吳卓羲爆林峯貪靚最愛照鏡被封為「鏡子怪」背後原因令觀眾好感大增

生活熱話娛樂新聞

By Moon Lam on 08 Sep 2022

Digital Content Writer

內地節目《披荊斬棘2》初開播已經人氣爆燈，仲有唔少揭露咁多位哥哥私下生活嘅相關內容，最近一集吳卓羲（Ron）就大爆林峯超愛照鏡？而任賢齊就發現吳卓羲戴水晶鏈求姻緣！

Photo from 《打卡練歌房》截圖

披荊斬棘相關節目同樣大熱

《披荊斬棘2》除咗舞台表演令人期待，觀眾對哥哥私下生活都好有興趣，所以相關衍生嘅節目都非常受歡迎，例如《打卡練歌房》就係邀請各位哥哥黎練歌房，除咗揭露哥哥的底下嘅面貌，亦會挑戰唔同項目取得「音符」，各位哥哥都為解鎖福利施展渾身解數！

Photo from 《披荊斬棘2》截圖

吳卓羲戴水晶求姻緣

今集內容延續上星期，吳卓羲、林峯、任賢齊、張峻寧繼續在「打卡練歌房」玩遊戲傾偈，Ron拗手瓜輕鬆嬴哂三人，不過就比任賢齊發現佢手上戴住水晶手鏈，任賢齊問係咪求姻緣嘅水晶，吳卓羲都大方答係。

Photo from 《打卡練歌房》截圖

近年與菊梓喬傳緋聞

吳卓羲入行至今緋聞多多，更有「花旦殺手」稱號，而近年就同女歌手菊梓喬（Hana）傳出緋聞，有指男方帶家人一齊捧Hana場睇表演，而女方更多次出入男方屋企，不過Hana就回應話「唔係去搵佢」，亦避談吳卓羲參加《披荊斬棘2》，似乎想對感情事保持低調。

Photo from IG@hana_kuk

溫兆倫最多嘢講！

後來4人談及32位藝人入面邊個「最話癆」，佢地4個都一致同意係溫兆倫，任賢齊更直言佢好多嘢講，不過唔係好快好密咁講，而係語速慢、聲音小，眾人仲開始模仿佢講野。而張峻寧更笑言有次大家係宿舍一齊同溫兆倫傾偈，可能佢講野有啲慢又細聲，大家都睇準契機出去，但佢醒覺得太遲，想離開個陣同溫兆倫對到眼，結果只好乖乖地坐低聽佢講嘢，非常搞笑。

Photo from 《打卡練歌房》截圖

網民惜溫兆倫被淘汰

不過公演後要係最低人氣組別中淘汰人氣最低嘅兩位哥哥，溫兆倫係32位哥哥入面人氣排名31，成為第一個被淘汰嘅香港藝人。佢自己表示無唔捨得，自己已經留低咗美好嘅回憶，相信咁多位哥哥都未必再有機會聽大師兄溫兆倫講嘢啦。唔少內地網民就到溫兆倫微博表示不捨，希望有機會可以令溫兆倫返場。

Photo from 《披荊斬棘2》截圖

林峯貪靚最愛照鏡

而Ron就爆林峯最鍾意照鏡，稱佢為「鏡子怪」，更話：「鏡子就是他的人生！」佢話貪靚無問題，不過林峯就算經過商場電梯，都會捉緊一瞬間時間側身照鏡，仲即場演示林峯嘅動作，場面搞笑。佢亦透露同林峯拍《大唐雙龍傳》時，自己去咗化妝同整頭套，後來搞掂返黎見到林峯仲係到照緊鏡無郁過！林峯急解釋：「我在戲我在練戲，我在練這個表情要怎麼做好嗎！」更表示因為拍戲時無化妝師跟場，所以自己用盡一切會反射到樣嘅物體照鏡，有時拍戲會有餐桌，通常都會有餐刀，自己就會用扁刀當鏡照黎照去！

Photo from 《打卡練歌房》截圖

林峯為節目做功課

其實首次公演中幾位哥哥係房入面閒聊，提到大家對參加類似節目都無經驗，唔太知遊戲規則而困惑，林峯就認真表示要睇第一季節目嘅內容，更指要留意上一季哥哥真人騷部分，直言舞台只係節目嘅一半，觀眾對真人騷先更加感興趣。而節目中明顯睇到Ron相對活躍，而林峯未如Ron一樣放得開同有綜藝感，多數比較靜同一本正經。