ViuTV推《造型師大賽》193擔正 網民讚終於有時裝節目 建議許廷鏗造型師參賽?

ViuTV嘅《尾二一屆口罩小姐》即將進入總決賽，而Viu已經為下個節目做準備，黎緊將會舉行新嘅選秀節目《造型師大賽》！以時裝同潮流文化作賣點，仲有ERROR嘅潮人193郭嘉駿做主持之一﹐唔少網民都表示期待！

Photo from ViuTV Facebook

新節目《造型師大賽》

自MIRROR紅館演唱會嚴重事故後，MIRROR 12子都要停工兩個月，ViuTV抽起唔少同MIRROR有關嘅節目﹐仲停止更新近一個月，最近終於進行新節目嘅大型招募，節目暫名為《造型師大賽》，仲由ERROR成員193郭嘉駿任主持之一！ERROR 4子近日一齊主持《尾二一屆口罩小姐》引起唔少討論度，今次節目更加開正193嗰範！

Photo from IG＠error.weare

Photo from IG@deniskwok193

熱愛時裝就可參賽

參賽者方面，今次比賽參加者嘅經驗不拘，背景、職業不限，就算係學生或全職媽媽都唔拘，只要熱愛時裝就可以參加，相當自由。冠軍更會獲得與不同藝人合作嘅機會，並透過節目正式加入造型師行業，相信反應會非常熱烈。

Photo from IG@deniskwok193

網民讚好終於有時裝節目

節目消息一傳出後獲得網民一致讚好，認為香港終於都有節目講時裝同潮流文化，更笑言ViuTV嘅女團COLLAR多次被指造型炒車，根本先係時裝車禍現場，相信可以藉今次機會吸納新人，「換走ViuTV原有嘅造型師團隊」！有網民留言希望唔好再成日有「假素人」玩完又玩，仲有網民推薦早前鬧出「撞衫風波」嘅許廷鏗造型師Ray參賽，仲睇好佢會拎冠軍！

Photo from ViuTV截圖

即睇更多人氣文章：
「中國第一懶人」楊鎖23年躺平人生！長期受父母溺愛導致失去自理能力！
港男中年偷食後生女欲離婚！慘遭二奶拋棄老婆願不計前嫌！因一個原因堅持與老婆分開

許廷鏗演唱會撞衫風波

早前許廷鏗同C AllStar成員King係演唱會撞衫﹐雖然兩位當事人都唔太介意，仲轉發網友畫嘅「撞衫一刻」畫，明顯都唔覺尷尬，仲引起大家都想買呢件衫嘅熱潮！不過許廷鏗嘅造型師RAY就寸爆指對C Allstar完全無興趣，無聽佢地嘅歌更唔會留意佢地，所以唔知佢地係嘉賓，更指覺得許廷鏗著得好睇好多。事件最後由許廷鏗出面道歉，不過網民仍狠批佢態度差，無禮貌又唔識尊重，指佢唔識C AllStar唔緊要，但做人有品德先最重要，應該由佢自己出黎道歉。

Photo from IG@ryu_listic

力捧193比哂空間發揮

網民又表示期待193郭嘉駿做今次節目主持，認為今次節目有193發揮嘅空間，佢係入行前做過時裝買手，Viu更稱呼佢為「九龍灣時裝之鬼」，佢入行後創立自家品牌「LILABOC」，對時裝有認識已經街知巷聞，本身係「潮人」一份子，又有一定綜藝感，由佢做主持真係無搵錯人！

Photo from IG@deniskwok193

193自創時裝品牌

193嘅時裝品牌「LILABOC」店名靈感來自湯漢斯主演的《阿甘正傳》，入面有一句名句「Life is like a box of chocolates」，連logo嘅「火柴人」都係因為呢一套電影而設計。品牌仲係年頭係旺角開設POP UP STORE，引黎唔少「三嫂」幫襯！

Photo from IG@lilaboc.co

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）