東張西望｜41歲男子現真身接受訪問！承認同時有好多女友！突然自省懺悔，但又立刻搭訕女主持王嘉慧？

By Stephanie on 28 Jul 2022

Digital Content Writer

最近《東張西望》收到唔少女士報料指喺交友App認識一名41歲男子，繼而發現對方一腳踏十幾船。「女友」們一齊假扮成男粉絲開設新帳號接近對方，揭發男方背後嘅種種惡行。而節目組就化身成粉絲，成功約到男事主出嚟！

Photo from 《東張西望》

41歲男子同時與10幾名女生交往，擅自拍攝親密片段？

早前節目報導41歲男子透過交友App認識唔同女生，並與十幾名女生發展情侶關係，欺騙佢哋感情及「食軟飯」，甚至未經許可就拍攝二人親密嘅片段，行為誇張！其中一位「女友」Bonice（化名）指發現對方手機內有超過2、30段影片，而大部分都喺男方居住嘅公屋單位內拍攝。

Photo from 《東張西望》

大爆男士交往時惡行！

從影片中嘅角度，女生們相信絕大部分人都唔知道自己被拍，而且佢哋猜測男子將鏡頭擺喺凌亂嘅衣服堆裡面。而「女友」們憶述過往男子同佢哋講嘅說話「話自己（男子）近視好深，所以要開燈」等，令佢哋更加感到心寒；後來男子仲透露所有女士都係「用同一個玩具」，幸好女士們得知後都立刻進行全面身體檢查，全部都並冇大礙！

Photo from 《東張西望》

對方毫無歉意

然而，男子卻對於自己嘅行為毫無歉意，仲以自己從小缺乏母愛以及近年婚姻、事業不順等作為理由。另一方面，女士們表示曾嘗試報警求助，但被要求搵到實質嘅影片作為證據，而佢哋亦擔心要因此而公開影片。

Photo from 《東張西望》

節目組成功約男事主見面！

節目組利用「女友」們本身嘅假帳號去聯絡男事主，並以「跟佢學嘢」為理由約對方見面。但當日男子嘅警覺性非常高，激動表示「我知你影緊我啊」並嘗試搶走電話，直到節目組將電話收起先令佢嘅心情穩定落嚟。不過當節目組提及有關「識女仔」嘅話題，佢突然坦承「我一直都有好多女朋友」，並大談自己經營感情嘅方法。

Photo from 《東張西望》

男子大談「獨特」感情觀！

男子表示過往交往嘅女生「我都冇咩Commitment（承諾）」，仲話因為太多女友根本分唔清佢哋！當節目組提及有關親密片段嘅話題，佢就大聲咁話「冇問題！拍嘅人冇問題，係hack人哋嘅有問題。」然而喺2021年相關法例曾進行修訂，若果未經許可拍攝親密影片都係違法。

Photo from 《東張西望》

曾以親密片段作「把柄」要求女生交出手機？！

其後，男子透露最近因為親密影片嘅事宜，與他人有爭吵，認為對方可能係想令佢身邊嘅女友離開佢。不過，節目組早前從女士們嘅口中聽到另一個版本，當中男事主利用親密影片作為「把柄」要求女生將手機俾佢睇，想藉此搵出「二五仔」。

Photo from 《東張西望》

女主持人當面訪問男子，坦承：識咗4、50個女仔！

後來，女主持王嘉慧直接上前當面訪問男子，對方坦承「有識女仔，約出嚟食飯嘅都有4、50個！」，承認1月到6月所認識嘅女生交往時間有所重疊，而佢就解釋因為自己一個人住好悶。

Photo from 《東張西望》

否認「食軟飯」！

當被問到是否有欺騙女生時，男子振振有詞咁話「我自己有付出嘅，食飯睇戲都係付出」；仲澄清自己絕對唔係專登挑選有錢嘅女士食軟飯「食餐飯食得幾多錢啊！最多咪一千兩千蚊」，表示約會期間大多數都係俾女生選擇去邊度食。

Photo from 《東張西望》

突然誠心懺悔自我反省？！

當女主持人直接詢問對方有關親密影片嘅事宜，男子突然扮失憶「我唔記得咗」之後又話「好似有」，仲話自己已經刪除晒啲影片？！過咗一陣，男子態度180度大變語重心長咁話「呢段時間我反省咗自己」向女士們表示歉意，勸喻大眾唔好玩交友apps！

