林曉峰做配角要求加片酬被嘲 監製寸爆:你紅咩? 50歲迎來事業第二春
林曉峰（Lo）去年因為參加內地綜藝節目《披荊斬棘的哥哥》而爆紅，密密有job接，不過佢近日係訪談節目就坦言曾有一段時間因發展唔順利想離開娛樂圈！
Photo from 《追夢人之疊彩人生》官方微博
做配角留下深刻印象
現年51歲嘅林曉峰（Lo）佢近日係節目《追夢人之疊彩人生》分享，佢指自己當年拍過幾部電影，例如《金枝玉葉》、《古惑仔之人在江湖》，電影中嘅角色雖然多數都係配角，不過就成功令觀眾留下深刻印象。
Photo from 《追夢人之疊彩人生》官方微博
想加片酬被嘲
眼見自己有少少成績，所以同監製商量加片酬，不過製作人拒絕之餘仲冷言嘲諷：「你覺得你紅咩？你仲係當初嗰個人，所以就唔使同我講呢樣，加咩費用，走走！」對方嘅冷言冷語雖然令佢好受傷，不過亦係呢番說話令佢更加清楚自己嘅定位，所以要成功只可以靠自己。
Photo from 《追夢人之疊彩人生》官方微博
出身演藝世家
佢提到自己事業有段時間發展得唔順利，雖然出身演藝世家，舅父係狄龍，胞姊係著名經理人林珊珊，而哥哥係著名DJ林海峰，相比之下阿Lo嘅發展的確比較遜色。 不過佢堅持唔靠家人幫忙，佢表示母親教佢就算係兄弟姊妹都唔好去靠其他人，畢竟人生係自己嘅，唔好靠其他人幫忙，就算成功都唔會有成就感。
Photo from 《追夢人之疊彩人生》截圖
獲「獎門人」鼓勵重拾信心
講到觀眾對佢最深刻嘅印象多數都係《獎門人》中其中一位長老，而2007年佢的確曾經想退出娛樂圈，當時亦都係「獎門人」曾志偉嘅一番說話令佢重拾信心，繼續努力。曾志偉曾經鼓勵佢唔好放棄，如果有勇氣去放棄嘅話，將呢份勇氣放係而家嘅工作，令阿Lo覺得好有道理，於是就繼續工作。
Photo from 《追夢人之疊彩人生》截圖
北上發展人氣急升
2020年9月，林曉峰同前妻康子妮離婚後，阿Lo就開始北上發展，係內地拍咗唔少綜藝節目，吸納內地觀眾。而去年參加內地真人騷《披荊斬棘的哥哥》，同好友陳小春、謝天華同埋張智霖、梁漢文組成「大灣區哥哥」，又一齊主持衍生嘅節目《大灣仔的夜》，一班哥哥都人氣急升，而阿Lo更被邀請做春晚嘅嘉賓主持。
Photo from 林曉峰 微博
歌喉被網民大讚
因為《披荊斬棘的哥哥》不時有唔同表演，就算唔係唱家班出身，阿Lo亦不時有機會大展歌喉，唔少網民都話佢有做歌手嘅潛質，仲同陳小春係唔同節目中獻唱，被大讚為「靚聲王」、「聲底厚」、「把聲好溫柔」等等。
Photo from 《披荊斬棘的哥哥》官方微博
獲邀請上《聲生不息》
可能就係因為網民嘅聲音，連歌唱節目《聲生不息》都邀請埋佢，不過靚聲還靚聲，要同其他歌手競技網民都表示「搲晒頭」。佢亦係宣傳片中自述：「入行三十年，每一次演出都係重新出發」，佢曾經翻唱哥哥張國榮嘅金曲《今生今世》飽受負評，但節目播出後就有網民覺得佢嘅歌聲唔輸職業唱將，令人刮目相看。
Photo from 《聲生不息》截圖
獲頒最受歡迎男歌手
因為節目中嘅表現相當唔錯，惠州舉行嘅《新音樂榜2022原創嘉年華》頒發「最受歡迎舞台演繹男歌手」比林曉峰！對於至今都未有個人原創曲嘅佢黎講，呢個獎項係佢作為歌手嘅認證呀！佢得到獎項後仲話好快會有第一首個人原創曲！
Photo from 新聲力量集结號 微博
一早有機會做歌手？
參加完歌唱節目，自此林曉峰除咗係主持同演員之外，又多咗個歌手嘅身份，不過原來佢早年已經有機會做歌手，佢表示係初出道時已經有唱片公司比過合約佢，不過當時嘅觀眾同潮流都偏向偶像型，估唔到兜兜轉轉都係走上呢條路。
Photo from 《追夢人之疊彩人生》截圖
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
