又飛日本啦～到埼玉縣睇500萬棵赤艷嘅曼珠沙華花海～真係影相打卡一流啊！

一講「曼珠沙華」，80後可能會諗起梅艷芳膾炙人口嘅經典金曲！但今日小編要介紹嘅，唔係梅艷芳嘅「曼珠沙華」，而係位於日本埼玉県日高市嘅曼珠沙華公園！天啊～又係小編最愛嘅花海啊！
Photo from Instagram

曼珠沙華係一種花名嚟～每年嘅9月16至10月1號，500萬棵火紅色嘅曼珠沙華就會盛放，出現一片「赤艷花海」！又係時候plan plan假期，飛一轉到日本東京睇花海影靚相打個卡！
Photo from Instagram

小編覺得曼珠沙華俾人一種好魅幻又帶少少淒美嘅能覺。同好多花一樣，每種花背後都有唔同嘅花語同傳說，咁大家又知唔知曼珠沙華背後嘅傳說呢！？
Photo from Instagram

曼珠沙華亦可以叫彼岸花，呢種花經常生長係石縫裏或者係墳頭上，所以有人會話佢係「黃泉路上的花」！亦有人認為呢種花主要開係黃泉上，好似係冥界三途河邊、抑或係忘川彼岸嘅接引之花！所以曼珠沙華都係冥界唯一嘅花～傳說仲話曼珠沙華嘅花香有喚起死者生前記憶嘅魔力～所以往生者就會踏著曼珠沙華花嘅指引通向幽冥之獄。小編聽完都覺得好sad～而呢種花亦都冇好似玫瑰咁浪漫，向日葵咁陽光～
Photo from Instagram

不過有D人就話曼珠沙華係一種愛情嘅花語，喻意兩個人不再分開～但無論係邊一種傳說，小編都覺得唔重要！重要嘅係曼珠沙華散發出唔同嘅迷人魅力，令好多人都好鍾情於佢！
Photo from Instagram

曼珠沙華係日本東京每一年都會舉行慶典！今年都唔例外，慶典就叫做巾着田曼珠沙華祭。
Photo from Instagram

時間係今年9月16日至10月1日！大家除咗可以係「巾着田曼珠沙華祭」可以睇到好靚嘅曼珠沙華花海之外，唔想咁齋得睇花，你仲可以試吓食當地特色嘅特色小食啊！小編都好想去打卡啊！
Photo from Instagram

仲可以嚟寫生嫁～又可以帶小動物嚟玩下～
Photo from Instagram

Photo from Instagram

大量嘅土產同埼玉縣當地小食～要等我啊！大家如果去東京，唔好掛住shopping，都可以嚟「巾着田曼珠沙華祭」試下～又有得食又有得玩同影靚相～呢次女朋友一定唔會投訴啦！
Photo from Instagram

如果有興趣，仲可以試佢個官網睇睇。
Photo from Instagram

巾着田　曼珠沙華まつり

日期：9 月 16 日至 10 月 1 日

時間：9 am--4:30pm

地點：巾着田曼珠沙華公園

地址：埼玉県日高市大字高麗本郷125-2

電話：+81(0)42 982 0268

入場費：300 日圓（約 21 港元）

交通：西武池袋線高麗駅下車，徒步約 15 分鐘

Text: Holiday editorial
Photo Source： Instagram

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）