2022年9件港人集體回憶消失！大熊貓安安離世、珍寶海鮮舫沉沒

Digital Editor

今晚食乜餸：小二，嚟一碟花生！

唔經唔覺2022年已過咗一半，呢半年都發生咗唔少事，好多港人回憶都消失、逝去，令網友大嘆「往事只能回味」，好多港產片出現嘅背景地點都不復存在，重溫一下2022年港人逝去嘅9樣集體回憶！

Photo from 《食神》

資深藝人曾江逝世

資深藝人曾江於4月27日被發現於尖沙咀檢疫酒店昏迷不醒，送院後證實不治，享年87歲。佢於2015年憑電影《竊聽風雲3》獲得「最佳男配角」。曾江最為人熟悉嘅係80年代拍攝嘅染髮廣告，台詞「立即變黑晒亦得，得咗！」深入民心。

5月5日起，1081、1083及1088電話查詢服務暫停。如須查詢政府部門聯絡資料，可致電1823。

Photo from HolidaySmart

港鐵中期翻新列車（俗稱「烏蠅頭」）服務港人40年，於5月6日正式退役，最後一班載客列車下午1時喺紅磡站1號月台開出，往沙田站，並短暫停留於沙田站1號月台，吸引大批鐵路迷到場影相留念。

Photo from MTR

5月13日係過海隧道巴士301線最後一日營運，301線服務紅隧30載，受市民歡迎。新巴城巴於當日為301線舉行告別儀式，大批巴士迷乘搭尾班車。

Photo from 新巴城巴

零食連鎖店店「優之良品」於6月6日傳出結業消息，多間分店拉閘關門，分店電話亦無人接聽。發言人指因為通關無期，優之良品近年轉型主攻內地市場。

Photo from HolidaySmart

因疫情而停業2年嘅珍寶海鮮舫於6月14日移離香港，唔少經兼港產片如《食神》都取景自呢度，離開香港當日亦有好多市民大表不捨。之後其母公司更宣佈珍寶海鮮舫喺移離期間於6月19日因為遇上風浪而喺南海入水翻轉，聲明稱打撈困難，令唔少網友大感可惜：「連回憶都冇埋！」

Photo from 東張西望

7月3日作家沈西城於個人Facebook透露倪匡離世：「倪大哥今午走了！」享年87歲。倪匡嘅著作科幻小說《衛斯理》系列曾獲多次拍成影視作品，佢一生創作咗超過300部小説，獲稱為「香港四大才子」之一。

位於油麻地美都餐室係電影、電視劇取景熱門地，7月20日有網民影到美都餐室張貼於門外嘅告別啟示：「係咁先啦，下次再見，拜拜！有緣，我哋一定會再見......」美都餐室開業至今72年，結業消息傳出後有唔少網民表示可惜。

Photo from Facebook群組「佐敦•油麻地人和事」

海洋公園於七月時曾透露安安嘅健康狀況慢慢轉差，呼籲市民為佢集氣。到7月21日海洋公園宣佈因為安安已無法進食固體食物，決定畀佢安祥離世。安安享年35歲，等同於人類105歲高齡，亦係人類照顧下全球最長壽嘅雄性大熊貓。安安於1999年來港，陪伴港人超過20年，佢嘅離去令唔少香港人大感哀傷。

Photo from 海洋公園

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel