台灣客人呻買香港名牌月餅中伏流心月餅變空心月餅網友解釋其實正常?

時事熱話生活熱話

By Moon Lam on 16 Sep 2022

Digital Content Writer

購物時想試新嘢唔多唔少都會「中伏」﹐不過今次竟然係香港知名品牌月餅？有台灣人係網上發文指對香港月餅勁失望，指流心奶黃月餅偷工減料，變咗真係「流心」？有網民就解釋真相！

Photo from 《開心速遞》劇照

台網友分享購買香港月餅

有台灣網友係Facebook群組「Costco好市多商品經驗老實說」發文，指上月底係好市多買咗兩盒香港知名品牌嘅月餅，原價要2249台幣（約563港幣），減去折扣250台幣只需1999台幣（約港幣501港幣），價格並不便宜。

Photo from Facebook群組截圖

切開月餅後超失望！

而樓主係切開月餅後深感失望，指「中間那個洞會不會太誇張，技術不好，功力不夠還是偷工減料？」，又以台灣牌子嘅流心奶黃月餅比較，指台灣月餅雖然蛋黃唔多，至少內餡滿滿，更提到如果唔係其中一盒已經送咗比人，絕對會退貨，狠評：「什麼爛東西？下次絕對不會再買。」

Photo from Facebook群組截圖

兩地月餅比較

從樓主上載嘅照片可見，左邊嘅台灣月餅比較細件，餡料偏實身，似乎無咩流心；而右邊嘅香港月餅較大件，雖然見到中間空咗一個窿，但都可以明顯見到周圍金黃色流心奶黃餡料。

Photo from Facebook群組圖片

流心變空心月餅？

有台灣網民睇完之後覺得香港月餅名不符實，指要改名做「空心月餅」，又指流心奶黃月餅真係「流心」，變咗個窿，直言「名牌是大家追求的，其實沒牌的更好吃」、「除非受贈者指名要這品牌，否則送了有時候反而失禮」，更附上新鮮買滿滿流心餡嘅月餅照。有人更笑言月餅中間空心係為咗要塞紙條，真係跟足傳統！

Photo from Facebook群組截圖

網民指可能擺耐咗

不過有網民就指出左邊嘅台灣月餅其實唔算流心，反而算偷料，「流心月餅右邊比較像，左邊那餡算流心嗎？」，話流心月餅本來就係咁嘅樣。有人就問樓主係咪擺得耐咗，「其實你以為的流心，只是充滿油脂的內餡，放久了油被餅皮充分吸收，就只剩脫油的內餡跟更油的餅皮」，樓主就表示明白，低保存期限內就出現呢種情況令佢無法認同。