越南富國島成新興旅遊勝地！世界最大龜型水族館開幕！親吻之橋料成打卡熱點！

By Wing Ws on 24 Feb 2023

Digital Content Writer

講到東南亞國家，除咗泰國，越南都係旅行嘅平價之選！可能大家都去過河內、胡志明市等嘅熱門地方，不過大家又有冇去過越南嘅富國島呢？疫情解禁後，富國島成為當地首推嘅旅遊勝地，結合越南特色及娛樂活動，唔止有熱門打卡點，連同新幕嘅水族館，仲有主題樂園、動物園、特色酒店等，可以玩足成個假期，一齊睇吓有咩特別啦！

Photo from shutterstock

必去景點！世界最長跨海纜車

360度全景跨海纜車(Sunworld Cable Car)係世界最長嘅跨海纜車，全長約8公里，單程時間嘅25分鐘。纜車四面都透明玻璃，大家可以走動影相，沿途飽覽富國島嘅美麗海景！

Photo from shutterstock

刺激體驗！世界最長木造雲霄飛車

太陽世界香島自然公園(Sun World Hon Thom Nature Park)係越南最大嘅主題樂園，除咗常規遊樂設施，樂園內有一座世上最長的木造雲霄飛車，乘坐過程中可以聽到木造聲響，刺激感大增！另外，樂園內嘅其他演出都好精彩，夜晚都有表演，大家玩攰咗不妨去觀賞吓！

Photo from Viet Nam News

與野生動物近距離接觸

動物園(Vinpearl Safari)有大量野生動物，除咗黑猩猩、長臂猿等靈長類動物，仲有孟加拉虎、白犀牛等珍稀保護動物，園內仲有200隻鳥類、20多種爬行動物，大家可以選擇搭遊獵車觀看，穿梭於野生動物間！動物園內嘅餐廳仲可以同長頸鹿近距離接觸，亦可以餵食大象、畀樹懶上身等，勁多新奇體驗！

Photo from vinwonders 官網

世界最大龜型水族館開幕！

富國島新開幕嘅「巨型海龜水族館」入口有隻巨型「烏龜」，非常好認！據指，館內有世界第5大水族缸，另有巨型觀景區、玻璃廊道等區域，打卡影相啱晒！呢座水族館有上萬種海洋生物，館內亦有美人魚餵食等表演，一家大細嚟睇就啱晒喇！

Photo from newsunmedia 網站

Photo from vinwonders 官網

勁浪漫～親吻之橋料成打卡熱點

即將完工嘅全新景點「親吻之橋」(Kiss Bridge)將會喺今年3月開幕，全長約800公尺，以牛郎織女為設計原型，最啱喺呢度同另一半留下浪漫回憶！呢條橋未起好已經引起討論，預期開幕後會掀起打卡熱潮，成為富國島嘅代表地標！

Photo from thanhnien 網站

哈利波特般場景——魔法學院酒店

富國島上有唔少五星級度假酒店，除咗「莫凡彼酒店」、「IHG麗晶酒店」以外，最獨特嘅可以話係魔法學院風格「JW萬豪度假酒店」，富國島嘅JW萬豪度假酒店將歐洲學院風，融入每個地方、空間，宛如「哈利波特」中嘅場景，各個建築以唔同學系、院校命名，Check-in就好似新生辦理入學咁，酒店員工會提供「學生手冊」，手冊內介紹咗酒店資料，以及適合大人細路喺酒店內可以體驗嘅「活動上課時間表」。

Photo from JW MARRIOT 網站

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

超獵奇！越南胡志明市「真·佛系」樂園～水上樂園以神佛做主題廣播佛經

9 Jan 2019

去旅行想玩主題樂園大家通常只會諗到迪士尼、環球影城，以「佛」做主題嘅主題樂園你又玩過未？越南胡志明市就有個「真·佛系」樂園，滿天神佛陪你玩遊戲，夠晒獵奇！

呢個佛系樂園叫仙泉旅遊公園（Suoi Tien Theme Park），將佛教概念揉題樂園元素，曾被外媒列入「世界10大另類遊樂場」之一。能夠將咁莊嚴嘅宗教變得咁奇趣，實在神奇！

樂園總面積達105公頃，有機動遊戲、水上樂園、按摩池、迷你動物園、鱷魚池、電影院等區域。全場佛祖、觀音、神獸及十二生肖雕像總有一個喺左近，不過全部係景點嚟，並非用嚟拜神！仲有佛經廣播為你洗滌心靈。

Photo from sayuvanilla318@IG

Photo from thanh.sonder@IG

水上樂園有唐僧、古人雕像「望住你玩水」，令人有份莫名嘅治癒。

Photo from Suoi Tien Theme Park@FB

「打卡位」都好多！除咗大量巨型龍、鳳凰、麒麟雕像，仲有放大版嘅福祿壽、觀音、佛祖等，去到邊都有遍地神佛陪住你。

Photo from Suoi Tien Theme Park@FB

Photo from shutterstock

同時佢又有摩天輪、過山車等機動設施同童話式建築，最神奇嘅係佢仲有個以Harry Potter為主題嘅西式城堡！聽落Cult味十足，但又確係令人耳目一新嘅。

Photo from Suoi Tien Theme Park@FB

鍾意獵奇搞怪或者自命「佛系」嘅朋友，呢個樂園簡直係為你地而設啦！

仙泉旅遊公園 Suoi Tien Theme Park
地址：120 AH1, Tan Phu, District 9, Ho Chi Minh City
開放時間：每日早上8：00-17：30
電話：+84 028 3830 4579
票價：小童60,000越南盾（約港幣$20.3）、成人 120,000越南盾（約港幣$40.6）
網址：http://www.suoitien.com