新蒲崗酒樓套餐仲貴過散叫，樓主直斥商業不公！網民認為合理？

By Wing Ws on 06 Jan 2023

Digital Content Writer

唔少餐廳都會推出套餐，幫顧客諗埋要食咩，或者畀大家多個經濟啲嘅選擇。不過近日就有街坊貼出自己嘅「中伏經歷」，直斥新蒲崗一間酒樓單點食物嘅價錢仲平過套餐，但網民就似乎有另一番看法。

Photo from 《國產凌凌漆》劇照

一名網民近日於Facebook群組「中伏飲食報料區」發帖，指喺新蒲崗一間酒樓叫咗個售價268元嘅「自選午市套餐」，套餐包括有一份主食、兩份點心及一份小食，而樓主就點咗「籠仔蒜香龍躉頭腩蒸飯」（原價128元）、「海蜇燻蹄」（原價58元）及「山竹牛肉球」（原價26.8元）及「三點炸炸」（原價26.8元）。食完飯臨找數之際，樓主心血來潮諗住計一計啲飯餸原本嘅價錢，點知加埋發現自己嗌嘅食物散叫淨係需要239.6元，平過套餐價接近30元，樓主亦指：「如果我叫星洲炒米就差價$70」、「（兩份點心）改叫兩個大點都是平過套餐價」，大指套餐「匪夷所思」、「好誇張」。

Photo from Facebook群組中伏飲食報料區

於是，樓主就此事詢問侍應，但對方竟指：「套餐係貴D」，而他們點的套餐亦「冇辦法，不可void單打散再入」，因為「公司會以為他們（酒樓員工）自己落格」，相關回應令樓主非常不忿，他指：「最後要好嬲好嘈好憤怒才免了2位茶（位錢）」，而酒樓侍應則表示，茶位錢「不可一位都不收」。同時，樓主亦以WhatsApp投訴，「要求他們立即抽起個套餐或改價錢，以免更多人中伏」，「但結果更激氣，一句道歉都沒有！」

Photo from Facebook群組中伏飲食報料區

「散叫平過套餐」唔罕見？

帖文引起網民討論，有唔少網民指出呢種情況其實唔罕見：「一向散叫平過套餐，除非套餐內有中上價嘢，否則散叫喇，仲可以有筆直叫多樣餸」、「有時M記都會咁」、「其實有啲地方真係套餐貴過散叫，以前返中環上環嗰啲酒樓商務套餐都貴過散叫」。有網民就分析：「『套餐』係平啲（呢個）只不過係一廂情願諗法，幫你揀埋唔使攞計數機計已經係服務嘅一種」，並補充：「好似去超市買紙包檸檬茶，有時9包裝除開會貴過6包裝除開，又係捉人覺得買多實平啲嘅心理」。亦有人指出：「套餐平過散叫係先入為主吧」、「套餐只係比有選擇困難的人，同價錢係無關的」。

Photo from Facebook群組中伏飲食報料區

網民buy「散叫平過套餐」係正常？

有人質疑樓主投訴只係唔抵「爭廿幾蚊」或侍應只免2人茶位錢嘅做法，樓主留言澄清：「其實，我都是投訴套餐設計有問題，我只差$30，但最大差價應有成百元....設計嗰D人立心不良！」有網民表示撐樓主，認為：「套餐啲材料餐廳可以預備多啲、有啲野可以整定，所以會經濟啲吸引啲客叫。有時係促銷貴食材的策略。」不過，樓主亦指出，原來有唔少人覺得「套餐價錢唔一定平過單點」係正常，但他認為：「其實習慣咗就接受咗D不公平事！對朋友家人妥協係包容，但對商業不公真的要爭取」。

Photo from Facebook群組中伏飲食報料區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

港女食Omakase埋單$2028呻中伏，不滿食材廉價有魚蛋蘿白、賣相參差

16 Dec 2022

近年香港唔少日式餐廳都有做Omakase，雖然價錢偏貴，但仍十分受歡迎！最近有網友喺網上分享佢去食Omakase，2位埋單$2028，但食材卻相當普通，佢質疑根本唔值呢個價錢，掀起熱議。網民紛紛表示其實賣相都好一般！

Photo from 劇照

蔡瀾曾指Omakase「搵笨」？！

蔡瀾曾表示Omakase「當所有客人是笨蛋」，一度引起網民共鳴，不過都仲有好多港人會食Omakase。Omakase主打由廚師發辦，一般Omakase嘅份量唔算多，但食材多數都十分矜貴，因此價錢亦唔便宜。

Photo from 劇照

網民食Omakase呻中伏：食材廉價＋賣相參差

近日有網民喺Facebook群組「飲食黑店大全(全港食店質素關注組)」發文，佢表示去咗食串燒omakase，收$888每位，其實呢個價錢喺Omakase十分正常，但食材卻令事主非常不滿。

Photo from Facebook群組「飲食黑店大全(全港食店質素關注組)」

事主發帖稱：「完全無水準之餘，食材全部唔係上等食材，伏中之伏」，從佢公開嘅相片嚟睇，呢餐有疑似串燒鯖魚、雞翼等，但的確唔見有咩矜貴食材，其中仲有蘿蔔魚蛋、烚蛋加釀冬菇等「平民菜式」，隨即引起網友熱議。

Photo from Facebook群組「飲食黑店大全(全港食店質素關注組)」

除咗菜式夠「貼地」之外，網民亦指唔少菜式賣相十分一般，白子、蜆、蠔等感覺唔新鮮，仲有一碟疑似係「咖喱魚蛋」嘅菜式，甜品係紅豆牛奶布丁加燒菠蘿，事主表示：「埋單$2028/兩位，我究竟食咗啲乜？」、「全程加埋甜品total 12樣嘢，$200/位都唔值。吃了個教訓」

Photo from Facebook群組「飲食黑店大全(全港食店質素關注組)」

網民：200蚊放題仲好餸

唔少網友同情事主：「食200蚊放題都好餸過依到」、「去日本，厨師當你係貴客，在香港，厨師當你係羊牯」，有網民發現事主仲叫多咗礦泉水，收費$68，直言「好貴」！有網友認為Omakase應提供埋飲品：「另外一個亮點係咪嗰支礦泉水，人頭成九百幾連水都冇杯？」事主則回覆稱佢食飯習慣叫返支sparkling water，同餐廳無關。