MIRROR演唱會｜梁思浩斥花姐難辭其咎，直言3大不足！讚連登仔為公義發聲

娛樂新聞

By Jennifer on 05 Aug 2022

Digital Editor

今晚食乜餸：小二，嚟一碟花生！

MIRROR紅館演唱會發生意外，事後MIRROR成員同經理人花姐等保持沉默一段時間，期間有唔少前輩發聲。梁思浩喺網台「大家真瘋Show」中亦就事件發表意見，佢直指成件事屬人為意外，而高層唔負責難為咗12位鏡仔。

Photo from MIRROR IG

MIRROR演唱會幕後製作公司表示與意外無關

MIRROR演唱會事故震驚全城，由於半空中大螢幕突然跌下，連日嚟有唔少網民都認為演唱會主辦方應該要回應事件，並盡快搵出負責之單位。而演唱會負責舞台製作工程嘅幾間公司亦相繼發聲明，表示與意外無關。

Photo from MIRROR IG

梁思浩讚郭富城、汪明荃、王貽興、連登仔唔怕得失人，勇於發聲係英雄

今次意外除咗引起網民關注，仲有好多圈中前輩都發聲。有豐富舞台經驗嘅郭富城喺事件發生前就表示演唱會中歌手要集中精力演出，所以成個舞台設計應該係監製最清楚，幕後團隊要盡力解決問題，唔應該令歌手分心。城城又稱2日踩台時間太短，事後佢更發黑圖呼籲關注舞台演出者嘅安全。

Photo from 郭富城Facebook

另外汪阿姐（汪明荃）、王貽興亦有發聲。梁思浩喺網台「大家真瘋Show」中指出對呢件事好多人會避而不談，以免得失人，佢大讚喺眾人避談之間呢幾位發聲嘅名人係英雄，佢指連登討論區有好多網民為公義而發聲，一直追究要人負責任。

Photo from 汪阿姐IG

Photo from 大家真瘋Show

梁思浩斥人人「卸責」，無人負責任

李思蓓就指搞演唱會就算賣唔到飛但基本嘅安全一定要做足，何況MIRROR演唱會賣到爆晒飛。而梁思浩則表示佢曾經做過演唱會監製，有權對事件發言。佢指演唱會賣晒飛已經賺硬錢，但仲喺度慳，李思蓓更稱佢聽到傳聞係演唱會將搭舞台嘅時間攞咗嚟加場。

Photo from MIRROR IG

梁思浩指出MIRROR第一場演唱會未「full dress rehearsal」就開場，對表演者完全唔合理。佢稱做監製、做經理人，點解唔企出嚟負責，要「12個細路仔」面對呢件事，都咁多日都無人出嚟交待，事件一出全部人都「卸責」：「賺錢袋落袋嗰時就識，到要企出嚟就無人孭。」

Photo from MIRROR IG

直言花姐難辭其咎

梁思浩話佢唔怕畀人鬧，一向有嗰句講嗰句：「你係一個監製，甚至你係一個經理人，如果你rehearsal睇到有危險，你需唔需要保護你啲藝人先？」Mandy指經理人更加要出聲：「嗰12個幫你搵錢㗎！」梁思浩直言成件事花姐係難辭其咎：「老老實實啦阿花，你係呢12個細路仔嘅經理人，你有睇rehearsal㗎嘛！」

Photo from 花姐IG

3位主持都認為花姐睇到有問題應該要即刻出聲，尤其係花姐有做紅館演唱會監制嘅經驗：「嗰12個仔當你係阿媽！」佢哋指MIRROR工作量咁大，但有幾多錢袋都成疑，而經理人花姐明明有責任保護佢哋。梁思浩指出3大問題：1.)演唱會賣飛賺晒錢但仍喺安全工作方面慳；2.)做監製有晒經驗見到採排咁多問題唔出聲保護藝人；3.)事發至今唔企出嚟負責，反而要藝人面對。