芭堤雅文化遊提案！3間特色寺廟／泰國文化主題樂園連絕美打卡點！

By Wing Ws on 26 Feb 2023

Digital Content Writer

芭堤雅係泰國熱門度假地，不過講到芭堤雅，除咗陽光海灘、做spa、shopping之外，其實當地都有唔少值得一去嘅文化景點！以下編選咗8項芭堤雅具文化特色景點，等大家去當地旅行嘅時候，可以放入行程中！

Photo from shutterstock

世界最大木雕佛教建築——真理寺

真理寺係世界上最大嘅木雕佛寺，雖說由1981年開始建造至今逾40年仍未完工，但單從建築所睇就非常壯觀！寺廟嘅所有材料都係由唔同種類嘅原木人工雕成，完全冇用釘。由上而下咁望，可以見到真理寺嘅範圍係一個十字架形狀，寺內分為「父母區」、「風火水土神區」、「日月天神區」、「東南亞各國神區」及「佛陀遺骨區」。雖然真理寺係一座寺廟，但同樣可以話一座偉大嘅藝術建築，可以同時感受泰國宗教文化，非常值得一看！

Photo from gulfnews 網站

於四方水上市場感受泰式風情

講到泰國旅行，就不得不提水上市場！相比起其他城市嘅水上市場，由政府打造嘅四方水上市場相對地「商業化」，但環境乾淨、舒適，除咗購買泰式美食、工藝品，大家可以欣賞整個水上市場嘅面貌、建築，感受泰式風情，度過一個悠閒嘅時間！

Photo from Pattaya Floating Market 官網

大象叢林自然保護區——可以幫大象洗泥巴浴

去泰國同大象近距離接觸可以話係一次特別嘅體驗！大象叢林自然保護區係一處可以同大象友善相處嘅地方，官方介紹推廣以道德方式對待大象，唔會涉及訓練、騎乘大象等違反自然保育方式，當然，大家也可以報名參加「大象友善體驗營」，感受大象群嘅生活，仲可以幫大象洗泥巴浴同沖涼，係非常特別難得嘅體驗！

Photo from Elephant Jungle Sanctuary 官網

觀賞泰國微型名勝——迷你暹羅小人國

迷你暹羅係世界第四大微型景觀，去到發現啲「建築」全部都細到行唔到入去參觀嘅時候，唔使太驚訝，因為所有展出都係迷你版！園中有泰國著名文化歷史建築物、名勝古蹟、自然環境等，仲有其他國家嘅標誌性建築，如埃菲爾鐵塔、比薩斜塔、羅馬鬥獸場、自由女神像等，非常適合一家大細過嚟！

Photo from Mini Siam "เมืองจำลอง" FB

拜祭生日星期佛像——天壇大佛寺

位於芭堤雅碼頭附近山頂嘅天壇大佛寺，有一座18米高嘅金色嘅天壇大佛像。寺內有代表禮拜一至日嘅佛像，大家可以拜祭自己出生當天所代表嘅佛，以增加好運。由於大佛寺所處嘅位置較高，喺黃昏嘅時候上山，可以俯瞰芭堤雅嘅城市景象，仲可以見到絕美日落！

Photo from 小紅書

典雅白色寺廟——泰國九世皇廟

泰國九世皇廟建於1976年，係泰王拉瑪九世最愛嘅廟宇，設計上混合印度、日本、中國、泰國及瑞士嘅建築風格，相較其他寺廟嘅宏大規模，泰國九世皇廟以節檢朴素為原則，廟內建築以白色為主色，寺內有舉凡佛殿、方丈樓、僧舍、水池、景觀花園等建築，均非常典雅。

Photo from 小紅書

巨大金佛像——七珍佛山

七珍佛山係芭達雅最大嘅釋迦牟尼佛雕像，用18噸重嘅24K金雕塑而成，相傳佛山中藏有釋迦牟尼嘅舍利子，因此當地居民相信呢度富有磁場及靈氣，亦經常到此祈福。佛山附近就係泰國九世皇廟，大家就可以一同參觀兩個景點！

