》劇照

3. 嫌魚有刺要人挑走

樓主稱自己跟食譜整一道泰式檸檬鱈魚，但因為唔記得買辣椒，於是用花椒取代，諗住味道應該都唔會太差，不過煮完出黎啲汁就變咗黑色。然後前男友又一直嫌點解魚會有刺，仲同魚身一樣係白色好易誤食，試圖叫樓主幫佢挑，仲話醬汁睇落好核突，令樓主不滿問：「阿鱈魚不是就是這樣嗎？？」，樓主承認賣相真係麻麻，但因為材料本身唔錯，煮出黎都算好食。

Photo from Dcard 圖片

4. 要樓主幫佢剝蝦

食到後面見前男友無起筷食蝦嘅意思，樓主就自己默默剝蝦，結果前男友竟然話：「順便幫我剝一下」，令樓主覺得係「壓垮駱駝最後一根稻草」，決意同佢分手。樓主表示自己並唔係一定要男方剝蝦殼，有時仲會剝哂埋全家人食，但就話前男友呢種唔識睇臉色，「整天媽媽叫的傢伙真的可以滾了」。而前男友發現樓主買餸使得唔算多錢，仲好嬲咁話樓主小氣，令樓主不禁問：「吃錢長大的嗎？」