網民列出5大獨自出門旅行好處，唔使理旁人眼光/鍾意去邊就去邊

By Pat on 08 Mar 2023

Digital Editor

隨著世界各地正式開關，終於可以再度重拾獨遊嘅日子，以往不時會有朋友問：「一個人去旅行唔會好悶咩？」但對於真正享受獨遊嘅朋友，正正就係因為「一個人」，所以先更加唔會悶。有網友近日就喺連登討論區出文指「一個人去旅行其實從來唔係問題」，指非常熱愛獨自出遊，反而如果同朋友去就會覺得好有壓力，更寫出5個獨遊嘅好處同同路人分享咁話。

Photo from 《愛的迫降》劇照

一）事前準備

「唔會拖, 亦唔會有任何糾紛, 因為係自己決定」好多時去旅行前都會花時間喺搵平機票或者酒店身上，而往往人多意見亦都多，如果負責搵酒店嘅朋友唔好彩搵到一間唔係太乾淨或者地點唔方便嘅，唔多唔少都會引起心中嘅不滿，但如果所有決定都係一個人做晒，就免卻了好多煩惱。

Photo from 《獨活女子的守則》劇照

二）無固定行程

「想去邊就去邊, 唔會有既定行程。」想必有唔少朋友都試過同朋友於旅程中攪到不歡而散，大部分都因為大家想去嘅地方有所不同，出發前會Mark低大家想去嘅地方，再因應路程時間決定要唔要去，但計劃永遠趕不上變化，就算有幾好嘅行程規劃，到最後都未必可以如你所願，然後就會引起好多不必要嘅紛爭。但若果係獨遊就無呢個煩惱，因為唔需要就人，出發前只需要隨便搵幾個想去嘅景點，到達目的地時再隨心按天氣或心情去決定行程，自由度大大增加！

Photo from 《愛的迫降》劇照

三）想食咩就食咩

「從來唔使就其他人, 想食乜就食乜」去得旅行一定都會四圍搵嘢食，但如果同行嘅朋友一個唔鍾意食辣，另一個又唔鍾意食刺身，一場嚟到想食嘅朋友一定都會好失望。如果一個人去旅行，就自己鍾意食咩就咩，若果遇到外國有啲餐廳唔歡迎一個人，就慢慢搵一間可以嘅，天下咁大，一定會有餐廳做你生意！

四）觀光時間自行決定

「自己有興趣既就留耐D, 唔使理其他人會唔會黑面」有時候同朋友去到某啲自己有興趣而對方又覺得悶嘅地方，好多時都未必敢太花時間喺同一個地方上逗留，因為怕會令同行朋友黑面又或者發脾氣（雖然絕大部分會黑面嘅都係女性居多），但若果只有自己一個就無需再擔心身邊會有人唔高興，又或者如果嗰個地方覺得無聊更可以立即轉地方，仲可以去多幾個想去嘅景點滿足自己，令旅程更加完滿！

Photo from 《一日戀人》劇照

五）睡眠質素提升

「去玩既時間多與少, 全憑自己決定」無論男女都會遇到一個睡眠嘅問題，如果唔好彩遇到有鼻鼾嘅朋友，又唔記得帶耳塞，真係可以成晚都訓唔到覺，影響第二日嘅行程，另外有啲朋友亦會要求超早起身出發趕行程，麻煩程度就有如跟團一樣。惟獨一個人去旅行可以想幾點出發就出發，自己決定每日出門嘅時間，就算趕唔到班船/車都唔會比人鬧。

Photo from 《七月與安生》劇照

但其實一個人旅行相反地都做唔到好多嘢，樓主亦唔否認自己一個去旅行係孤獨的表現，但正正因為享受可以獨處嘅寧靜時光，先可以有真正嘅休息。而一眾網民見到帖文之後紛紛都認同樓主所言，更與樓主分享「自己一個人行街，就算行錯路做錯嘢搵錯地方，都冇人會鬧你黑你面，默默地做返啱，Plan A轉 Plan B，從錯誤中成長」、「一個人去個記憶可以維持好耐，因為自己一手一腳plan同搵路，唯一唔好係食嘢無得試多幾樣」、「獨遊會知道內心渴望緊啲咩」

Photo from LIHKG

但亦有網民指獨遊有時候無辦法同人即時分享身邊嘅一切，就算有好食嘅餐廳都唔可以試到太多款式，其實旅行嘅方式可以有千百萬種，揀一個自己覺得最適合又最自在嘅先至係去旅行出發嘅初衷，去到外地感受唔同嘅文化返原居地又可以再次重新出發，無論係同朋友去定同伴侶去都好，將來都會係一個回憶，快樂先係最緊要。

Photo from 《海街日記》劇照

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

十年友情一轉旅行化為烏有，啱做朋友未必啱做旅伴？

Feb 14, 2023

隨著各國旅遊政策放寬，越嚟越多國家開關，世界各地貌似真係開始「復常」，各位旅遊精又可以開始出動！之但係去旅行就同返工一樣，有時候啱做朋友未必啱做同事，去旅行亦都一樣，唔係隨隨便便搵個人就可以一齊去旅行，唔係分分鐘返到嚟反面無Friend做！連登討論區就有位女生最近出文指同一個相識咗十幾年嘅朋友諗住咁多年都未試過一齊去旅行，相約去咗轉韓國返嚟之後即刻疏遠晒，仲話覺得呢幾日好似比人強姦緊咁大鑊！

