彭慧中感TVB欠自己一個交代，高海寧眼濕濕：我都有一年半冇做過嘢

By Wing Ws on 28 Feb 2023

Digital Content Writer

TVB旅遊節目《吃貨橫掃曼谷》本月開播，由高海寧（高Ling）、彭慧中(Phoebe)、陳星妤與林澄光主持，除曼谷特色食買玩，一眾吸睛嘅美女主持至今引起唔少話題。喺噚日（27日）播出嘅最新一集，高Ling邀請彭慧中去到精品酒店一同用餐，談話間，兩人談及於TVB工作感受，當中，彭慧中直認公司欠自己一個交代，高海寧更感同身受指自己都有年半冇做過嘢。

Photo from 《吃貨橫掃曼谷》節目截圖

彭慧中：唔想人哋唔記得我

喺酒店用餐其間，高Ling問到：「我見到網上有人話覺得公司(TVB)爭你(彭慧中)一個交代，你覺唔覺？」Phoebe聞言直認：「好多人都係咁講，我都覺。」隨即補充指只係「爭咗啲嘢」，包括機會，Phoebe表示：「都成12年喇！我真心講句，我覺得自己事業停滯不前。我唔想人哋唔記得我，好容易咋嘛！」

Photo from 《吃貨橫掃曼谷》節目截圖

高Ling眼濕濕：半冇做過嘢

高Ling聽完即眼濕濕，表示感同身受：「我好明白，我都有年半冇做過嘢，啲人喺街度都會話『高Ling好耐冇睇過你嘅電視劇』。」但同時，高Ling認為Phoebe喺事業上值得擁有更多，仲大讚Phoebe好勤力：「例如今次你知道我哋去邊，會事先上網做晒功課，等去到現場多啲嘢講，我好欣賞你呢樣嘢。」

Photo from 《吃貨橫掃曼谷》節目截圖

8年由《都市閑情》做到《流行都市》

現年33歲嘅彭慧中於2010年參加港姐8強止步，無緣三甲，其後獲簽約為TVB藝人，拍攝節目大多為主持工作，亦曾拍電視劇如《愛·回家之開心速遞》、《換命真相》、《溏心風暴3》等，但多為小角，2015年起由《都市閑情》做到《流行都市》，始為人熟知。雖然大多時候只在午間婦女節目出現，但不時以短裙、清涼造型現身嘅Phoebe非常吸睛！獲一眾網民封為「女神」，討論區不時會見到Phoebe上節目嘅CAP圖。

Photo from 連登討論區

Photo from 《流行都市》節目截圖

唔想做令自己個心唔舒服嘅嘢

事實上，喺網絡上受到關注嘅Phoebe都有圈中人戥佢唔抵，年前作為嘉賓參與《野外步出2》拍攝嘅Phoebe，就被方紹聰介紹指：「TVB係嘥咗佢，淨係畀佢做《流行都市》。」問到入行多年感到遺憾嘅事，Phoebe表示：「可能本身我性格唔係太積極，唔主動，我有時都會同其他人比較，點解人哋可以做到呢個位置，點解我仲係咁樣嘅？好似冇乜機會咁。有時我會好『忟』自己，點解唔可以主動啲，我係比較要面子，唔夠膽去做主動，好怕被拒絕，我係一個隨緣嘅人，我唔想去做一啲令我個心唔舒服嘅嘢，我未跨到去嗰一關，過唔到自己。」

Photo from 《野外步出2》節目截圖

疑因曾失落視后萌生離巢意向

現年36歲嘅高Ling同樣通過參選港姐入行，去年思考事業發展去向嘅高Ling，曾北上拍劇集、綜藝後勁賺7位數，令外界猜測佢有離巢意向，當時高Ling亦曾於訪問中提及「考慮緊自己想行邊條路」。有指3年前高Ling失落視后及最受歡迎女角色導致對續約一事心灰意冷。高Ling至去年年尾時方透露，與TVB簽下一份頗長嘅合約，而且開出條件唔錯，更讚有誠意，表示希望未來能與唔同演員、導演合作。相信高Ling日後嘅作品都好受著目！