夏天消暑必去台北5大甜品店！洛神春梅刨冰/ 山園抹茶刨冰/草莓生乳三明治

By Pat on 04 Apr 2023

Digital Editor

最近幾年因為全球暖化嘅關係，夏天一年比一年熱，就算離開香港都感受到呢般「熱氣」迫人，為咗迎接呢個「熱到震」嘅夏天，小編就精挑細選咗5間台北嘅甜品店比大家去旅行之餘都可以感受到「透心涼」嘅感覺，等大家可以行到攰時搵間冰店舒服吓！

1）《昭和浪漫洗濯屋》

位在信義安和站的「昭和浪漫洗濯屋」深受年青人歡迎，除了因為超級日式復古嘅造型適合打卡影相之外，前身係1937年遺留下來嘅洗衣鋪，店家主打雪糕販售，開放嘅座位唔多，而且附近仲係大稻埕商圈，食完雪糕仲可以四圍行吓，鍾意舊式建築嘅朋友千祈唔好錯過！

地址｜103台北市大同區安西街3號
開放時間：｜11:30－18:00（週四休息）

Photo from 《昭和浪漫洗濯屋》

2）《震湶雪花冰》

「震湶雪花冰」係板橋老字號嘅雪花冰店，出名以水果結合雪花冰，夏天有芒果、西瓜、哈蜜瓜等雪花冰，而且款款水果都新鮮運到，水果會根據季節而有所不同，加上價錢親民，便宜嘅價錢就食到一大盆透心涼嘅感覺，真係諗起都開心！

地址｜新北市板橋區忠孝路126號
開放時間｜13:30-21:30 （週一休息）

Photo from 《震湶雪花冰》

3）《貨室甜品》

「貨室甜品」位於赤峰街，捷運站在中山站附近，主打各種日式創意冰品和甜點，最具特色嘅係古早味麵茶紅豆剉冰同洛神春梅刨冰，淋上士多啤梨醬同煉乳，加上一球莓果雪糕同洛神花蜜餞酸酸甜甜令人愛不措手，店舖裝修以白色簡約為主，空間不大但卻有滿滿嘅文青感，吸引唔少文青嘅支持！

地址｜台北市大同區赤峰街71巷34號
營業時間｜平日13:00–21:00／假日12:30–21:30

Photo from 《貨室甜品》

4）《金雞母》

位於東門市場嘅「金雞母」，非常熱愛創新，都會不定期推出新品，口味非常多元化嘅佢哋人氣仲旺到開咗2間分店，抹茶口味刨冰茶味濃郁，抹茶醬加上濃厚嘅抹茶雪糕，全部採用小山園抹茶粉去製造，啱晒鍾意抹茶嘅你，而且每一樣甜品都係喺客人點餐後先即叫即整，誠意十足！

【東門店】台北市中正區杭州南路一段143巷36號
營業時間 / 週一至日12:30-20:30
【永康店】台北市大安區麗水街7巷11號
營業時間 / 週一至日12:30-20:30

Photo from 《金雞母》

5）《點冰室》

點冰室係個充滿復刻日式風格嘅複合式店鋪，大受歡迎嘅「草莓生乳三明治」同各種款式生果配搭，酸酸甜甜加上香濃清爽嘅生乳酪，口感非常豐富！仲有夏季限定「椰！西瓜爽」利用西瓜紅龍果加椰奶煉乳再加西柚最後加上水果乳酪，聽到都流晒口水！夏天絕對不能錯過！

地址：103台北市大同區承德路二段53巷33號
電話：0907495158
營業時間：14:00–20:00（週三公休）

Photo from 《點冰室》

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

台北打卡able甜品店！少女心浮誇系草莓塔爆紅！每個位置都超適合影相！

Mar 31, 2023

去旅行都會想影多啲靚相，嚟緊去台北又鍾意打卡影相嘅你，就唔好錯過呢間被列為台灣「10大必訪打卡餐廳」之一嘅IGable甜品店「Meat Up覓晌」啦！因為店內每個位置到餐桌上嘅食物、甜品，都超適合影相！