Photo from 《SUNNY陽光姊妹淘》劇照

相識十年一個旅行友情玩完

樓主指最近同一個相識咗十幾年嘅朋友去咗一轉韓國，點知喺旅行嘅途中發現對方原來係一名「超級港女」，仲話「完全覺得呢幾日係比人強姦緊」，返到香港完全無朋友做。旅行嘅過程中好多位都非常難頂，港女朋友經常「大安旨意叫你幫佢睇住個篋」，然後自己走去慢慢行街行成個鐘，當正樓主係工人一樣。

Photo from 《閨蜜》劇照

而且港女朋友心情一差就會唔出聲加全程黑面，樓主一同佢講嘢就好似殺佢全家咁，最後仲話如果朋友睇到呢個帖文，請佢好好反省一下，皆因同佢去旅行真係好難頂咁話，而且事隔咁耐到而家諗返起都仲係覺得好委屈，又指其實平時大家都有傾開計，但係一去旅行真係「見真章」。

Photo from 《閨蜜》劇照

網民指「白痴旅伴」大有人在

有唔少網民見到就覺得身同感受，留言指其實大家身邊都有呢類朋友，更指樓主太善良「我係妳就中途走佬，個篋放喺商場接待處當失物，再傳短訊通知她就算」、「旅行就緊係自己去最開心」、「十幾年以為好好旅行就露出真小人」。

Photo from 《七月與安生》劇照

亦唔少網民都分享自己嘅親身經歷，指「試過同一個未出過國嘅朋友去旅行，點知一上到酒店朋友就叫我洗廁所，因為佢好急，之後同佢講『你急姐，我唔急喎』」，又指朋友係公主出遊，洗廁所都要人幫真係好過份、「10年前中學畢業grad trip，果陣仲未有credit card，同行嘅朋友去到酒店唔肯比一半押金，話比左佢d錢就冇得用來買嘢，結果要我自己一個比曬」，亦有網民留言笑指「女人既友誼好兒戲」、「去一次旅行睇清一個人」、「係咪女人同女人去旅行先會有呢啲事？」

Photo from 《SUNNY陽光姊妹淘》劇照

港男父母患癌女友拋低佢旅行發文公審女友惹爭議網民批事主要求過分

Jan 5, 2023

面對雙親患癌的重大打擊，一時之間的確難以接受，最近有港男發文指原本計劃同女友去旅行，但近日發現父母患上癌症，事主即終止計劃，抽空陪伴家人，但沒想到女友卻決定拋下自己去旅行，港男大感失落，直言認清女友為人，貼文一出即引起熱話，有人批事主自私，亦有人支持事主，認為女友做法不當。

Photo from 《二月廿九》

港男不滿女友拋低自己去旅行

昨日（4日）一位港男於Dcard討論區發文，題目為「我父母有Cancer 女朋友抌低我去旅行」，他表示原本計劃和女友去旅行，但近日收到一個壞消息，就是其父母雙雙確診患癌，事主隨即打消旅行的念頭，並向女友表示想多花時間陪家人。事主稱女友原本講過會陪他渡過難關，但轉頭跟他說數天後要出發去旅行，事主對此感到傷心，向網民苦訴：「覺得睇清楚佢係咩人」。
Photo from 《我們與惡的距離》

網民批事主自我中心兼要求過分友

貼文公開後即引起熱烈討論，網民意見兩極，有人批評事主自我中心，認為他發文公審女友相當過分：「去過旅行就叫抌低，會唔會太自我中心」、「唔明點解樓主要咁？因為你父母病左所以要另一半放棄自己既生活去遷就你去個旅行都要俾你放上黎公審」同時亦有人指事主為人自私，要求女友放棄自己生活去遷就他「你無得去旅行，連人地都唔可以去？咪咁痴線好喎」、「你女朋友都有自己嘅野想去做架。唔通你父母有Cancer佢就咩開心野都唔可以做？」
Photo from 《瑪嘉烈與大衛系列前度》

Photo from Dcard討論區

有人撐事主認為女友做法不當

另一方面，亦有人為事主平反，指事主得知父母患癌，心情低落，需要最親近的人陪伴亦是正常，認為女友這段時間最好陪在事主身邊安慰他「呢啲moment唔係最應該陪喺男朋友身邊安慰咗佢先第日再去旅行都唔遲？」、「我諗最大個問題唔係另一半喺呢個時候去旅行，而係前一句話會陪住樓主，下一句就話要去旅行樓主會以為女朋友肯陪自己呢段時間留喺屋企人身邊，個落差衝擊真係好大」、「講真你另一半嘅至親啱啱出事仲有心情去玩？如果認真長遠發展，我個下一定好心寒。」

Photo from 《原諒他77次》

Photo from Dcard討論區

過來人分享經歷勉勵事主

有經歷過親人患癌的網民留言提醒事主，向他說明陪伴親人治癌時會面對的困難，該網民表示自己及其父親都有患上癌症，坦言抗癌是長期作戰，作為病人家屬其實也很大壓力，希望事主做好心理準備。同時亦有過來人表示自己女友曾患癌症，直言很多東西都要獨自面對，身邊有人陪你作戰並不是必然的，又指所有東西都會過去，希望事主捱過難關從而成長。

Photo from 《藍色海洋的傳說》
Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

渣男拍拖幾日就借錢呃感情港女呻損失近3萬結果竟然拎得返錢?