Photo from 小紅書

泰國文化主題樂園——東芭樂園

有別於其他主題樂園，如果想感受泰國風俗特色，大家可以去東芭樂園遊覽！大家可以到場觀賞泰國舞蹈、泰國拳等傳統民俗表演。除咗表演，大家仲可以觀賞園內特色綠植及奇花異草，仲有唔同動物。更重要嘅係，樂園門票約港幣100蚊起，非常便宜！

Photo from 小紅書

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

泰國最大水上樂園勁多嘢玩！超過70個水上滑梯／遊樂設施／兒童專區，仲有得泰式按摩！

15 Feb 2023

去泰國旅行想玩啲刺激嘅娛樂活動？相信水上樂園會係一個唔錯嘅選擇！羅摩衍那水上樂園(Ramayana Water Park)係全泰國最大嘅水上樂園，有21個水上滑梯同埋超過50種遊樂設施，及2個兒童專區，相信一家大細抑或同朋友嚟玩足成日都唔會厭！

Photo from สวนน้ำรามายณะ Ramayana Water Park FB

羅摩衍那水上樂園係東南亞最大嘅主題水上樂園，佔地約18萬平方公尺。位於春武里府嘅羅摩衍那水上樂園距離曼谷市中心約1個半鐘車程，距離芭堤雅市區只需20-25分鐘車程，附近有七珍佛山、銀湖葡萄園等嘅自然景觀包圍。

有21個水上滑梯及超過50個遊樂設施

園內有21個水上滑梯及超過50個遊樂設施，水上設施有唔同程度嘅刺激體驗選擇，如果想玩輕鬆啲嘅設施，可以選擇蛇形滑梯或螺旋滑梯，如果想要啲刺激感，可以玩有4個直滑滑道嘅皮墊滑梯、將人拋至幾乎與地面垂直滑板嘅衝天回旋滑梯、刺激嘅自由落體等，另有兩個並行嘅過山滑梯，係世界最長滑道！

Photo from RamaYana Water Park 網站

Photo from สวนน้ำรามายณะ Ramayana Water Park FB

3個世界上僅此一個滑梯

同時，羅摩衍那水上樂園有3條其他地方玩唔到嘅水上滑道設施，包括可以慵懒漂流嘅入河滑道、多人乘坐令人腎上腺飆升嘅巨蟒滑梯及水蟒滑梯。如果有機會去羅摩衍那水上樂園，記得要試吓！

Photo from RamaYana Water Park 網站

兩個兒童專區

假如有小朋友同行，都唔使擔心會冇嘢玩！樂園有兩個兒童專區，兒童濺浪樂園有噴頭設施，專為低齡兒童設計；而兒童滑道區有滑梯、水上遊戲及攀登區域，專為3-14歲嘅兒童設計。除咗喺泳池遊玩，小朋友都可以玩一啲陸上設施，例如洞穴或迷宮。

Photo from RamaYana Water Park 網站

陸上設施

羅摩衍那水上樂園同時有唔少陸上設施，例如水上市場、沙地運動場、瀑布等，喺附近仲可以偶遇大象！加上樂園附近就係有綠植青山嘅自然環境，玩攰咗行吓都會非常舒暢！

Photo from สวนน้ำรามายณะ Ramayana Water Park FB

其他設施

樂園有一個可以提供近100種世界各地美食嘅餐廳，仲有一個兒童專屬餐廳，仲有可以提供咖啡、雪糕、雞尾酒嘅酒吧。園內有近40個私人茅屋可供租用，可以同屋企人、朋友休息，亦有泰式按摩服務，十足一個度假村咁！

Photo from Ramayana water park YouTube

RamaYana Water Park
地址：9 Moo 7, Na Jomtien, Amphoe Sattahip, Chang Wat Chon Buri 20250
電話：+66 (0) 3300 5929
開放時間：每日10:00 － 18:00
票價：成人1190泰銖（約280港元）小童890泰銖（約210港元）