MIRROR演唱會｜2名舞蹈員受傷情況更新！二人都係Anson Lo御用dancer！阿Mo與女友Soching感情甜蜜/阿峯舞台經驗多

By Stephanie on 29 Jul 2022

Digital Content Writer

昨晚（28日），MIRROR第四場演唱會中發生嚴重意外，一部大型電視屏幕喺表演途中突然奪下，導致台上嘅2名舞蹈員受傷。其中傷者分別係阿Mo（李啟言），而佢亦係女團COLLAR成員Soching嘅男友；另一位則係阿峯（張梓峯），二人暫時都留院觀察中。

Photo from MIRROR IG

MIRROR第四場演唱會發生嚴重意外！

MIRROR演唱會自開始舉辦後，舞台安全問題一直備受外界關注，昨晚（28日）嘅演唱會再次出現嚴重意外！喺表演《Elevator》嘅途中，掛於半空中嘅大型電視屏幕突然奪下，壓傷正在表演中嘅舞蹈員，令在場觀眾好震驚。而花姐亦立刻開咪要求觀眾離場，表演立刻終；事件引起各界嘅高度關注！

Photo from Now TV新聞

魯庭暉交代2名傷者最新情況

其中，2名dancers受傷立刻送往深切治療部留醫，二人送院時清醒；由於事態嚴重，演唱會主辦單位已經宣佈取消餘下嘅演唱會場次。而MakerVille行政總裁魯庭暉亦喺半夜到醫院探望2位傷者，並向傳媒匯報最新情況「我哋盡我哋全力幫傷者家人同傷者。阿峯係擦損同拉傷，醫生建議留院觀察，冇大礙先出院；阿Mo喺ICU，清醒可以同醫生溝通，但要再做一系列檢查。」

Photo from nowTV

Photo from Now TV新聞

根據媒體報導，舞蹈員阿mo頭部及頸椎受傷，有腦出血及頸椎第四節骨折，情況較為嚴重，有指佢已經進行手術，需要等待神經線系統復原；而阿峯嘅盤骨及頸椎受傷，情況穩定，暫時需要留院觀察。

Photo from momo.lky @IG

Photo from fungfung2222 @IG

27歲阿Mo曾參加《全民造星》

其實受傷嘅2位都係業界內嘅著名嘅舞蹈員，二人近年經常都與MIRROR合作，與成員們關係亦非常好！現年27歲嘅阿Mo（李啟言）過往曾經參加過第一屆《全民造星》，可惜於55強止步。不過熱愛跳舞嘅佢並冇因此而放棄，繼續喺舞蹈界發展；近年仲成為咗Anson Lo嘅御用dancer，二人關係超好！

Photo from 《全民造星》

Photo from momo.lky @IG

與COLLAR成員Soching 交往中，二人感情甜蜜

除此之外，阿Mo仲係COLLAR成員Soching嘅男友，二人同樣鍾意跳舞，不時喺IG上載情侶跳舞片，恩愛感情羨煞旁人！喺Soching參加《全民造星4》總決賽時，佢亦有份幫女友伴舞，用行動支持女友。

Photo from momo.lky @IG

父母從多倫多趕回香港探望兒子

意外發生後，女友Soching被傳媒拍攝到趕往醫院探望男友，神色凝重，而COLLAR今日（29日）嘅活動及訪問將取消；據悉阿Mo喺多倫多居住嘅父母立刻連夜訂機票回港探望兒子，不過基於現時本港防疫措施，佢哋抵港後必須於酒店隔離7日先可以出關。阿Mo爸爸為教育界著名牧師李盛林，2006-2016年間擔任牧職神學院院長，現時主要喺加拿大嘅華人教會中講道。