Photo from Meat Up 覓晌 FB

「Meat Up覓晌」喺2016年開店2個月就迅速擴店，2017年以後就進駐中國西安、深圳，而現時，「Meat Up覓晌」喺台灣分別有西門町及桃園兩間分店。餐廳主打「手機食先」嘅打卡風潮，成間店由裝修到食物都超適合打卡，更因此被日本媒體評選為「台灣十大必訪打卡餐廳」！餐廳以紅、綠及奶白為主配色，由店門開始就好適合打卡，店內各個角落更設有唔同打卡點，喺唔同地方都可以搵到好睇嘅背景！除此之外，「Meat Up覓晌」仲係寵物友善餐廳，大家可以帶埋萌寵一同去餐廳！

Photo from Meat Up 覓晌 FB

同時，店家喺食物上都落咗一番功夫，每2.5個月就換新Menu，大家去之前可以先去官方社交媒體查看佢哋嘅新出嘅菜式。不過，相信大家對「Meat Up覓晌」印象最深刻嘅都係佢哋嘅甜品，店家主打浮誇吸睛嘅甜品造型，早前推出嘅101草莓塔就喺網絡上火速爆紅！用20粒士多啤梨及奶油砌成嘅草莓塔，食落肚必然會帶嚟滿滿嘅幸福感！近日推出嘅草莓季甜品如莓果棉花糖瀑布舒芙蕾、草莓奶酪帕菲與舒芙蕾、草莓奶昔紅心皇后等，款款都好吸引！

Photo from Meat Up 覓晌 FB

除咗甜品，餐廳都有其他熟食，如早午餐、意粉、意大利飯及其他小食，價錢約150～400台幣（約港幣39～103元），個小食拼盤仲係用秤嚟裝，非常特別！

Photo from Meat Up 覓晌 FB

台北西門店
地址：台北市武昌街二段37號6樓
營業時間：11:00-21:00

桃園藝文店
地址：桃園市桃園區同德五街67號2樓
營業時間：10:30-20:00，下午茶時段15:00-17:30（週一休息）

Text: HolidaySmart Editorial

台北浪漫度假風餐廳，俯瞰台北壯麗夜景！仲可以燒烤！

31 Mar 2023

去旅行總會想搵日食餐好嘅，美食加靚景相信係最佳配搭！計劃去台北旅行嘅朋友，不妨考慮吓陽明山呢間度假風餐廳「The Top屋頂上」，餐廳可以觀賞到包括台北101在內嘅夜景，再配合泳池嘅夢幻燈光show，氣氛非常浪漫！

Photo from The Top屋頂上 FB

The Top屋頂上以太陽傘、綠植、沙發為餐廳裝飾，就好似峇里島嘅南洋風格，日頭嚟就好似去咗度假咁！餐廳嘅景觀極好，每個座位都擁有絕佳視野，可以將台北連同台北101嘅美景收覽眼中，而呢間人氣餐廳最出名嘅可以話係個夜景，可以俯瞰整個城市嘅燈光，非常壯觀！

Photo from The Top屋頂上 FB

餐廳提供有私隱度嘅包廂訂位，由最高點階梯式往下，VIP及A區處於最高位置，C、D區喺中間，最下方嘅F、H、Q區位於泳池旁邊，亦係最受歡迎嘅區域，夜晚嘅泳池會有變幻嘅霓虹燈光，具有派對氛圍。不過，包廂位置嘅最低消費相對較高，比較適合同行人數較多嘅客人，除此之外，其他一般位置不設預約，大家有興趣嘅話，記得提早到場攞位。

Photo from The Top屋頂上

Photo from The Top屋頂上 FB

餐廳提供快中式菜、西式小食、燒烤與排餐，最出名嘅係小炒菜，價格約300～400台幣（約港幣78～103元）左右，另有售價1390台幣（約港幣359元）嘅二人餐。最特別嘅係，餐廳露台區仲有得燒烤，相信對住咁靚嘅夜景BBQ，會係另一番風味！另外，The Top屋頂上亦有白酒、威士忌、氣泡酒等酒類，大家都可以當係酒吧咁，chill住嘆返杯！

Photo from 小紅書

The Top屋頂上
地址：111台北市士林區凱旋路61巷4弄33號
營業時間：17:00–03:00（星期一至五），12:00-03:00（星期六、日）
電話：+886228622255

包廂訂位方式：
C區可容納10人，最低消費3,000台幣（約港幣776元）
D區可容納8人，最低消費3,000台幣（約港幣776元）
E區可容納10~12人，最低消費6,000台幣（約港幣1551元）
VIP可容納7~8人，最低消費8,000台幣（約港幣2068元）
使用時間：17:00~21:30、22:00~02:30