陳百祥阿叻反口決定「復出」！全因曾志偉極力挽留？曾經歷2次破產，獲圈中好友借錢幫助！

娛樂新聞

By Stephanie on 17 Aug 2022

Digital Content Writer

72歲藝人陳百祥（阿叻）日前喺錄影節目《答得快好世界》時突然宣佈將會係最後一次主持節目，未來亦唔會再參與電視、電影等演藝節目，似乎係想退出幕前，引起熱議。日前，佢喺現身籌款節目記者會時卻透露暫緩計畫，仲話全因大台高層曾志偉嘅挽留？！

Photo from 《以時相聚》

阿叻無預警宣佈退出幕前！

陳百祥（阿叻）早前無預警地透露自己即將退居幕後，仲話未來應該唔會再參加任何演藝工作，並且打算轉行做生意。當時佢就表示喺本月20日嘅慈善騷將會係佢喺大台最後一次亮相，似乎真係下定決心要好好休息下咁～

Photo from 娛樂新聞台

突然改口決定「復出」！

然而計畫總是趕不上變化！日前，阿叻喺受訪時反口決定「復出」繼續發展演藝工作；佢表示講完「隱退」嘅事情後，曾志偉立刻打電話俾佢「你唔係嘛！我做咗TVB你先收工？！」為咗幫好友決定暫緩計畫「起碼幫咗今年先啦」，不過佢強調工作量一定唔多，仲話自己好享受喺娛樂圈所做嘅工作～

Photo from 娛樂新聞台

全因感謝曾志偉2008年出手幫助？！

阿叻又提及幫曾志偉全因念在多年嘅舊情，憶述對方喺2008年金融風暴曾經出手幫佢，當時曾志偉仲攞定期存款借俾佢，金額高達8、9位數；而阿叻亦表示自己喺兩星期內還清，但至今依然非常感謝對方出手相助！

Photo from 《最佳拍檔》

Photo from 《精裝追女仔》劇照

過往好友譚詠麟都曾借錢幫手！

其後，阿叻透露當年就連好友譚詠麟都義不容辭幫佢，將自己本身用作買樓嘅$3萬首期借俾佢，令佢不禁感嘆「我係無用嘅人，只係夠運！」睇得出佢嘅朋友似乎都好信任佢～

Photo from 譚詠麟微博

Photo from 《娛樂三兄弟》

事業發展波折重重！

其實過往阿叻除咗發展演藝事業，仲曾經營商嘅經驗，可惜都失敗吿終。初期佢曾經開製衣廠，身家一度飆升至過千萬，可惜最終生意跌落低谷，而佢仲要申請破產！直到2000年，佢再與成龍、曾志偉、譚詠麟、梅艷芳等集資$1千萬成立東方魅力公司，但佢投資失利，導致欠債逾千萬，二度申請破產。

Photo from 《今晚睇李》

三人友誼深厚

其實三人都係香港明星足球隊，過往經常一齊出席慈善騷、足球活動等，係眾所周知嘅好兄弟。雖然早前曾傳出阿叻同曾志偉嘅友誼生變，而佢仲話同曾志偉毫無交情，但相信傳聞都已經不攻自破喇～

Photo from 香港明星足球隊微博

Photo from 黄杏秀微博

相關文章：譚詠麟返港後首度開腔回應傳聞！承認未有妥善處理：想修補同家人關係！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

陳百祥阿叻宣佈不再參與演藝工作！未來將會轉行到大灣區發展？與曾志偉疑似友誼生變惹熱議

5 Aug , 2022

資深藝人陳百祥（阿叻）昨日（4日）參加大台全新節目《答得快好世界》錄影時，突然自爆今次將會係佢最後一次主持節目，未來唔會再參與主持電視、電影等演藝節目；而佢就表示打算轉行做生意？！叻哥呢番「退出宣言」一出即刻引起網民熱議！

Photo from 《以時相聚》

72歲阿叻入行至今逾40年

72歲陳百祥（阿叻）喺中學時期就已經熱愛唱歌，喺1978年加入無綫正式入行。其後佢有份出演多部經典電影《唐伯虎點秋香》、《精裝追女仔》系列等，成功塑造搞笑形象。後期，佢主要負責擔任節目及公益節目主持，奠定喺大台主持人「一哥」位置！

Photo from 《唐伯虎點秋香》

Photo from 《白金巨星耀保良》

將以嘉賓主持身份亮相《答得快好世界》

最近，大台正考慮將經典綜藝節目重新拍攝，其中《超級無敵獎門人》現時已經熱播中，而阿叻亦獲邀再度主持遊戲節目！佢現時獲邀出演《答得快好世界》，該節目由張秀文及鄭衍峰主持；而佢今次係以《全港智叻星》嘉賓主持登場；節目形式同1995年播出嘅《運財智叻星》相似，但由於該節目名稱涉及版權問題，所以未能重用返。