韓國釜山海雲台彩色小列車！日落打卡必到，飽覽180度海景

日韓旅遊韓國旅遊

By Jennifer on 13 Oct 2022

Digital Editor

今晚食乜餸：小二，嚟一碟花生！

終於可以去旅行啦！除咗日本之外，韓國都係唔錯嘅旅行地。位於韓國南邊嘅釜山喺疫情期間都有好多新景點，其中海雲台嘅海岸列車、天空艙都可以180度欣賞無敵大海景！天空艙係一架架唔同嘅顏色嘅小纜車，打卡必坐！

韓國釜山海雲台藍線公園

自從政府實施咗「0+3」，以及多國陸續開關之後，唔少香港人都開始重拾幾年前去旅行嘅熱情！不過疫情持續近3年，呢段時間內好多地方都新開咗唔同嘅景點，大家不妨參考下～

韓國釜山有一個必去嘅景點—海雲台，好多韓國電影都喺呢度取景，而去到釜山，海雲台嘅海景的確係遊客必睇！2020年年底開通嘅「海雲台藍線公園（Blue Line Park/해운대블루라인파크）」成為近年當地嘅熱門景點之一！

彩色單軌小列車—天空艙

藍線公園係由長達4.8公里嘅舊鐵道改建而成，喺韓劇《現正分手中》都有喺呢度取景！遊客可以選擇搭海岸列車，或天空艙欣賞海景，海岸列車外型比較復古，就好似鐵路火車一樣，來往尾浦、青沙浦、松亭等景點，全長4.8公里。

Photo from 《現正分手中》劇照

至於天空艙則係喺7~10米寬嘅空中軌道運行嘅單軌車廂，中間唔會停站，全程約為25分鐘。天空艙比較受年輕人歡迎，全因可以喺空中欣賞到海景之外，更係打卡嘅好地方～天空艙每個車廂都係唔同嘅顏色，有紅、黃、藍、綠四種顏色，遠睇就好似一列彩色啲小火車咁。

打卡必到青沙浦站紅綠燈位，超似男兒當入樽平交道

天空艙每個車廂最多可乘載4名成人，仲有1～2人、3人嘅車票選擇，適合閨蜜好友、情侶、一家大細乘坐，可以從車窗外欣賞到釜山沿岸嘅海景，而且獨立車廂都夠晒私人空間，好chill！日落時分景色更美～

除咗可以搭海岸列車或者天空艙外，藍線公園入面仲有其他打卡位。終點站「青沙浦站」一個紅綠燈位仲同動漫《男兒當入樽（SLAM DUNK）》嘅經典平交道超似，唔去日本鎌倉都可以喺呢度打下卡！

Photo from 《男兒當入樽（SLAM DUNK）》

「海雲台藍線公園（Blue Line Park/해운대블루라인파크）」全年無休
地址：釜山廣域市海雲臺區青沙浦路116 (中洞)

開放時間：
淡季(冬季)11~4月：09:30~18:00
旺季 5~6月/9~10月：09:30~20:00
最旺季7~8月：09:30~22:00
※ 詳細開放時間可能根據現場狀況而有所調整

設施使用費：
【海岸列車】
1回券：7,000韓元 / 2回券：10,000韓元 / 自由使用券：13,000韓元
【天空艙】
1～2人 : 單程 30,000韓元 / 往返 55,000韓元
3人 : 單程 39,000韓元 / 往返 69,000韓元
4人: 單程 44,000韓元 / 往返 77,000원