側田闊別樂壇3年復出開音樂會自揭移居泰國兼患病? 網民反應兩極

By Moon Lam on 24 Aug 2022

Digital Content Writer

側田嘅歌陪住唔少80後、90後成長，佢係闊別香港音樂界三年，近日宣佈加入環球唱片，而且仲現身會展舉行兩場音樂會，除咗經典金曲仲帶黎加盟環球後嘅全新作品，回歸香港樂壇！不過網民就有唔同意見！

Photo from Youtube Viu1 HK

闊別3年加盟環球

現年46歲嘅側田相隔3年終於再係香港開騷，今次係佢加盟環球後推出十多首新作，並舉行音樂會，仲帶黎唔少經典金曲！當佢唱完第一首歌《情歌》，已經眼濕濕難忍眼淚，佢話：「我諗咗三年，晚晚喺度幻想呢一刻講咩，最怕一開口就喊！」仲表示非常掛住歌迷，台下觀眾即刻以熱烈掌聲回應。

Photo from Youtube universalmusichk

強調音樂會「好隨意」

側田不時係台上換帽，又表示今次音樂會好隨意，仲多次強調真係隨意！係自彈自唱個陣，彈咗唔少大熱嘅歌曲，例如《刻在我心底的名字》，又或者經典舊歌《一生何求》、《海闊天空》等，不過唔少歌都好多甩漏兼忘詞，好彩一班觀眾識唱嘅一齊唱，用大合唱補飛。側田事後都話自己結他退步咗，今次認真失禮。

Photo from Youtube universalmusichk

Photo from Youtube Viu1 HK

透露移居泰國3年

側田又係音樂會透露呢幾年好少露面嘅原因，原來佢3年前去咗泰國居住，希望搵返自己做音樂嘅初心。佢指一段時間無係社交平台出現被誤以為「死咗」，但每日出post又會被人話曬命。佢話：「呢三年好多人問我去咗邊，我搬咗去泰國住，殺死我嘅ego」，更指「因為我發現自己失去笑容、有雜念，咁樣係會影響到我嘅創作」，佢希望自己做音樂可以發放正能量，感激上天比佢用1年時間搵返自己嘅初心，睇黎佢對新碟投放咗唔少心血！

Photo from Facebook 側田Justin Lo

公開感謝女友

佢係音樂會公開感謝女朋友一直以黎嘅支持，更將《愛這個字》呢首歌送比女朋友，佢指自己做嘅音樂都係唱比一個人聽，由以前唔相信愛，到現在想將愛送比女友。佢表示要對自己嘅作品負責，亦要尊重歌迷，係2020陷入低潮時決定離開出走泰國，直到2021搵返初心開始做新碟，期間都係因為女朋友陪伴，更稱「無佢我企唔到係台」。側田同女友已經一齊多年，不過一直愛得低調。

Photo from Facebook 側田Justin Lo

自揭或患失憶症

到Encore環節，側田就係台上表示自己有好大機會患上遺傳性失憶症，指自己「唔知可以唱多幾多年，可能過多幾年要降key」，又指而家做嘅所有音樂同演唱會都係比自己將來可以回顧，佢感性表示希望將來可以靠音樂搵返記憶，人生完結前都聽住自己嘅歌離開，亦指自己正朝呢個人生目標行，唔會再為工作或無謂事而唔開心。

Photo from Youtube Viu1 HK

網民態度兩極

唔少歌迷得知側田會復出都感到非常開心，有人大讚音樂會由開始一直唱，只換帽唔換衫，唱到Encore前足足兩個鐘先入返後台！不過亦有網民認為佢見香港樂壇有起色就返黎，又指佢之前又話去北京，轉眼間又返香港，突然又話移居泰國3年，令網民非常困惑。

Photo from Facebook 側田Justin Lo

Photo from Youtube Viu1 HK

曾話「北京做三線歌手好過香港」惹非議

側田係2010年接受傳媒訪問時曾經表示係北京做三線歌手都比係香港賺得多，更指香港市場唔重要，當時已經引起網民不滿。而佢都曾經係北京逗留3年後低調返港，將事業重心集中返係香港，到2016同2017參加《蒙面唱將》同《歌手2017》先又被網民提起，後來係2019年紅館演唱會後就少有再露面，相信呢番言論都係網民唔撐佢復出嘅原因。