Kenny陳嘉偉憑無厘頭爆紅電腦展大曬靚女合照曾自爆身世坎坷?

By Moon Lam on 23 Aug 2022

Digital Content Writer

網紅陳嘉偉（Kenny）近日係網絡上爆紅，全因佢夠無厘頭！佢被網民喻為「劉馬車接班人」，更加有廣告商搵佢合作！佢近日現身電腦展，即刻吸引大班人同佢合照，連唔少靚女網紅都係佢粉絲！

Photo from Youtube ＠Kenny Chan (2022一定要得)

爆紅因夠「騎呢」

陳嘉偉（Kenny）嘅個人社交平台已經有成3.3萬人追蹤，Youtube訂閱數更已經突破4萬，佢最近更加會舉辦fans meeting活動！不過佢初期嘅影片乜都拍，有時打下機唱下歌，後來因為同母親互動非常搞笑而爆紅，更有唔少網民認同佢係影片入面講嘅說話。

Photo from Kenny IG ＠hksp.kc

Kenny母親信基督教，經常都會係Kenny拍片時以奇怪聲線大叫「耶穌祝福你」、「你地真係好無知」、「快啲信耶穌」等鼓勵人同佢一齊信教嘅說話；而Kenny就會向母親反擊，包括雙手合十念佛經，又會不斷講「喃嘸阿彌陀佛」，次次都成功令母親大發脾氣，嬲到大聲叫Kenny收聲，兩母子勁無厘頭嘅互動竟然成功令觀眾都笑埋一份，成功係網紅界跑出！

Photo from Youtube ＠Kenny Chan (2022一定要得)

現身電腦節曬合照

近日遇正電腦節開鑼，Kenny亦現身會展，引黎唔少觀眾同佢合照！而佢自己亦有目標，就係喺電腦展周圍行，同唔同攤位嘅靚女工作人員影相，更加係社交平台大曬合照，有成十多位會場嘅靚女合照呀！其中一位更加係網紅蘇小小（Zoe So），引黎唔少網友羨慕，真係戴住口罩都覺得佢笑得好開心！

Photo from Kenny IG ＠hksp.kc

熱情回應粉絲

Kenny係爆紅之後出街頻頻被人認到，仲唔少人會要求合照，社交平台周不時都會見到網友同Kenny嘅合照，原來唔止電腦展，就連之前Kenny現身動漫節已經係大家集郵嘅目標！面對眾多網友要求合照Kenny全部無托手肘，一一熱情回應，更有網民笑稱同Kenny合照條隊長過同靚女網紅合照條隊呀！

Photo from Kenny IG ＠hksp.kc

曾自揭悲慘身世

雖然Kenny同母親精彩嘅互動令到一眾網民捧腹大笑，「信耶穌啦！」幾乎係每條有Kenny母親嘅片都會出現，不過原來佢之前曾經受「李皮教」影響，中哂伏呀！而Kenny更加曾經係直播片段透露自己曾經患自閉症，而原因竟然係因為母親紅杏出牆，佢指控母親：「層樓我老竇架，你就帶個男人返黎住」，言語間更透露父母離異，自己自細係跟姑媽住。

Photo from Youtube ＠Kenny Chan (2022一定要得)

除此之外，佢更加分享曾經被母親新歡傷害，指對方用衣架打佢，仲打到瘀哂，不過Kenny母親就回應「你地快啲信耶穌啦，我唔應該生出黎」，「我唔想多講啦」，仲被Kenny反駁「耶穌唔會幫你交租，啲租我交架」。原來Kenny母親並無工作，家中租金由Kenny一個人負擔。母親後來都有澄清，當時未信耶穌，而家已經改過自新。