莊錠欣被狂迷當正係女友感困擾！相隔3年終返港，超興奮變「遊客」周圍打卡

By Jennifer on 10 Jan 2023

Digital Editor

今晚食乜餸：小二，嚟一碟花生！

莊錠欣（Elkie）係韓國女團CLC前成員，組合解散後佢就留喺內地發展。近日佢喺IG Story警告狂迷唔好再騷擾佢同家人朋友，否則會考慮公開對方身份資料！喺內地發展3年嘅Elkie近日終於回港，更到處打卡留念，睇嚟都好掛住香港。

Photo from CLC IG

前韓國女團成員莊錠欣解約後留內地發展

莊錠欣（Elkie）本來係TVB童星出身，2015年Elkie於韓國經紀公司Cube娛樂嘅海外公開選秀合格後成為練習生，2016年加入韓國女團CLC，獲封「港產韓星」！不過Elkie所在嘅組合CLC於韓國樂壇發展一般，終於佢喺2020年12月25日經內地律師事務所向Cube娛樂提出解除專屬合約，2021年Cube娛樂與Elkie嘅專屬合約正式終止，隨後Elkie亦退出CLC。

Photo from 莊錠欣微博

Photo from CLC IG

Elkie解約後就一直留喺內地發展，Elkie有推出過合作曲、出演內地綜藝節目及電視劇等，但曝光率偏低，未有咩代表作。沉寂多時嘅Elkie近日突然喺IG Story發出警告，嚇親唔少fans！

Photo from 莊錠欣微博

自爆被狂迷騷擾，Elkie警告會公開資料

Elkie：「請停止騷擾我跟我的家人朋友，真的不布望要到公佈你身份資料的地步，給自己個機會好嗎」，似乎已經忍無可忍！據悉Elkie一直都被一位狂迷DM騷擾，該狂將Elkie視女朋友，無論Elkie去到邊都要DM、留言問個究竟，更開始DM埋Elkie嘅朋友，令Elkie認為唔可能再坐視不理。

Photo from 莊錠欣IG

Photo from 莊錠欣微博

莊錠欣闊別3年回港，竟變「遊客」到處打卡

因為疫情關係Elkie已同家人分隔兩地多達3年，早前佢終於回港過聖誕，而一到香港Elkie就急不及待周圍打卡，佢去咗大澳，仲排咗2個鐘頭買雞蛋仔；又去中環打卡食Bakehouse；仲上山頂睇夜景添！

Photo from 莊錠欣IG

離開香港3年嘅Elkie一返港即連續幾日post相，應該係十分興奮。之前Elike曾表示希望疫情緩和後可以返TVB拍劇，更指想同馬國明合作，飾演佢妹妹，唔知未來會唔會有機會見到佢哋一齊拍劇呢？！

Photo from 莊錠欣IG

Elkie透露將飛台灣發展，與子瑜友誼不再？！

Elkie更向台灣傳媒透露即將飛台灣發展，可能會拍劇同出歌。之前喺韓國出道時Elkie同女團Twice嘅台灣成員子瑜都好frd，兩人經常私下見面，更有唔少合照。子瑜推出寫真集時，Elkie作為好友都有份大力宣傳。不過Elkie同韓國公司解約留喺內地發展時卻被網友發現佢已將同子瑜合照全部刪除，兩人友誼現況成謎。子瑜作為台灣出身嘅韓團成員，深受台灣Kpop fans愛戴，未知Elkie刪走子瑜合照一事會否影響佢喺台灣網友心目中嘅形象？！