台北人氣景觀餐廳，俯瞰台北壯麗夜景！峇里島般度假風！

By Wing Ws on 31 Mar 2023

Digital Content Writer

去旅行總會想搵日食餐好嘅，美食加靚景相信係最佳配搭！計劃去台北旅行嘅朋友，不妨考慮吓陽明山呢間度假風餐廳「The Top屋頂上」，餐廳可以觀賞到包括台北101在內嘅夜景，再配合泳池嘅夢幻燈光show，氣氛非常浪漫！

Photo from The Top屋頂上 FB

The Top屋頂上以太陽傘、綠植、沙發為餐廳裝飾，就好似峇里島嘅南洋風格，日頭嚟就好似去咗度假咁！餐廳嘅景觀極好，每個座位都擁有絕佳視野，可以將台北連同台北101嘅美景收覽眼中，而呢間人氣餐廳最出名嘅可以話係個夜景，可以俯瞰整個城市嘅燈光，非常壯觀！

Photo from The Top屋頂上 FB

餐廳提供有私隱度嘅包廂訂位，由最高點階梯式往下，VIP及A區處於最高位置，C、D區喺中間，最下方嘅F、H、Q區位於泳池旁邊，亦係最受歡迎嘅區域，夜晚嘅泳池會有變幻嘅霓虹燈光，具有派對氛圍。不過，包廂位置嘅最低消費相對較高，比較適合同行人數較多嘅客人，除此之外，其他一般位置不設預約，大家有興趣嘅話，記得提早到場攞位。

Photo from The Top屋頂上

Photo from The Top屋頂上 FB

餐廳提供快中式菜、西式小食、燒烤與排餐，最出名嘅係小炒菜，價格約300～400台幣（約港幣78～103元）左右，另有售價1390台幣（約港幣359元）嘅二人餐。最特別嘅係，餐廳露台區仲有得燒烤，相信對住咁靚嘅夜景BBQ，會係另一番風味！另外，The Top屋頂上亦有白酒、威士忌、氣泡酒等酒類，大家都可以當係酒吧咁，chill住嘆返杯！

Photo from 小紅書

The Top屋頂上
地址：111台北市士林區凱旋路61巷4弄33號
營業時間：17:00–03:00（星期一至五），12:00-03:00（星期六、日）
電話：+886228622255

包廂訂位方式：
C區可容納10人，最低消費3,000台幣（約港幣776元）
D區可容納8人，最低消費3,000台幣（約港幣776元）
E區可容納10~12人，最低消費6,000台幣（約港幣1551元）
VIP可容納7~8人，最低消費8,000台幣（約港幣2068元）
使用時間：17:00~21:30、22:00~02:30

一般位置不接受訂位，每人最低消費350台幣（約港幣90元）

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

台北春日限定櫻花露營體驗！滿開花海下入睡／星空下營火會／原住民風味餐點！

1 Mar 2023

進入春日賞櫻季節，除咗一邊睇花一邊野餐，大家又有冇諗過滿開嘅櫻花樹下露營呢？可以喺洋溢著花香嘅郊區chill住同家人、朋友度過一整日，同時欣賞到暖陽下嘅櫻花同夜櫻，相信位於台北新竹近郊嘅「蟬說：霧繞」就可以滿足大家所想！

Photo from 蟬說：霧繞 WooRao FB

2個品種櫻花樹

位於台北新竹五峰鄉白蘭部落嘅豪華露營區「蟬說：霧繞」正值櫻花盛開季節，踏入園中就可以見到一片粉色櫻花海，營地內種咗粉色富士櫻與偏桃紅色嘅八重櫻2個品種嘅櫻花樹，今年嘅富士櫻較早開花，八重櫻遲約2星期，假如撞正兩個品種花期中間嘅時間嚟，仲可以見到兩隻粉色交疊盛送嘅美景，不過大家想知道花況嘅話，最好詢問營區，或者留意營地喺社交網站上嘅花況報告！

Photo from 蟬說：霧繞 WooRao FB

豐收地：櫻花樹集中地

「蟬說：霧繞」分為「豐收地」及「山谷小鹿」2個營區，而櫻花樹集中喺「豐收地」，櫻花樹就種喺每個帳篷旁邊，踏出帳篷就可以見到大大片櫻花海，非常夢幻！夜晚開埋吊燈，氣氛就更加浪漫～加上營地位於海拔1000公尺，山嘅四周被薄霧包圍，朝早起身仲有機會見到翻騰雲海，好似進入咗仙境咁！

Photo from 蟬說：霧繞 WooRao FB

高聳杉木包圍／小木屋

如果大家想感受被森林包圍嘅感覺，「山谷小鹿」會喺一個唔錯嘅選擇，帳篷四周有杉木環繞，望住高聳翠綠嘅樹木，相信咩煩惱都會瞬間消失！唔想住帳篷嘅朋友都可以選擇「好冬小屋」嘅小木屋，可以見到壯麗嘅山景同落日美景！

Photo from 蟬說：霧繞 WooRao FB

泰雅族風味餐點

雖然話係露營，但大家都唔使擔心會好簡陋，營地內嘅帆船形帳篷有5米大，帳篷內有插座、除濕機、電扇、電熱毯、全身鏡等設備，營地亦有足夠數量嘅公用浴室，每個帳棚外仲有露營凳同木枱，可以同家人／三五好友休閑地傾偈！餐廳會提供泰雅族風味嘅膳食，非常特別！

Photo from 蟬說：霧繞 WooRao FB

星空下營火會

官方喺公布訂購詳情嘅時候，貼出當中二日一夜嘅行程，由下午2點半起就可以享用特製櫻花祭下午茶、嘗試手作DIY，夜晚仲有星空下營火會及部落表演活動，大家更可以燒綿花糖！除此之外，營地亦會定期舉辦唔同活動，如「泰雅族獵徑尋根」探究泰雅獵人打獵文化嘅付費活動。

Photo from 蟬說：霧繞 WooRao FB

如果大家對呢場限定櫻花露營體驗有興趣嘅話，就要留意營地嘅官方消息啦！因為今年嘅「櫻花祭」早於半年前就開放預訂，大家可以喺年中嘅時候提早book定，期待明年嘅櫻花盛宴！

Photo from 蟬說：霧繞 WooRao FB

【蟬說：霧繞】
地址：新竹縣五峰鄉桃山村白蘭298之3號
電話：03-6210-120
櫻花季價錢（一晚）：7500台幣（豐收地，港幣約1900元）、5900台幣（山谷小鹿，港幣約1500元）、4100台幣（山谷小鹿，港幣約1050元）
入園時間：14:00，入住時間：16:00，退房時間：11:00