兩餸飯到會賀公司週年宴，800蚊6盤網民話好食過大餐廳

By Pat on 20 Dec 2022

Digital Editor

兩餸飯係疫情期間嘅「窮人恩物」，價錢平民而且款式多又大份，為打工仔提供住家菜之餘又減輕銀包負擔，因而大受歡迎。但有網民發現臨近大時大節，居然有兩餸飯做到會供各大喜慶日子享用，更有網民於「兩餸飯關注組」出文指就連公司嘅週年宴都選擇用兩餸飯去取締以往常見嘅派對菜式，更指又抵又好食，引起網民熱烈討論。

Photo from Photo from 香港兩餸飯關注組@Facebook

兩餸飯做週年宴

近日就有網民於facebook 群組中分享自己公司嘅週年宴，指跟往常的壽司、Pizza、意粉有所不同，樓主所叫嘅都係日常嘅家常菜，有豬扒、西蘭花、糖醋排骨、咖哩雞、雞翼、肉餅等等，仲有4盒米粉2盒白飯，而且盒盒都份量十足加埋都只需要$800，好食過大餐廳咁話。

Photo from Photo from 香港兩餸飯關注組@Facebook

有唔少網民見到樓主分享之後都忍唔住留言：「好過叫埋d聖誕餐。。沙律。。串燒。。拼盤果d 又貴又唔夠食」、「其實食小菜都唔錯呀～」、「幾有創意丫，好過一圍圍」、「其實仲好，聖誕餐火雞凍盤（沙律，海蛰），湯，串燒飯麵都係咁上下野」、「天氣咁凍其實食呢啲幾開心好食又地道」，更有網民希望樓主可以分享地址，送佛送到西，不過其後樓主亦向網民表示，原來呢6盤食物係供20人食用嘅，有人就隨即表示覺得太少，如果喺屋企食個效果應該會比較適合。

Photo from Photo from 香港兩餸飯關注組

兩餸飯開到成行成市

疫情三年，堂食偶而會被禁止，於是兩餸飯因為「大件夾抵食」就借機掘起，而根據facebook群組「香港兩餸飯關注組」集各區市民資料，直至今年二月，全港已經有超過二百六十家兩餸飯店，其中油尖旺及深水埗最人流最密集，各佔三十二家，屬於全港之冠。

Photo from Photo from 香港兩餸飯關注組@Facebook

網民分享心得

有食兩餸飯12年經驗嘅網民更曾於「香港兩餸飯關注組」分享叫餸心得，聲稱點菜時餸菜可分為「可量化」和「不可量化」，可量化即雞搥雞翼豆腐蒸魚，有特定嘅數目，而不可量化就例如蕃茄炒蛋，粟米魚柳，蒸排骨等等。因為每一次份量都會唔同，建議大家一開頭聲稱食兩餸飯，而且兩樣都必須係不可量化的。當兩款餸已經塞滿飯盒後，你先同佢講「啊！我都係要多個餸啦」，大家就可以要可量化嘅餸菜，佢唔可以因為頭兩款餸嘅份量太多，而減少第三款餸嘅份量，簡單啲講即係硬食，店員點都要畀返足夠份量嘅第三個餸，咁樣一嚟你盒飯就會有「塞爆」嘅效果，但其實食兩餸飯都係基層小市民嘅日常小確幸，可以食到「好食夾大件」就已經可以開心一日，唔知大家又有咩睇法呢？