【元朗賞紅葉一日遊】欣賞大棠紅葉美景＋必吃元朗市中心美食！

嚟到11月尾，好多人都Plan好晒去行山、郊遊同野餐～但小編最期待嘅，一定係去賞紅葉呀！賞紅葉嘅季節通常由11月中至12月尾 — 即係已經開始咗啦！講到觀賞最茂盛繁密紅葉嘅地方，一定非大棠楓香林莫屬！而家搭港鐵巴士K66A就可以直達大棠山道，真係方便又快捷，回程仲途經元朗市中心可以中途落車去掃街?！小編已經幫大家編排好「元朗一日遊」嘅行程，立即跟小編出發啦！
 

#朗屏站月台＋大堂換新裝！

Photo from MTR

前往大棠楓香林，只要搭港鐵去到朗屏站，就可以免費轉乘K66A喇！一嚟到朗屏站，無論月台定大堂，到處都見到好靚嘅紅葉裝飾～標誌住賞楓之旅即將要展開啦！喺B2出口沿行人天橋行兩分鐘就到K66A巴士站，真係好方便㗎！
 

#K66A車廂設計超吸睛！記得同特別版打卡！

Photo from MTR

Photo from MTR

今年K66A「 鐵仔紅葉巴士」換上全新設計，以「元朗賞紅葉」為主題，巴士外觀有鐵仔喺紅葉下瘋狂影相嘅興奮樣，同大家去到賞楓影打卡相嘅情景一模一樣～真係令人超期待呀！特別版K66A巴士仲內外都有紅葉主題裝飾，柔和嘅橙啡Tone真係好有秋天Feel！K66A紅葉巴士今個星期日（11月27日）將開出一班特別班，之後由12月3日至2023年1月15日逢星期六、日及公眾假期全日服務㗎！大家記得Mark低啦！

Photo from MTR

#坐擁全港最多最密集嘅楓香樹！

Photo from HolidaySmart

落咗車沿住大棠紅葉楓香林方向行，大約半小時就會到達楓香林，全程以石屎路為主，沿途都有樹蔭位，仲有廁所同休息亭?～即使行山新手或小朋友都可以輕鬆應付！大家又知唔知，大棠嘅紅葉屬楓香類，係香港原生嘅落葉樹呢？佢哋嘅葉片外形似雞爪，所以俗稱雞爪楓，同日本或韓國秋季旅行時觀賞嘅楓葉不同㗎～所以非常值得前來觀賞！全盛時期整個山林火紅一遍，場面相當壯觀㗎！大家絕對唔可以錯過任何影靚相打卡嘅機會呀！

Photo from HolidaySmart

#乘K66A回程經元朗市中心～齊齊開心掃街！

喺楓香林影咗好多靚相之後，梗係要醫醫肚啦！大家搭返乘K66A回程，仲會途經元朗大會堂巴士站，附近有好多人氣特色美食㗎！一場嚟到梗係要試吓啦！小編一定要推介元朗好出名嘅沙嗲牛肉麵呀～配上爽滑彈牙嘅蟹王麵，掛滿濃稠且充滿花生香嘅醬汁，食過返唔到轉頭呀！鍾意甜品嘅朋友唔好錯過主打泰式煎餅嘅元朗名店，當中嘅香蕉煎餅用咗牛油煎到外皮脆卜卜，加埋香蕉片、朱古力醬同煉奶簡直係Perfect Match！如果想買返啲手信，小編力推人氣小店嘅溫暖牌糯米糍，即叫即做，皮薄餡靚，咬開即爆餡呀～甜度仲要恰到好處?！

Photo from HolidaySmart

Photo from HolidaySmart

Photo from HolidaySmart

睇完小編嘅介紹，係咪好想去元朗賞紅葉一日遊呢？唔好猶豫啦～快啲約埋另一半、朋友或者屋企人，跟住小編幫大家編排嘅行程，一齊出發啦！

Text: HolidaySmart editorial
Photo source: MTR, HolidaySmart
Featured for: MTR

*本文章的圖片均經其本人或其公司授權，其他媒體不得轉載