徐濠縈死亡芭比粉＋無眉臉嚇親網民！被好姊妹杜如風曝光新look！

By Wing Ws on 04 Apr 2023

Digital Content Writer

被稱為「時尚教主」嘅徐濠縈(Hilary)不時以大膽造型示人，展現率性嘅時尚態度，但品味就唔係人人接受，過往嘅造型多次引起「時裝車禍」嘅說法，近日，Hilary再轉look染咗一頭「死亡芭比粉」，不過評價則同樣兩極。

Photo from 徐濠縈 IG

新look染「死亡芭比粉」

陳奕迅(Eason)太太、現年49歲嘅徐濠縈(Hilary)婚後淡出娛樂圈，轉戰時尚圈，更開設時裝店，作為圈中潮人，Hilary不時以大膽造型示人，鍾意漂染頭髮嘅佢，曾染過嘅藍綠色、粉色、紫色等髮色。近日，Hilary再轉新look，由其社交平台上發佈嘅照片所見，Hilary染咗一頭「死亡芭比粉」，似乎唔擔心鮮粉色顯黑，Hilary仲襯埋「死亡芭比粉」嘅上衣同手袋，並以髮夾中分夾起額前兩邊瀏海，唔少網民喺照片下留言大讚Hilary靚女，仲叫佢幫Eason襯衫。

Photo from 徐濠縈微博

Photo from 徐濠縈 IG

死亡芭比粉＋無眉臉嚇親網民

Hilary當日似乎係同好友一齊出街，好姊妹杜如風事後post咗4人合照，清晰見到Hilary嘅正面樣，不過相比起自己IG post下嘅留言，今次嘅留言相對負面，可能係冇化妝，Hilary睇落相對暗沉又冇咩精神咁，再睇真啲，Hilary似乎係剃埋兩條眉，造型非常大膽！不過網民就唔係好接受到，紛紛留言：「粉紅色頭個位潮流指標，真係冇得頂」、「Mrs. Chan有點兒」。

Photo from 杜如風 IG

曾多次出現「時裝車禍」？

雖然被稱為「時尚教主」，但品味就未必個個接受，其衣著打扮亦多次引起「時裝車禍」一說，上年Hilary去北海道時，著咗一件粉白色、有星星圖案嘅羽絨，下身襯咗條拖地牛仔褲同黑色鞋，雖然IG收獲唔少讚好，但一眾微博網民就唔太接受。對粉色情有獨鍾嘅Hilary亦多次身穿大面積嘅粉色衣物示人，曾因身穿白色睡裙加粉色外套引起討論，甚至曾身穿全身「死亡芭比粉」，再搽上「死亡芭比粉」唇膏，不過成個造型就令人一言難盡。