62歲鄧梓峰上天下海樣樣精 入行前係軍人+家世顯赫+超多興趣

鄧梓峰最近踏入62歲，有豐富嘅司儀經驗，係電視台嘅金牌司儀，亦有參演唔少劇集，更加因為外貌酷似「反斗奇兵」入面嘅人物巴斯光年而引起網民討論。原來佢仲有超多興趣，入行前做過軍人，仲係飛機師、會計師、低音結他手、筆跡分析專家等，仲識4國語言，真係估佢唔到！

Photo from IG@patrick_dunn_official

入行前曾任軍人

鄧梓峰入行前係皇家香港軍團（義勇軍）軍人，曾經去過英國桑德赫斯特皇家軍事學院受訓，軍團係1995年解散時佢嘅軍銜係中尉，佢曾經係節目分享退役時特登搵鑄劍廠訂造咗刻有佢嘅名、軍銜同軍人號碼嘅劍。

Photo from IG@patrick_dunn_official

有小型飛機駕駛執照

對飛行有濃厚興趣嘅鄧梓峰係2000年考獲小型飛機駕駛執照，有超過1000小時飛行經驗，仲係香港飛行協會會員及香港航空青年團上尉！由於佢對航空飛行嘅熟悉，電視台兩輯《衝上雲霄》都係由佢擔任顧問，仲可以見到唔少佢駕駛小型飛機嘅鏡頭。

Photo from 《衝上雲霄》劇照

興趣廣泛樣樣精

鄧梓峰係美國波士頓大學會計系畢業，有專業會計師資格，而佢亦都係高爾夫球愛好者，初中時已經跟爸爸打高球，係香港高爾夫球會會員；又會同朋友夾band，所以仲係低音結他手，佢連詠春、馬術、劍擊都有涉獵過，更加考獲筆跡分析證書同有幾個潛水牌照。係語言方面就精通中、英、德三國語言，亦識基本法文，真係可謂文武雙全！

Photo from IG@patrick_dunn_official

Photo from Youtube 截圖

佢亦係一位玩具收藏家，因為對軍事同飛行都有興趣，所以早期會收藏軍事相關物品同各種制服。除此之外佢亦有收藏唔少50、60年代嘅低音結他，合共有成超過60支結他，仲有逾100件皮褸同逾100對皮鞋，而且同哥哥合資儲咗數千支葡萄酒。鄧梓峰仲有收藏外國漫畫嘅喜好，曾經開過一間外國漫畫精品店！

Photo from IG@patrick_dunn_official

Photo from 電視台截圖

家世顯赫作風低調

原來鄧梓峰爸爸鄧廷琮經營空運及海運業務，兄弟鄧小宇、鄧小宙都係作家，家族資產高達20億，不過佢就從來都無比人炫富嘅感覺，相當低調！去年因為疫情限制，令佢工作量大減，係社交平台向大家拜年時先曝光高樓底豪宅。不過其實佢相當慳家，唔止被傳媒影到帶雙胞胎兒子行商場，購買$79嘅保暖衣，更加一架車揸足27年先換！

Photo from IG@patrick_dunn_official

形象親民貼地

雖然鄧梓峰係電視台多數擔任配角，不過就多數飾演飛機師、穿著西裝嘅專業人士等角色，溫文爾雅嘅形象深入民心，加上入行多年近乎零緋聞，毫不介意被網民指同巴斯光年似樣，係名符其實嘅「好好先生」！最近更有本地藝術家以佢個樣整巴斯光年！

Photo from Youtube 截圖

Photo from Facebook 橙皮製作 Orange Pe Production

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）