27歲男子樣貌太童顏導致難搵工！2大特徵令僱主婉拒？盤點3位樣貌與年齡不符人物！

生活熱話

By Stephanie on 26 Jul 2022

Digital Content Writer

相信唔少女士都希望能夠擁有「童顏」嘅樣貌，令大家永遠都估唔到佢真實嘅年齡～最近，27歲內地男子因為樣貌太童顏而陷入困境，連日來到處搵工作，卻慘遭老闆們婉拒，令現時經濟狀況出現問題嘅佢非常苦惱！

Photo from 微博

27歲男子難找工作，全因樣貌問題？

來自廣東嘅27歲男子因為太過年輕嘅樣貌而感到苦惱！事關最近佢爸爸因為中風而無法賺錢養家「自己在外面再苦也不能跟家裡要錢」，所以佢就需要搵工幫補家計。然而，與年齡不符嘅外表卻成為佢搵工最大嘅阻礙？！

Photo from 微博

樣貌太年輕+體型較矮，導致被僱主拒絕！

根據內地媒體報導，男子呢兩日都不停搵工，但都因為外貌睇落太年輕而遭到僱主們拒絕。佢曾嘗試應徵工廠嘅工作，但因為佢嘅體型比較矮、擁有似小朋友嘅「娃娃音」，與工廠招人嘅標準有落差，而且僱主亦擔心佢係扮成年人，最終佢都未能如願獲得工作。

Photo from 微博

背影與外貌有超強對比！

而男子講笑咁話自己「年齡大，身體小！」由於佢本身有少少寒背，所以就咁睇男子嘅背面會以為佢年紀比較大，同稚氣嘅樣貌形成強烈嘅對比！唔少網民知道佢嘅經歷後，都同情佢現時嘅處境「正面看像17歲，背面像47歲」、「真的以為是小學生」等，而網民亦祝福佢能夠儘快搵到工作～

Photo from 微博

其實過往都有唔少人因為「童顏」而備受熱議，宜家就等我哋睇下佢哋與別不同嘅經歷啦～

1. 22歲「童顏」男老師

22歲菲律賓男子伊安（Ian Francis Manga）係當地嘅小學老師，但由於佢嘅樣貌太年輕加上體型較矮，所以經常都被誤會成該校嘅學生！當地報導指，伊安自細就患有抑制身體生長嘅疾病，所以與同齡人嘅身高非常不同。儘管如此，佢教導嘅學生都非常尊敬佢，而課外嘅時候亦將佢當成「哥哥」對待，好容易就能夠與學生保持良好關係～

Photo from GMA Public Affairs @YouTube

2. 韓國女演員金允熙

早前，Youtube頻道《Cheeze Flim》上載網路劇《壞少年：為了救朋友而失去眼睛》嘅短劇，當中飾演小學生嘅21歲女演員金允熙獲得大量關注！唔少網民知道金允熙嘅真實年齡後，都忍唔住嚇親，表示以為佢依然係學生，仲因此被冠上「最強童顏」嘅稱號～

Photo from 《Cheeze Flim》

Photo from 金允熙IG

3. 台灣女星胡文英

56歲台灣資深女藝人胡文英早前以「美魔女」嘅身份，獲邀出演小S嘅清談節目《小姐不熙娣》。只見佢當天嘅打扮非常時髦，同普遍嘅年輕人差唔多，而且身材亦保持得非常好，完全唔似3個小朋友嘅媽媽！而佢亦分享曾被29歲「小鮮肉」力追嘅經歷，對方不停要求同佢約會並向佢表白；而佢就搞笑回覆「你要問問我家的小孩喔！」透露自己最年長嘅小孩已經接近30歲，令在場觀眾超驚訝！