Photo from 《東張西望》

訪問後卻向女主持人王嘉慧「抄牌」！

以為男子真係會痛改前非？！受訪後，佢主動詢問女主持人嘅姓名，仲話「我可唔可以Contact（聯絡）到你㗎？」行為同佢口中嘅反省似乎有啲唔同！

Photo from 《東張西望》

相關文章：東張西望︳利穎怡直擊新宿譚仔三哥！受訪者不滿發文爆拍攝事前未通知店方

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

東張西望｜41歲男同時與十幾名女生拍拖！透過唱歌App揭發實情！用4招營造荀盤形象？

27 Jul , 2022

昨日（26日）《東張西望》報導有關一名男士喺交友App周圍認識女仔，仲同時與十幾位女生拍拖，欺騙佢哋嘅感情，非常誇張！而唔少「女友」都現身接受節目組訪問，講述二人交往嘅全過程，希望藉此警惕大家慎重使用交友App。

Photo from 《東張西望》

男士透過交友App同時與十幾名女生拍拖！

現時使用交友App認識另一半已經變得越來越普遍，但實際上喺網上交友隱藏唔少陷阱？！節目組表示近日不停收到唔少女士報料，指大家都喺某交友App中認識咗同一位男士。該男士同時間「一腳踏十幾船」，仲欺騙佢哋感情「食軟飯」，甚至未經女士們許可就拍攝二人親密嘅片段！

Photo from 《東張西望》

當中「女友」們學歷高/家境不錯

據悉，呢班女生嘅年齡介乎30歲至40歲，當中唔少擁有高學歷而且家底唔錯，令大家不禁覺得男士嘅外型高大威猛先能夠贏取眾多女士嘅心！其中一位「女友」Bonice（化名）表示「覺得佢（男士）好高大，而且職業都幾吸引」，而且從男方社交媒體嘅照片得知佢經常都會食貴價食品，並且到高級酒店Staycation，認為對方應該幾有錢！

Photo from 《東張西望》

男士自稱39歲化驗師，懂得享受生活

男士喺交友App上自稱現時39歲，身高177cm，從照片所見佢外型健碩，五官標緻；而且表示自己於中大畢業，現時喺醫院擔任化驗師，就咁睇似乎係一位「筍盤」！「女友」表示見到對方懂得享受生活「咁捨得洗錢」，認為呢種特質能成功吸引女生「我話俾你聽十個女仔九個都會中囉！」

Photo from 《東張西望》

初次見面與想像中完全不同？！

女生們分享與該男士喺網上開始聊天後，二人其後就會相約見面。喺二人約會時，男士坦承其實自己已經41歲，但女生們表示單憑樣貌「會覺得係45、46歲囉」；而且初次約會大多都係食M記等快餐店，性格節儉，完全與網上所認識嘅佢大相逕庭！

Photo from 《東張西望》

男方甜言蜜語成功打動女士們！

另一方面，「女友」們都覺得男士似乎有啲心急，只係第一次約會就已經有暗示，甚至邀請女士去佢屋企。雖然佢哋見面後都發現男生似乎「貨不對辦」，但「女友」Amy（化名」表示對方經常都會發肉麻短訊，令佢覺得有戀愛嘅感覺，所以最終開始同對方拍拖！

Photo from 《東張西望》

交往後開始發現問題？！

不過「女友」們喺同男士開始拍拖後就開始發現端倪：經常都搵唔到佢「可能要幾個鐘後先覆返你」、約會期間掛住睇手機、唔記得女友生日等。而該男士亦非常聰明，從來都唔會叫女友嘅姓名，統一地稱呼佢哋為「BB」，所以並唔存在唔小心叫錯名嘅問題！

Photo from 《東張西望》

透過唱歌App揭發實情！

男士不慎暴露自己「一腳踏十幾船」嘅起源竟然係因為一個唱歌App導致？！Amy（化名）表示對方好鍾意模仿張學友唱歌，仲會叫佢幫手喺App到同佢打氣「學友歌手出現喇！」、「唱歌好好聽」等留言，而佢一開聲唱歌就立刻有唔少女士留言，令Amy開始覺得有啲古怪。

Photo from 《東張西望》

女生們頓時發現男生「偷食」！

其後，Amy私底下與其他女生們聯絡，而所有女生都聲稱係為男友打氣，揭發男方同時交往十幾名女生嘅事實！而佢哋亦開始對比大家約會嘅時間線，發現全部都有重疊「可能佢（男士）早上搵我，下午就搵第二個」，而且Whatsapp嘅訊息亦係同時群發；而佢似乎亦將「女友」們分類好「條件比較好嘅女仔會喺比較優先嘅位置。」