壽司郎少年悲慘近況曝光！鄰居爆母親唔敢出門，網友：大快人心！
日本一名17歲高中生因為喺壽司郎拍片舔豉油樽引發爭議，更令壽司郎官方強硬表示會追究到底。事後該高中生退學在家，近日有日本傳媒訪問佢嘅鄰居，透露少年一家悲慘現況，連佢嘅父母生活亦大受影響！
Photo from HolidaySmart
近日多間日本連鎖迴轉壽司店生意都受到影響，原因係有人喺店內不顧公共衛生拍片。其中一位17歲男高中生就喺壽司郎舔豉油樽、杯，又將口水沾落迴轉帶上嘅壽司，喺網上引起軒然大波，唔少網友直斥少年行為自私、無公德心。
Photo from Twitter
Photo from Twitter
Photo from Twitter
影片連累壽司郎生意一落千丈、股價亦大跌逾150億日圓。惡搞壽司郎嘅少年事後由監護人陪同前往壽司郎道歉，但不獲接受，壽司郎表示已報警，並會嚴正追究當事人嘅法律責任！
Photo from 壽司郎
事發至今已過去兩個月，期間少年已退學，留喺家中反省，曾有傳媒訪問少年父母，佢哋表示唔能夠透露與訴訟相關嘅事，但佢父親亦忍唔住哽咽落淚，而少年嘅媽媽亦面色憔悴，坦言係兒子做錯事，被網友批評都無辦法。
Photo from Twitter
最近再有傳媒採訪少年嘅鄰居，有人表示少年嘅媽媽本來係一位美人，但事件發生後消瘦憔悴不少，而日媒訪問其媽媽時，少年嘅媽媽亦係以素顏、樸素打扮受訪。
Photo from Twitter
另外有鄰居指出呢兩個月都無見過少年獨自出門，似乎一直都留喺屋企反省，但少年父親有時因擔心兒子而帶埋佢一齊返工。亦有人稱少年母親都要等到太陽落山，店舖就嚟關門先外出購物、買餸。
Photo from Twitter
雖然少年嘅行為被國內外網民狠批，但鄰居表示少年一家以往與鄰居相處融洽，會幫鄰居做農務，而少年亦好聽父母話，未試過同父母嗌交，又會主動幫鄰居手。唔少網民認為少年今後前途一片暗淡，又認為佢依家嘅遭遇都係自己一手造成。
Photo from LIHKG
Photo from LIHKG
Photo from LIHKG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
壽司郎食客籌號超過30分鐘，超惡要求店員補飛！店員高EQ處理獲網友激讚
10 Jan 2022
食肆好多時會列明籌號超過5個將不設「補飛」要重新輪候，但未必個個食客都會遵守。近日有網友影到黃埔壽司郎有食客疑逾時30分鐘先出現，竟要求店員安排佢補飛入座，掀網民熱議。店員超高EQ嘅回應亦獲一致大讚！
「香港突發事故報料區」網友公開食客大鬧黃埔壽司郎片段
香港好多食肆都大受歡迎，午餐、晚餐都會出現滿座情況，所以要先行攞飛輪候入座用餐。「過江龍」壽司郎登陸香港後開咗唔少分店，但間間都大排長龍，即使如此每日都仲有大量食客願意等候。
近日喺Facebook群組「香港突發事故報料區」有網友公開一段拍攝於壽司郎門口嘅影片，全片時長為7分45秒。網友稱片段係2022年1月9日下午4點半於黃埔壽司郎拍攝。
一男一女輪候籌號已逾時超過30分鐘，女子要求店員「補飛」安排入座
片中一男一女正喺壽司郎門口等候入座，女士表現十分不耐煩：「要等幾耐呀？快啲啦！」，終於有店員前來處理，女士指佢籌號已過，但要求店員為佢「補飛」安排入座。
店員則表示相關嘅籌號已經過咗超過30分鐘，按照公司規定將不獲「補飛」，建議佢哋重新攞飛輪候，女士聞言大為不滿，佢指自己係喺預約籌號：「咁樣係咪有啲唔公道？就算要候補係咪要先過walkin嗰啲呢？」佢又指壽司郎咁樣嘅處理方法並唔係第一次：「上次你哋荔枝角（分店）都試過係咁！」
店員建議畀卡片佢向客戶服務反映情況，女子大怒質疑未過30分鐘
店員一直禮貌回應：「明白明白！」，但重申呢度幫唔到佢入座，稱可以畀張卡片佢向客服方面求助。女士聲量越嚟越高：「你唔好話幫唔到！咁我唔舒服有咩辦法姐？！畀張卡片我無用㗎！依家你哋係要即刻解決問題！」
女士又指佢有用手機App睇叫號情況，質疑根本未過30分鐘：「你哋單方面話過咗30分鐘，我哋都可以話唔係㗎，唔係你哋講就係㗎嘛！」，又要求店員提供證據證明叫號過咗30分鐘。店員亦解釋電腦未能顯示叫號時間等資料，但仍帶女子睇電腦資料，由於候補籌號已叫到375號，推算女士所持嘅358號過時已逾30分鐘。
女士大聲指：「依家點先？快啲解決個問題佢！我哋係咪會快過walkin先，我哋一早攞咗飛！我哋只不過係過咗鐘咋嘛！」，店員亦再強調已過30分鐘，只可以提供卡片，女士大怒：「你咩數據都畀唔到我又叫我排walkin隊！」
女子暗示會投訴店員，網友指無理取鬧，反讚店員態度好
女士：「依家唔係食一餐飯嘅問題，呢個係唔公道嘅問題，呢個係原則問題呀嘛！」、「嘥時間啦！講埋啲廢話！你叫咩名！」之後女士就大聲讀出店員名字似暗示會投訴該名店員。
影片最後女士走出商場範圍並繼續大罵：「完全唔合理！唔係食唔食嘅問題，你數據又畀唔到我！」，片中更錄到疑似拍片人嘅聲音：「好嘢好嘢！走咗走咗！」
唔少網友直指女子無理取鬧，仲要出口傷人十分無品：「影衰晒香港人！」，而片中女店員面對咄咄逼人嘅顧客仍耐心點頭，又冷靜回應，獲讚好有禮貌：「EQ好勁！」
圖片來源：壽司郎、Facebook群組「香港突發事故報料區」、LIHKG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
