港爸淘寶大手買17kg月餅自用 15盒共60個震驚網友背後原因令人心酸

By Moon Lam on 06 Sep 2022

Digital Content Writer

話咁快又就黎到中秋節，相信唔少市民已經入手定月餅過節，有網民就分享屋企人係淘寶買嘅月餅，「戰利品」有成17kg重，引起網民熱烈討論！

Photo from 《開心速遞》劇照

港爸買17kg月餅

近日有網民係Facebook群組「淘寶開心Share」中分享多張月餅相片，並指爸爸係識用淘寶之後成為淘寶迷，上年已經透過淘寶買咗10kg月餅，今年中秋更加買咗足足17kg，樓主更稱爸爸「今年叻左，有進步，17kg」。透過樓主上載嘅圖片可見，樓主爸爸以集運買入大批月餅，真係超大包！仲有勁多唔同口味、款式同品牌，除咗最傳統嘅常勝款鹹蛋黃蓮蓉月，仲有五仁、雲腿、廣式、潮式月餅，樓主更稱「夾埋好似15盒，60個」。

Photo from Facebook 截圖

網民擔心健康

唔少網民睇完之後都覺得場面超壯觀，未見過咁多口味嘅月餅，更加笑言食哂一盒月餅已經係活受罪，仲要食17kg簡直係地獄式折磨！有網民就質疑樓主一家點樣食哂60個月餅，又指樓主爸爸年紀都唔細，唔適合食高油分又高膽固醇嘅月餅，要淘嘅不如淘多啲茶好過，樓主就回應其爸爸自言「有quota」、「可以食埋今年」，又澄清所有月餅都係自用，「唔會送畀朋友親戚同事」。

Photo from Facebook 截圖

樓主表示唔驚中伏

有網民就擔心淘寶食物欠缺監管，加上運送過程經過好多地方，夏天食物又好易變壞，表示「新鲜都變臭」、「食嘅永遠唔會淘」，又指「人哋唔敢食落嚟（香港）買，你調返轉上去（內地）買」，質疑淘寶月餅會有食品安全問題。樓主後來一一回應網民疑問，佢表示食過後覺得內地都有高品質嘅良心食物，不過佢亦都形容淘寶月餅「食到d古怪月餅，只係自己攞嚟，唔同層次既要死，梗係死係自己手上。」試過咁多盒總會有一兩盒中伏！

Photo from Facebook 截圖

樓主又話爸爸唔係因為「貪平」先係淘寶買月餅，「唔係因為小弟無畀家用，而導致家人要淘食物過日」，面對有網民批評，亦笑言「我哋全家智商都好正常，見唔對路或者已經變壞咗嘅，我哋一定唔會放入口」，仲透露爸爸將淘寶技巧「傳授」比母親，稱「老頭傳授埋淘寶技能俾娘親，江湖應該又有一場腥風血雨！」令網民都擔心樓主父母淘得太多食物﹐變成過分囤積。

Photo from Facebook 截圖

為回憶兒時味道

樓主後來解釋爸爸係淘寶大手買入咁多月餅嘅原因，「佢年年都好期待中秋，好多都係佢細個嗰陣時食過嘅，香港已經絕咗迹，無人再做」，原來好多月餅係香港已經無得買，加上香港人更加鍾意創新口味嘅月餅，就算有相關口味都賣得好貴，只得淘寶先仲有樓主爸爸兒時嘅月餅味道，難怪佢咁沉迷，仲有網民笑稱「溫馨提示：戒淘寶癮仲難過戒煙癮！」更有網民認為「最緊要老人家洗錢洗得開心，買得開心。」