香港小姐2022｜《聲夢》學員任港姐競選表演嘉賓唱足成part 網民呻騎劫成演唱會

By Moon Lam on 26 Sep 2022

Digital Content Writer

年度選美盛事《2022香港小姐競選》昨晚（25號）係紅磡香港體育館舉行決賽，時長大約兩個鐘，邀請到天王黎明任獻唱撐港姐，仲有JW、林二汶、草蜢、同《聲夢》一眾學員等嘉賓，不過網民睇完就指聲夢好似騎劫咗個場當演唱會？

Photo from 電視台Youtube截圖

香港小姐50周年

今屆《2022香港小姐競選》係港姐50周年金禧誌慶，大會隆重其事係紅館舉行決賽，相隔成12年先再次係紅館舉辦港姐賽事。是次電視台係紅館重金打造舞台，務求重現港姐50年來歷年場景，包括70至80年代嘅利舞臺，90年代嘅機場同90至2010年代嘅紅館。節目一開始由JW同林二汶打頭陣，帶領身穿華麗晚裝嘅19位佳麗出場。

Photo from 電視台Youtube截圖

JW性感搶fo 網民話似歌廳開幕

兩人大唱多首懷舊金曲，而JW身穿超低胸Tube dress晚裝，挑戰性感極限，一出場已經好搶鏡！期間晚裝更愈跌愈低，令觀眾都搶心佢走光！而19位候選佳麗嘅華麗晚裝由名設計師Viola Chan設計，令人目不瑕給，不過可能舞台設計加上晚裝懷舊感太重，有網民就覺得出場有歌廳式開幕感。

Photo from 電視台Youtube截圖

黎明只現身幾分鐘

而今次決賽最具份量嘅嘉賓一定係天王黎明，未現身已經搞足幾分鐘，更加搭住飛機出場，認真大陣仗！而佢現身後獻唱新曲《一生幸福》，並由19位佳麗伴舞，隨即宣布進入10強嘅佳麗，期間有同台下觀眾揮手，仲做埋心心手勢，不過同佳麗就無乜互動。網友表示最期待黎明出場，不過只唱一首歌幾分鐘後就極速走人，亦有網友話首歌太新，黎明亦似乎係「咪嘴」，略嫌唔夠喉！

Photo from 電視台Youtube截圖

聲夢學員齊任嘉賓

決賽仲有《聲夢傳奇》同《聲夢傳奇2》兩屆學員首度合體，一同擔任表演嘉賓，表演環節主題為《夢想》，多位學員一齊重演當年參賽時嘅重要時刻﹐《聲夢》12位學員一齊獻唱《造夢時學會飛行》，後來姚焯菲Chantel獨唱佢嘅成名曲，網民最鍾意嘅代表作《戀愛預告》，然後再由5女唱跳《跳舞街》。

Photo from 電視台Youtube截圖

重演聲夢經典回憶

唱跳完畢就由炎明熹Gigi同5子唱出譚詠麟嘅經典金曲《愛情陷阱》，期間仲重演Gigi獲頒聲夢冠軍嘅一刻，同埋聲夢學員舉行首個演唱會，一同唱出《拼圖》，仲有Gigi參加中港合作嘅節目《聲生不息》唱出《蜚蜚》嘅節錄，而尾聲就由兩屆成員一齊唱出新歌《Hat Trick》，最後先邀請侯選佳麗上台一齊跳舞，成個環節Gigi同Chantel嘅粉絲歡呼聲不斷。

Photo from 電視台Youtube截圖

選港姐被騎劫成《聲夢》演唱會

電視台今次比足機會一眾《聲夢》學員表演，有觀眾表示「回憶返哂黎」，大讚咁多合學員都有進步，更表示電視台係咪藉呢次機會預演《聲夢》將會搞演唱會；不過《聲夢》係港姐嘅嘉賓表演環節唱足一part節目，仲要係最後先邀請應屆港姐露一露面現身伴舞，淪為配角！有網民就認為港姐競選慘被騎劫，變成《聲夢》演唱會，就連Gigi都係台上講過：「我又點諗到會同聲夢嘅其他學員學第一次的演唱會。」

Photo from 電視台Youtube截圖

聲夢3小花都想「集郵」黎明

今次《聲夢》學員踏上紅館舞台表演，不過由《聲夢》學員組團而成嘅女團After Class今次三缺一，原來鍾柔美Yumi今次因為屋企有人「中招」成為密切接觸者﹐需要隔離一星期。Chantel、Gigi同詹天文Windy都表示希望可以同天王黎明「集郵」，最希望可以影到相，不過Gigi就直言希望見到黎明真人，但見唔到都唔緊要，仲表示最鍾意黎明嘅《夏日傾情》，而Chantel都透露自己比賽原先都揀咗呢首歌！不過黎明係今次表演中快閃幾分鐘就離開，幾位小花可能要失望而回！