歐遊10日後與交往10年男友分手，港女提5宗罪：唔得就早日分手！

By Wing Ws on 17 Feb 2023

Digital Content Writer

唔少人都覺得同另一半旅行係一場考驗，日夜相對可以令感情升溫，亦有可能令關係毁於一旦。節目《晚吹-戀講嘢》日前（14日）邀請嘅女嘉賓，分享與交往10年男朋友去歐洲10日旅行嘅經歷，但男朋友嘅態度、行為令女朋友感到不滿﹐甚至令兩人旅行返港後要分手收場。

Photo from ViuTV

曾參加《尾二一屆口罩小姐》嘅Cyndi，日前於節目《晚吹-戀講嘢》上談及與交往10年嘅前男友到歐洲參與共同朋友婚禮嘅經歷，但最終一個旅程令十年關係告吹，當中，Cyndi指出不滿男朋友嘅5件事。

Photo from 《原諒他77次》劇照

1.有問題就推女友出嚟

Cyndi指，男朋友大7年﹐平時係大男人性格，因此旅行時會期望可以依賴另一半，但男朋友搵路、問路、問店員、plan行程等全部推畀女朋友處理。

Photo from 《無法成為野獸的我們》劇照

2.plan行程無參與，去到諸多不滿

男朋友未有參與plan行程，但去到目的地後卻諸多不滿，Cyndi指：「去英國其實都係睇吓白金漢宮、去教堂、睇博物館、食吓tea咁樣，但佢（男朋友）係呢樣又唔好、嗰樣又唔好」，亦未有畀建議。原本想通過旅行製造美好回憶，但由plan行程及其他籌備過程都未有對方參與，令Cyndi自覺缺少旅行嘅樂趣。

Photo from 《春嬌與志明》劇照

3.未有嘗試投入，超掃興

Cyndi認為去旅行最重要係投入及享受旅程中，但男朋友就連朋友婚禮上嘅小遊戲，甚至跳舞亦未有參與，「男女老友由8歲到80歲都跳舞，佢（男朋友）同個阿婆孤零零咁企喺側邊」，都冇去跳舞。雖然男朋友喺香港都唔係積極參與活動嘅人，但Cyndi認為：「去外地旅遊可以放開啲自己去體驗人生、生活。」

Photo from 《想見你》劇照

4.唔關心對方

交往10年嘅男朋友平時係一個尚算細心嘅人，但到外地旅遊期間，男朋友似乎有啲忽略對方感受。Cyndi指，歐洲入夜後天氣轉涼，因未帶夠衫，兩人準備回酒店時：「去到地鐵站口，佢（男朋友）明知我好凍，但佢都要煲枝煙先，我就咁要企喺側邊等佢。」未有關心女朋友。

Photo from 《愛情的溫度》劇照

5.為慳幾蚊，堅持用現金

唔少人去歐洲名店購物會選擇以信用卡付款，但為避免支付外幣手續費，Cyndi指男朋友堅持以現金付款，以致最後一日喺法國兩人見到想買嘅物品時，因唔收信用卡兼身上用晒現金，導致心頭好未能入手。

Photo from 《愛回家》劇照

種種不滿累積，到旅程最後對話亦變少，Cyndi因工作原因提早離開，返到香港後兩人更冇聲氣，關係亦變得冷淡，最終分手收場。Cyndi感悟指：「始終咁多年感情，你以為自己好了解呢個人，覺得好多缺點我都接受咗，但旅行嘅時候真係會放大咗成件事」、「去到『柴米油鹽』見真章嘅時候係唔得嘅話，就勸大家早日放手。」

Photo from 《分手的決心》劇照

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

相識十年一個旅行友情玩完

樓主指最近同一個相識咗十幾年嘅朋友去咗一轉韓國，點知喺旅行嘅途中發現對方原來係一名「超級港女」，仲話「完全覺得呢幾日係比人強姦緊」，返到香港完全無朋友做。旅行嘅過程中好多位都非常難頂，港女朋友經常「大安旨意叫你幫佢睇住個篋」，然後自己走去慢慢行街行成個鐘，當正樓主係工人一樣。

Photo from 《閨蜜》劇照

而且港女朋友心情一差就會唔出聲加全程黑面，樓主一同佢講嘢就好似殺佢全家咁，最後仲話如果朋友睇到呢個帖文，請佢好好反省一下，皆因同佢去旅行真係好難頂咁話，而且事隔咁耐到而家諗返起都仲係覺得好委屈，又指其實平時大家都有傾開計，但係一去旅行真係「見真章」。

Photo from 《閨蜜》劇照

網民指「白痴旅伴」大有人在

有唔少網民見到就覺得身同感受，留言指其實大家身邊都有呢類朋友，更指樓主太善良「我係妳就中途走佬，個篋放喺商場接待處當失物，再傳短訊通知她就算」、「旅行就緊係自己去最開心」、「十幾年以為好好旅行就露出真小人」。

Photo from 《七月與安生》劇照

亦唔少網民都分享自己嘅親身經歷，指「試過同一個未出過國嘅朋友去旅行，點知一上到酒店朋友就叫我洗廁所，因為佢好急，之後同佢講『你急姐，我唔急喎』」，又指朋友係公主出遊，洗廁所都要人幫真係好過份、「10年前中學畢業grad trip，果陣仲未有credit card，同行嘅朋友去到酒店唔肯比一半押金，話比左佢d錢就冇得用來買嘢，結果要我自己一個比曬」，亦有網民留言笑指「女人既友誼好兒戲」、「去一次旅行睇清一個人」、「係咪女人同女人去旅行先會有呢啲事？」