林敏驄上Yahoo頒獎禮講曾志偉同193搞到場面失控？森美都差啲控唔住場！

美食推介

By Wing Ws on 24 Dec 2022

Digital Content Writer

噚晚嘅《Yahoo搜尋人氣大獎 2022》，林敏驄同劇中囡囡郭柏妍憑《下流上車族》分別奪得「人氣電視男角色」及「人氣急星」獎，但上台領獎嘅時候，林敏驄就不停「搞搞震」，仲攞老友曾志偉嚟講笑，搞到森美都差啲控唔住場！

Photo from yahoo!tv

觀眾婆婆畀like

林敏驄上台嘅時候，突然指住觀眾席一位銀髮婆婆話：「阿婆你都嚟呀？」又問人幾歲，森美就講笑話：「聰哥，你女朋友都唔認得？」婆婆仲走到台前向林敏聰豎起手指公。

Photo from yahoo!tv

獲獎讚Yahoo有品味

攞到獎嘅林敏驄舉起獎座，指：「多謝Yahoo！有品味呀！」、「多謝你哋」，然後森美提起，認為林敏驄被「音樂才華耽誤咗演戲事業」，「（如果唔係，）應該會紅過周潤發」，林敏驄就講笑：「我不嬲都紅過周潤發㗎啦......塊面。」跟住林敏驄同台下觀眾互動，問大家有冇睇《下流上車族》、最鍾意咩角色，森美仲叫返啱先嘅銀髮婆婆問，林敏驄就好抵死咁話：「阿婆你返去等消息啦」、「193喺後台等你，話幫你增高」。

Photo from yahoo!tv

「講真話」兼寸爆老友曾志偉

講到193，林敏驄仲順勢提起老友：「153（曾志偉）有冇嚟先，我見193有嚟」、「我見193眼超超咁。」森美就醒水咁指住林敏驄：「163（林敏聰）有嚟。」不過林敏驄就無理：「193同153有冇嚟，有嘅我揼到佢變143。」仲起勢講多兩句：「佢不得民心，佢做呢個位有咩用，係咪呀？」講完之後全場起哄，林敏聰即笑指：「講真話幾好反應。」搞到森美中間都插唔到嘴，淨係笑，原本諗住轉話題，林敏聰又再講多句：「再嘈揼到佢變133、123，但佢今日嚟唔到。」然後森美終於出手撳住林敏驄叫停佢：「夠喇夠喇。」

Photo from yahoo!tv

銀髮婆婆再度觸目出鏡

然後森美宣布郭柏妍攞獎，林敏驄再次點名銀髮婆婆，森美笑指：「原來佢唔係你初戀情人，係你個女呀？」林敏聰就同婆婆講：「阿女，你有冇睇醫生呀？」

Photo from yahoo!tv

郭柏妍講嘢仲衰過葉念琛？

到郭柏妍講得獎感受嘅時候，林敏驄不時窒佢：「咩鴉烏呀」、「邊個搜尋你呀？你爭人錢呀？」、「你講嘢一嚿一嚿，仲衰過葉念琛（《美麗戰場》導演）啦」，仲寸郭柏妍唱歌「魔音」。郭柏妍都忍唔住用獎座細細力打林敏驄一下。

Photo from yahoo!tv

森美出招「請」走林敏驄

最後，林敏驄提到佢3月會開演唱會，森美就問：「係咪紅館先？」點知林敏聰話：「可能差館喎。」臨走之前，林敏驄諗住攞森美手上揸住嘅稿嚟睇，搞到森美要邊後退出招：「我呢度（手上嘅稿）有個掣，一撳你就彈走，我而家就諗緊撳唔撳。」終於「請」走林敏驄。

Photo from yahoo!tv

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

下流上車族｜林敏驄演技獲網民大讚，收視成績高企！出道40年來首次出演劇集！曾經歷2段婚姻

27 Oct 2022

大台電視劇《下流上車族》現正熱播中，搞笑及貼地嘅劇情成功吸引觀眾，令佢哋創下收視佳績～當中令網民最驚嘆嘅係男主角林敏驄嘅表現，認為佢幽默嘅嘅角色為劇集增色不少，大讚佢演技好！

Photo from TVB

《下流上車族》劇情貼地搞笑

由林敏驄、江美儀、鮑起靜等人主演嘅台慶劇《下流上車族》上星期開始播出，劇情題材夠貼地，描述港人為「上車」而努力工作嘅各種煩惱，成功引起共鳴。劇集亦成功創下收視佳績，有望成為大台今年嘅最佳電視劇！

Photo from TVB

首週收視率成功創佳績！

近日，劇中嘅3位演員仲出演《東張西望》做勢，一開始林敏驄就發揮幽默本色「歡迎大家收睇《東張西望》，我係《東張西望》最新主持人車志明。」仲串爆咁話「《下流上車族》收視已經超過咗《東張西望》我哋一開波就係23.9到而家25.9。」仲揚言若果收視過30點，女演員們就將會著泳裝登場答謝觀眾。

Photo from 《東張西望》

林敏驄感謝2位好搭檔

其實劇情除咗搞笑之外，亦有唔少感人溫馨位，當中影后鮑起靜用日文向親家道歉嘅場面，成功令觀眾感動落淚！林敏驄受訪時亦有感謝2位搭檔，大讚江美儀及鮑起靜係「好戲之人」，亦謙虛表示係因為獲得天時地利人和先能令劇集有好成績。

Photo from TVB

Photo from 《東張西望》

林敏驄係1980年代著名填詞人

現年63歲嘅林敏驄喺1980年以填詞人身份出道，並於1984年《十大勁歌金曲頒獎典禮》榮獲「最佳填詞獎」，為人熟悉嘅作品有《幻影》、《無心睡眠》、《霧之戀》等。1990年初，佢開始與曾志偉合作主持搞笑節目《開心主流派》，成功以幽默嘅談吐及急才深受大眾喜愛～

Photo from TVB

大肚前度去婚禮索取55萬分手費新郎解釋不果被指責新娘霸氣出手平息事件

今次首次出演電視劇，獲網民大讚演技好！

此外，林敏驄亦曾參與電影拍攝及創作，不過今次出演《下流上車族》卻係佢入行40年以來首部電視劇作品！雖然大眾一直以來對佢嘅第一印象都係「無厘頭」居多，但佢成功靠「車志明」一角展現細心慈父嘅面貌俾觀眾睇，令大家喜出望外，演技亦獲得讚賞。

Photo from TVB

林敏驄經歷2段婚姻

林敏驄事業發展一帆風順，但佢嘅感情事就似乎不如工作順利，曾經歷過2段婚姻，而佢亦喺受訪時坦承自己唔適合再婚。盛傳林敏驄同港姐亞軍李美鳳因拍攝電影而擦出愛火花，喺1990年二人仲喺加拿大祕密註冊結婚。可惜婚姻只係維持咗5年就失敗告終，其後女方喺1996年改嫁台灣富商鄭翔中，曾被前夫林敏驄形容係「釣到大龍躉」。