吳彥祖成功放售美國近4千呎豪宅為愛女搬到洛杉磯網民大讚有品味

By Moon Lam on 20 Jul 2022

Digital Content Writer

現年47歲嘅吳彥祖（Daniel）係美國出世同長大，但就係香港發展，憑出色外形成為模特兒同演員，仲憑實力取得一線男星位置。不過近年Daniel同太太Lisa S.同囡囡就搬返美國，早前有消息話Daniel仲因囡囡教育問題計劃搬屋，更有傳佢嘅豪宅已經成功放售！

Photo from 吳彥祖IG ＠thatdanielwu

為愛女學業搬家

一向被稱為完美好爸爸嘅吳彥祖近日帶愛女吳斐然（Raven）行紐約紅毯，仲有傳佢因為囡囡教育問題決定由灣區搬到洛杉磯居住，網傳佢位於奧克蘭嘅豪宅一掛牌已經吸引唔少買家，仲以全現金形式完成交易！

Photo from BridgeMLS

近4000呎豪宅曝光

網傳圖片可以見到，Daniel原本居住嘅複式豪它位於加州奧克蘭Upper Rockridge社區，係當地豪宅區，環境恬靜，吳彥祖係建築系畢業，相信大屋設計亦係出自佢之手，屋內設計富有簡約現代感，處處透露屋主品味，面積有成3,948平方呎，一共有5間房，從窗外望出去景色相當宜人。

Photo from BridgeMLS

客廳擺放咗兩張米白色梳化，連接飯廳同花園，飯廳設有一張長餐枱，採用開放式廚房設計，而戶外花園就有一大片草地、泳池、燒烤爐等，臥室位於大屋上層，每間房都有不同設計，主人房就有衣帽間、超大浴室及休息區，亦可以透過房入面嘅露台欣賞花園景色，仲有健身室可以隨時隨地做Gym。

Photo from BridgeMLS

仲有其他房間，每間都有不同設計，可見屋主別具心思。

Photo from BridgeMLS

網民大讚有品味

據知Daniel喺2020年以390萬美元（約3,062萬港元）買入呢間大屋，而最近就以429.5萬美元（約3,372萬港元）售出，網民大讚Daniel有品味，更有唔少人笑言如果係吳彥祖粉絲購入呢間豪宅，唔止可以拎到男神簽名，仲可以享受「男神泡過的泳池啊」、「彥祖睡過的床」！

Photo from BridgeMLS

Text: HolidaySmart Editorial （小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）