【阿媽有咗第二個】取景打卡熱點合集！茶餐廳必食「姜濤餐」+同款茶記制服/踩單車送外賣街道

By Haitaeng on 17 Aug 2022

Digital Editor

由MIRROR姜濤、Jer（柳應廷）及毛舜筠主演的電影《阿媽有咗第二個》，上映短短幾日已突破千萬票房！不少粉絲除咗入戲院支持，仲特別到電影部分取景地朝聖~其中，姜濤飾演茶記侍應的茶餐廳，不但處處可見姜濤影子，更出埋「姜濤餐」及同款茶記制服！即睇《阿媽有咗第二個》打卡熱點合集！

Photo from FB@阿媽有咗第二個

#《阿媽有咗第二個》打卡熱點：永發茶餐廳

姜濤在電影中飾演茶記侍應「方晴」，而打工的地方正是位於油麻地的永發茶餐廳！自從《阿媽有咗第二個》在這裡取景之後，茶餐廳各處可見貼有姜濤的照片及電影劇照，成為姜糖及MIRO最新的打卡熱點之一~茶餐廳3大必知打卡位包括姜濤冲奶茶的水吧、毛舜筠及姜濤坐在靠門口的座位，仲有姜濤用來送外賣，擺放在門口的單車啦！

Photo from FB@阿媽有咗第二個

Photo from 《阿媽有咗第二個》劇照

去永發茶餐廳打卡之餘，記得必試「姜濤餐」：炸燒賣及西多士！另外，茶餐廳老闆相當懂粉絲的心，仲出埋姜濤在電影中的同款伙記制服，售價$180，除咗一件白色制服，仲有劇照！話説茶餐廳開業至今已有20幾年之久，不論裝潢或格局都非常有懷舊Feel，成為不少電影及劇集的御用外景場地。其中，由MIRROR Edan（呂爵安）等人主演的電影《闔家辣》以及日劇《戀愛香港》亦曾到此取景~

Photo from 《阿媽有咗第二個》劇照

營業時間：6am~8pm
地址：油麻地廣東道847號
交通：港鐵油麻地站A1出口，步行約3分鐘

#《阿媽有咗第二個》打卡熱點：五金街

姜濤不但為《阿媽有咗第二個》獻出大銀幕處女作，仲有踩單車初體驗啊！運動神經不錯的姜濤，原來唔識踩單車，但為了拍攝送外賣的場景，特別苦練學踩單車~而姜濤在電影中在一個極具香港特色的舊街道上踩單車送外賣的一幕，絕對係非常值得紀念的苦練成果時刻！這條街道位於廣東道與登打士街交界路段，主要以五金與食肆為主，被稱為「五金街」，處處可見二手機械及零件的五金檔舖，同樣相當有懷舊氣息~而這裡亦距離永發茶餐廳不遠，步行約1分鐘即可抵達。

Photo from 《阿媽有咗第二個》劇照

位置：廣東道與登打士街交界
交通：港鐵油麻地站A1出口，步行約3分鐘

#《阿媽有咗第二個》打卡熱點：屯門浩和街

姜濤與Jer（柳應廷）在寬闊草地攤牌肉搏的一幕，以及電影海報的取景堤壩位置，正是在有「港版邁阿密」之稱的屯門浩和街取景啦~於2020年開通的屯赤隧道，連接屯門及赤鱲角，而其入口附近的浩和街以開闊的沿海堤壩、種滿棕櫚樹的大草地及燈塔而聞名，仲可以欣賞到無敵海景！由於景色優美，猶如身處在外國，不但成為超人氣的打卡景點，仲係賞日落、野餐、帶毛孩散步及中秋賞月的好去處！