向太疑暗指新抱郭碧婷「黑化後很討厭」，不足一日淆底刪文

娛樂新聞

By Jennifer on 25 Jul 2022

Digital Editor

今晚食乜餸：小二，嚟一碟花生！

向佐近日被爆疑似偷食，媽媽向太即時為兒子反駁傳媒，不過不獲網民相信。密會照曝光後向太喺微博發長文，疑暗示新抱郭碧婷報復心好重，不過呢篇文發佈不足一日就被向太刪除，而當事人向佐郭碧婷夫婦至今仍未回應事件。

Photo from 向佐微博

向佐與老婆郭碧婷分居兩地

一向有如「向家代言人」嘅向太陳嵐以往最愛出面代老公、兒子、新抱發言回應網民質疑，最近有內地狗仔公開咗向佐疑帶同美女一齊返回北京婚房嘅影片，引發向佐偷食疑雲。

Photo from 向佐微博

目前向佐老婆郭碧婷正懷上第二胎，並留喺台灣安胎。公佈二胎消息時向佐曾發微博表示辦理緊前往台灣嘅相關手續，仲話因為疫情無奈只能同太太分居兩地，並強調：「我們也不想」

Photo from 《京城十二時辰》

向佐疑與美女約會，爆偷食傳聞

點知內地狗仔「江小宴」卻爆出「向佐約會美女，同回男方婚房超親密」，事後向太回應指：「亂講！這是他一個大姐姐。」表示兒子向佐當日係同大姐姐洽談工作，但內地狗仔就寸爆表示仲有第二彈、第三彈、第四彈嘅爆料，網民亦唔太相信向太「大姐姐」嘅說辭。

Photo from 向佐微博

向佐郭碧婷夫婦均未有回應事件，但網民已經逐一回顧郭碧婷同向家嘅日常點滴並指出郭碧婷喺向家應該受咗唔少委屈！郭碧婷父親就否認女兒嫁入豪門後有委屈，反而指婆家照顧得女兒好好。

Photo from 向佐微博

向太發長文揚言會報復／暗指新抱郭碧婷「黑化」？

喺密會事件傳得沸沸揚揚之時，向太又喺微博發佈長文，內容大概係星座分析，長文中指出摩羯座黑化後嘅可怕度係實至名歸嘅第一，更指：「（摩羯座）以前多深愛，黑化後就會有多討厭。」文章又指摩羯座一般情況下唔會同人計較，亦懶得同人一般見識：「但是你要是惹到了他，他一定會報復的」

Photo from 向太微博

Photo from 向佐微博

文章最後向太又寫道：「昨天的謠言不攻自破，我當做《左眼見到鬼》我們的片名。」1月15日生日嘅向太正正係摩羯座，有網民認為向太發文係表明自己報復心重，對兒子嘅傳聞一定唔會就此罷休。咁啱新抱郭碧婷係1月16日生日，生日與奶奶僅差一天，向佐以往都係一同慶祝媽媽同妻子嘅生日，所以郭碧婷亦係摩羯座，有人則指向太嘅文章似乎係暗示郭碧婷：「性格黑化了之後，摩羯座就會變成一個特別不守承諾的人」