日本票選牛丼連鎖店Top3！第1位種類／地點／價格成取勝關鍵！

By Wing Ws on 02 Feb 2023

Digital Content Writer

相信唔少人都鍾意食牛丼，作為呢類連鎖店嘅招牌料理，各家味道各人各有所愛﹐更有日本人會強調自己係「吉野家派」、「食其家派」或「松屋派」等牛丼連鎖店派別。上年12月，LINE以手機嘅LINE research，以10～60代嘅男女為對象，調查佢哋「最鍾意嘅牛丼連鎖店」，以及鍾意嘅理由。唔知Top3又會唔會係你心目中嘅排名呢？

Photo from PressLogic

第3位：松屋

作為港人期望可以進軍香港嘅餐廳之一，松屋排第三位，整體有1成人選擇為「最鍾意嘅牛丼連鎖店」，男性嘅佔比較多，當中，30代男性佔最多比數（19.6%）。鍾意嘅理由前3位包括價格便宜、CP值高及地點方便。

Photo from 【公式】松屋 Twitter

Photo from LINEリサーチ網站

第2位：吉野家

喺香港開到成行成市嘅吉野家，相信大家都唔會陌生。日本國內亦有1000間以上店舖，整體有27.3%嘅人投選為「最鍾意嘅牛丼連鎖店」，男性（26.2%）佔比壓倒性高於女性（19.4%），其中，50代及60代較年長男性均佔4成以上，為該性別年齡層嘅首位。值得留意嘅係，有4成人因為牛肉好食而鍾意吉野家，3成人覺得醬汁好味，亦有2成人係因為就算得一個人去都好方便，睇嚟唔少人認可吉野家牛丼嘅味道！

Photo from 吉野家 Twitter

Photo from LINEリサーチ網站

第1位：食其家(すき家 Sukiya)

食其家係日本擁有最多店舖嘅牛丼連鎖店，日本國內就有1939間，海外有669間（至2022年10月尾）。有34.1%嘅人揀食其家為「最鍾意嘅牛丼連鎖店」，相較第2位嘅吉野家，食其家嘅女性佔比較高，係10～30代及40～50代女性嘅首選，當中，喺10～30代較年輕嘅性別年齡層中，佔比均接近及高出4成。至於鍾意嘅理由佔比都幾平均，分別係牛丼嘅選擇性多（28.4%）、地點（24.4%）、價格便宜（24.3%）、可以揀牛丼嘅大小（20.4%）、牛肉好食（17.7%）。