油街實現「樹蔭下」藝術項目～探索＋感受不一樣的自然創作！超療癒

By Twinky Chan on 27 Jul 2022

Project Editor

平日熱愛遊走藝文展覽、創作嘅朋友，一定對位於北角，擁有紅磚瓦頂建築嘅「油街實現」藝術空間毫不陌生！而經過3年擴展計劃後，「油街實現」新藝術空間終於與毗連逾3,000平方米嘅戶外空間連合並正式開放啦！隨住全新空間登場，「油街實現」一口氣推出10個與多位藝術家合作嘅項目～其中一個重點項目就係「貳零貳貳同學會」（Our Living Library），由12個創意單位同藝術家以展示、表演或活動形式，與公眾交流生活體驗。每兩周就會換上新創意或藝術家計劃，而設計師藝術家劉景雯UUendy Lau（UU）已開展以「樹蔭下」為題嘅藝術項目，大家可以喺「油街實現」呢個與自然共生嘅地方探索、歇息同創作。想知「樹蔭下」有咩亮點，等小編即刻帶大家去睇下啦！

#樹蔭下，為大家帶來一場自我療癒旅程

樹木，雖然平日隨處可見，但我哋又多唔多停低細心欣賞呢？ UU表示創作靈感係源於「油街實現」呢個被唔同樹種包圍嘅空間與建築物形成一個非常舒適嘅構圖，能令人尋回內心平靜嘅感覺。所以特意構思「樹蔭下」呢個藝術項目，將佢所見所想連繫，給予大家喺呢個充滿生命、時刻變化緊嘅「樹蔭下」歇息、放慢腳步，思考人與大自然共生，並且花少少時間細心觀察、慢慢探索自身與有機場景當下嘅時刻、感受。想像自己企喺樹蔭下，同樣都係大自然創作嘅一部分。

Photo from HolidaySmart

而UU亦形容樹葉飄落嘅形態好似喺地下畫下一筆、創作插畫一樣，令佢有新嘅睇法，所以同時構思咗唔同探索活動，讓大家一齊參與，親身體驗與呢個社區、自然嘅關係～或者會帶畀大家新嘅啟發同靈感！

難怪小編一踏入呢片被樹蔭包圍下嘅空間，好似身處城市綠洲一樣，視覺同心靈都得到療癒感～超Relax！

Photo from HolidaySmart

#樹葉書法～以另類方式感受人與自然共生嘅寧靜

整個「樹蔭下」藝術項目，分為兩個部分！第一個探索名為「樹葉書法」，顧名思義大家可以即場喺整個「油街實現」挑選一片你喜愛、覺得有感嘅落葉，用佢嚟創作一幅獨一無二嘅書法作品。平時見到樹葉，都無特登拎起觀察樹葉嘅形態、顏色，而UU今次特別安排呢個別開生面嘅「樹葉書法」體驗，希望大家能夠近距離留意樹葉嘅形狀、感受書寫下嘅慢節奏，享受人與自然共生嘅寧靜，培養情感。小編都係第一次用樹葉嚟寫字，原來唔係咁易控制（笑）～鍾意體驗新事物嘅朋友都唔好錯過呀！

現場櫃桶內亦放咗唔少UU親手書寫嘅作品畀大家欣賞～若然細心睇，會發現唔同樹種嘅樹葉所寫出嘅字形態都唔一樣～好特別！

Photo from HolidaySmart

#慢步探索7大Check Point～與樹相遇發現更多故事

話明「樹蔭下」，當然唔少得欣賞「油街實現」內多種唔同形態、種類同線條嘅樹啦！而藝術項目第二個探索，就係名為「集體地圖」！UU建議大家可以跟隨繪畫咗「油街實現」7個唔同位置與每款獨特樹種嘅地圖，慢步探索同感受每個地點下嘅樹種如何同我哋溝通～

Photo from HolidaySmart

而喺7個位置下，大家分別可以欣賞到：1）歡迎小編同大家嚟到「油街實現」嘅血桐樹同榕樹、2）正乘涼最適合不過嘅石栗大樹、3）「油街實現」最年長嘅樹之一、4）潺槁樹、朴樹、米仔蘭形成嘅迷你小樹林、5）清雅秀美嘅尾尖垂葉榕、6）層次感十足嘅5棵石栗樹，以及7）每日努力成長嘅小荔枝樹。

Photo from HolidaySmart

一邊行、一邊抬頭觀察欣賞，配合埋唔同時間陽光嘅照射，觀察各棵樹嘅光線、陰影交錯都另有一番味道㗎，而整個旅程中，小編覺得與每棵樹嘅相遇、連繫都係獨一無二，只專屬於當刻大家同樹蔭之間～仲可以激發我哋對自然環境更深嘅理解?。而遊覽後，大家仲可以喺大地圖上同各位參觀人士分享與「樹蔭下」嘅故事，邊一個部分、物件或主題令大家最感興趣同深刻！

Photo from HolidaySmart