19 Aug, 2022

愛情真係令人盲目？有女網友係網上發文，指幾個月前識咗前男友，以為係「真命天子」，點知拍拖幾日已經問佢借錢，仲借完一次又一次，令佢短短幾個月就無咗近3萬！令佢不禁後悔要帶眼識人。

Photo from 《開心速遞》劇照

拍拖幾日就借錢

近日有女網友係Dcard以「遇到呃錢渣男，以後學識帶眼識人」為題發文，大呻被「渣男」前度呃錢呃感情嘅經過。佢指同前度係幾個月前認識，但一齊咗幾日已經問佢借錢，亦坦白佢之前做保險從業員不過業績唔好，想提早完約所以要賠10幾萬比公司，每個月還1萬左右，今個月差少少錢先夠還錢，於是向事主借錢。事主當時同佢已經係情侶關係，對方又話下星期會還，所以事主就借咗2000蚊比男友。

Photo from 《三十而已》劇照

到咗第2個星期，男友不但無還錢，仲話比收數公司追數，要再借錢，事主話無錢，但男友就「講到啲大耳窿會搵人打佢」，又話月頭出糧會即刻買返，於是就比佢氹到將原價近2.2萬嘅鏡頭比佢轉售，最後以$7500極低價賤賣，之後亦當然無兌現承諾。

Photo from 《現正分手中》劇照

渣男情緒勒索

到7月中男友又話收數公司要佢一次還清4.8萬，叫事主向屋企人借錢或者幫佢向財務公司借錢，事主表示男友之前已經提過用事主名義借錢，又話會幫事主還錢，不過事主堅持唔肯，之後仲比男友係街當眾鬧「如果愛佢點解連咁小嘅事都唔肯幫佢」。

Photo from 《前男友不是人》劇照

事主又補充一直有叫男友搵屋企人幫手，但男友就話同屋企人關係好差，佢地唔肯幫。到咗7月尾，男友突然聲淚俱下，話自己已經同父親坦白，爸爸亦願意瞞住佢媽媽借10萬比佢，但收數公司要求佢即刻過咗萬幾先，於是問事主再借多6000蚊，事主就「再一次相信佢同埋好擔心佢會俾人打，咁就過咗錢俾佢」。

Photo from 《換命真相》劇照

事主終發覺唔對路

到咗第2日，男友又話佢爸爸係內地工作，過錢黎香港要一個工作天，咁啱借錢個日係星期五，要等到星期一，到咗星期一又話唔知點解未有錢，星期二又話啲錢過咗去媽咪戶口，而佢阿媽趕唔切係銀行收鋪前拎錢。事主已經奇怪又話佢爸爸瞞住阿媽借錢比佢，點解筆錢又會去咗佢媽咪到，但係男友一直拖，「又半消失，電話唔通WhatsApp唔覆」，令事主都無可奈何。

Photo from 《分手再說我愛你》劇照

到近日事主終於忍唔住去男友屋企，男友唔係屋企，不過就見到男友媽咪而得知真相。原來男友同父母講要10萬做生意，不過父母無借到比佢，而渣男原來仲同每個人都借咗錢，包括佢嘅朋友同前度，而且都一樣有借無還。令事主諗起當初男友雖然坦白話有欠債，但無講過情況係咁差，男友仲會「周圍食好嘢」，表面睇完全睇唔出佢差人錢！

Photo from 《三十而已》劇照

事主終於意識到「完全係俾佢呃錢呃感情」，決定同男友分手，不過追返啲錢同鏡頭難過登天，「佢cap返拍拖洗費啲單出嚟，一蚊一蚊扣淨先還比我」，更指佢態度勁差，明明渣男係欠債嘅一方，仲會命令事主同鬧返佢轉頭，令事主覺得「而家諗返起都覺得好蠢」。後來事主亦表示前度媽咪已經幫佢還咗錢，好彩可以攞返。

Photo from 《前男友不是人》劇照

網民勸帶眼識人

唔少網民都認同渣男行為的確過分，詢問呢件事有無得報警當詐騙處理，又叫事主應該開名同開樣，比其他女仔提防下。不過亦有提慨嘆世道不公，「又係實證渣男先有女朋友」，事主亦表示初初一齊對方對自己好好，先會受騙。亦有人認為事主太容易信人，提醒佢下次唔好再被愛情蒙蔽雙眼﹐「一齊咗幾日就問你借錢已經九成九呃你㗎啦，以後唔好啦」、「當交智商稅啦，蠢到咁多大話都仲借錢畀佢，拍咗幾個月就借錢畀人」。