「細細粒」陳嘉佳榮升老闆娘開海味舖首播大賣575萬北上搵銀成功全靠呢個人?

生活熱話娛樂新聞

By Moon Lam on 26 Sep 2022

Digital Content Writer

陳嘉佳（細細粒）近年北上發展，係內地做吃播同帶貨都做得有聲有色，每次直播都有超過一萬人觀看，係抖音更有117萬粉絲，事業相當成功！近日佢更係廣州開咗一間海味舖，榮升做老闆娘！

Photo from 直播截圖

入行十年竟靠吃播發圍

現年37歲嘅細細粒係2012年入行，至今已經有十年，雖然係電視台嘅角色全部都係配角，但憑住出色演技成功入屋，近年佢轉往內地發展非常成功，不過並唔係拍劇拍廣告成為內地一線藝人，而係做吃播同帶貨做到大紅大紫，收入自然同係電視台差一截！

Photo from 《老表，你好Hea》截圖

海味舖近日開張

細細粒嘅海味舖開張，從影片中可見細細粒身穿淺色旗袍，襯埋珍珠耳環同珍珠頸鏈，再加上精緻妝容，可謂貴氣十足。海味舖內擺滿花膠、燕窩等名貴乾貨，細細粒仲請埋舞獅隊表演助興，場面非常熱鬧！榮升做老闆娘嘅細細粒亦親手為舞獅點睛，同埋進行剪綵儀式，睇得出細細粒真係好開心呀！

Photo from 直播截圖

因內地禁暴飲暴食轉賣乾貨？

早前有傳內地將會禁止主播係直播中暴飲暴食，相信以吃播為主嘅細細粒都會受到一定影響，更可能無法繼續以吃播吸引觀眾，或因此萌生開乾貨舖嘅念頭，佢仲拍片帶觀眾睇山珍海味，包括花膠、燕窩、海參、冬蟲夏草、藏紅花等，仲話觀眾有睇啱可以同佢講，等佢為大家安排入貨呀！

Photo from 陳嘉佳抖音

首次直播邀請3大嘉賓

而細細粒都相當有商業頭腦，店舖開張就請黎王祖藍、苑瓊丹、鄺文珣為細細粒嘅「陳氏滋補乾貨行」嘅第一次直播助陣，幾位嘉賓都係內地發展嘅香港藝人，實行線上、線下雙管齊下嘅銷售模式，成功吸引超過123萬人觀看！銷售總額更超過552萬人民幣（約港幣575萬），成績相當唔錯！

Photo from 直播截圖

成功全靠王祖藍？

是次細細粒邀請到王祖藍亦引起網民關注，王祖藍係內地除咗有知名度更有影響力﹐正常會非常「難請」，但今次竟然出席細細粒嘅直播。事實上兩人關係一直好好，王祖藍更加係細細粒嘅「恩人」。

Photo from 直播截圖

王祖藍一手提攜

2009年細細粒曾經參與演出王祖藍主演嘅電影《矮仔多情》，兩人因此結緣，後來王祖藍邀請細細粒參加當時福祿壽嘅相關演出，令佢受電視台賞識獲簽約，後來又一直提攜細細粒，係《老表》系列為佢安排唔少戲份。王祖藍同曾志偉係2016年合資成立手工藝創作，係香港同北市都設有工作室，佢又同細細粒簽約同帶對方北上發展，細細粒成功可以話多得王祖藍！