英國男收留烏克蘭美女後私奔，相處4個月提分手！最新近況公開大快人心

時事熱話

By Jennifer on 28 Sep 2022

Digital Editor

今晚食乜餸：小二，嚟一碟花生！

英國男子Tony收留烏克蘭難民Sofiia後生出情愫，拋棄8年感情嘅妻女與第三者私奔，不過兩人相處未夠5個月就分手收場！Tony前女友Lorna得知消息後亦表示「完全唔意外」，唔少網友都表示「大快人心」～

Photo from 《The Sun》

英國男Tony收留烏克蘭難民Sofiia

俄羅斯烏克蘭衝突持續，好多烏克蘭民眾都離開生活多年嘅故土，前往歐洲其他國家定居。喺今年5月外媒報道有一名英國男子Tony於社交網站向難民提供幫助，認識咗來自烏克蘭基輔嘅女子Sofiia，並安排佢喺自己屋企住。

Photo from 《The Sun》

Tony本身有伴侶Lorna，佢哋更育有兩個女兒，一開始Lorna唔同意收留難民喺屋企住，但Tony堅持咁做，最終Sofiia獲得簽證，入住Tony同Lorna嘅家，估唔到呢個決定竟改變整個家庭。

Photo from 《The Sun》

Tony與Sofiia相識10日決定拋棄妻女私奔

喺10日之後Tony決定同Sofiia離開與女友Lorna、女兒同住嘅家，兩人搬到出去同居。為相識10日嘅女子拋棄相戀8年嘅女朋友同一對年幼女兒，事件引起全球網民關注，男主角Tony同「第三者」Sofiia坦承互相一見鍾情，佢哋私奔後Tony更打算幫Sofiia申請永久簽證。

Photo from Sofiia IG

Tony、Sofiia私奔4個月近況公開

唔少人都對呢一對戀人嘅行為感到不屑，認為佢哋十分自私。不過事隔幾個月Tony同Sofiia嘅近況又再次掀起網民熱議！根據英國《每日郵報（Daily Mail）》報道，Tony同Sofiia交往4個幾月後，近日兩人終於分手！

Photo from 《Daily Mail》

Tony接受《每日郵報》採訪，透露同Sofiia喺呢4個多月相處間發生嘅問題。Tony表示呢幾個月已經受夠Sofiia嘅不理性行為。Tony指佢曾經想拉近女兒同Sofiia嘅關係，並為呢段關係作出好多努力，但Sofiia經常情緒失控。

Photo from 《Daily Mail》

分手全因Sofiia情緒不穩？！

Tony表示日前佢哋喺屋企慶祝佢30歲生日，Sofiia竟然再次失控，用刀破壞牆壁，令Tony不得不報警求助，佢更直言擔心自己安全，並向Sofiia提出分手。對方事後不停聯絡佢想挽回呢段感情，不過Tony似乎十分決絕，並指佢哋已經「100%玩完」，有指Tony將Sofiia趕出家中，斥佢只顧飲酒。

Photo from 《Daily Mail》

Tony稱佢畀過好多次機會Sofiia，雖然兩人唔再係戀人嘅關係，但佢會聯繫當地議會同內政部，希望可以搵到一個地方畀Sofiia重新安置，又試過聯系Sofiia嘅媽媽，等佢情緒可以穩定落嚟。

Photo from 《The Sun》

Tony拋妻棄女後破產、打官司

兩人嘅愛情最終分手收場，不過喺當初亦曾經轟轟烈烈，唔止雙雙私奔，更暢談未來，打算生兒育女組織家庭。Tony當時指想向Sofiia求婚，而Sofiia就表示想做媽媽孕育Tony嘅孩子。兩人都曾經幸福過，但分手後就要面臨現實，Tony拋棄伴侶Lorna，兩人更因此鬧上法庭，離婚官司仍在審理中，加上因為「拋妻棄女與第三者私奔」，令Tony備受網民批評，現時更已破產。