台灣首架迪士尼主題觀光列車，3大亮點環島乘載夢想出發

By Pat on 08 Feb 2023

Digital Editor

踏入2023年，迪士尼就正式邁向100週年啦！咁嘅盛事又點會無大肆慶祝呢？台灣臺鐵局同易遊網為咗迎接呢件盛事，就重金打造出「環島之星夢想號-迪士尼主題列車」，帶著大人細路嘅夢想一齊出發，而且車上面除咗一般長途列車會有嘅小食區域之外，仲可以喺車上大展歌喉，又有得打卡又有得玩，真係坐幾次先玩得晒啊！

Photo from 易遊網

「環島之星夢想號」作為台灣首架迪士尼主題列車，首度採用金屬質感彩繪列車，為車身油上夢幻銀色，務求令列車充滿未來感，而所有嘅迪士尼經典人物今次全部都會登上呢架列車，同大家一齊環島！

Photo from 易遊網

1）迪士尼人物主題車廂

話明係主題列車又點可以無主題車廂嘅呢？而車廂亦分為四款車廂，第一款就係為商務車廂，分別有8個主題，座椅可以360度旋轉，如果前後有埋朋友仔一齊就唔使擔心兩邊傾唔到偈，而且空間寬又舒適，對腳都唔使擔心要放去邊。由此之外，每款車廂天花板等別隱藏超有心思的細節，另外仲有12個隱藏米奇等乘客自己去發現。

Photo from 易遊網

2）特色活動車廂

話明除咗坐車之外仲可以比乘客舒展筋骨，列車入邊仲特設吧檯車廂，由Chip&Dale做主角，貪食嘅性格喺呢到活靈活現，而且車廂提供飲品無限暢飲嘅服務，可以一邊食著小食一邊休閒地同親朋好友一齊欣賞窗外嘅台灣風光。另外仲有「米奇與好朋友」主題嘅活動室，可以體驗手作DIY之餘，四周圍打卡易相。而最令人期待嘅就係呢一個卡啦OK車廂，有史迪仔陪你，而且仲以台灣夜市老街為場景，仲好貼心地每月會更新歌單，唱完K一落車就可以瘋狂去食，真係諗起都開心！

Photo from 易遊網

3）推出全新環島套票

至於票價就分為「體驗套票」790元（台幣）同13小時限量環島套票每人2,990元（台幣）兩款，並首次推出全新「體驗套票」，內含18個指定段點，每日限量席位，單程乘車券、列車點心、飲品無限暢飲等服務。針對想要體驗一日列車環島的鐵道迷們，完成旅程仲可以獲得「一日列車環島紀念證書」。值得一提嘅係「環島之星夢想號」每日將會提供2班車次，分別以順時針及逆時針方向環台，停靠 20 個站點，第一車次為西部幹線，以逆時針方向運行；第二車次為東部幹線，以順時針方向運行，想去嘅朋友記得留意喇！

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

日本迪士尼小小世界大塞船，網民被迫狂loop世界真細小

Jan 12, 2023

迪士尼「小小世界」向來評語好壞參半，有人話每次入去只係為咗「涼冷氣」、又有人話入去覺得「好恐怖」、更有人覺得入面嘅人偶們好可愛想去多幾次，但無可否認嘅係「小小世界」一早就成為了迪士尼樂園傳統象徵，而區內範圍一直播著世界各地版本嘅〈It’s a Small World〉（港譯〈世界真細小〉）不時會令人叫苦連天，近日又有苦主於社交平台發文指在「小小世界」園區中，等到「恰眼瞓」，仲俾首歌瘋狂洗腦。

Photo from 香港迪士尼樂園

被〈世界真細小〉瘋狂洗腦

最近有網民喺Facebook群組「我真係好鍾意迪士尼分享群」分享一條10秒嘅影片，而樓主亦於文中指「奶野，係小小世界塞緊船，恰咗陣，醒返仲係無郁，完全係屯門公路既感覺，唔同既係有隻it’s a small world瘋狂洗腦中」，片中畫面可見應該唔係香港迪士尼樂園，樓主亦無交代身在何方，但有網民留言就一眼認出影片中係日本迪士尼樂園。

Photo from Facebook群組「我真係好鍾意迪士尼分享群」

而一眾「食花生」嘅網民因為親身感受過，都在笑樓主「今晚係床合埋眼都覺得自己仲係小小世界輪迴梗」、「無啦，全部人既靈魂會懾係啲公仔度」、「係咪大型祭祀活動」、「在迪士尼都感受到屯公風味唔易ga」、「明明大家都係small world 點解日本個到好似靚咁多」、「哩個地方真係好催眠、「小小世界係休息坐ge 地方，如果塞船我會好開心」。

Photo from Facebook群組「我真係好鍾意迪士尼分享群」

「小小世界」傳聞多多

其實「小小世界」一直有很多古怪傳聞，曾有前香港迪士尼員工爆料指某日當機動遊戲在正常運作時，突然間所有人偶及機動擺設都突然停低，連音樂都靜止，突然有遊客於船上尖叫，並稱天花板上出現一個小朋友懸掛喺天花板上，就似「上吊」一樣，好得人驚。事後發現，原來當時所有人偶、船隻及音樂突然停頓，並非受機件故障問題影響，所以唔少人懷疑是係「小朋友吊頸鬼」作怪。

Photo from 網上圖片

除咗有古怪傳聞之外，意外亦曾有發生，去年於美國美國佛羅里達州迪士尼「小小世界」，有小船於航道中被卡住更慢慢下沉，多艘船隻被逼停駛，當時嘅遊客亦被迫聽足一個幾小時嘅〈It’s a Small World〉，事後大批遊客於網上表示足足要用兩個星期先可以擺脫〈It’s a Small World〉嘅陰影。