給十九歲的我｜奪金像獎「最佳電影」惹爭議！主席爾冬陞解釋賽果
張婉婷執導嘅記錄片《給19歲的我》上映後爭議不斷，出品方英華女學校日前宣佈退選金像獎「最佳電影」，但最終電影仍獲得獎項。製作團體致辭時提到有份拍攝嘅同學仔，又呼籲香港紀錄片導演繼續拍「上咗先算」，《給19歲的我》得獎後再度引發爭議，金像獎協會主席爾冬陞亦對事件作出回應。
《給19歲的我》爭議時間表
紀錄片《給19歲的我》記錄英華女校重建，後講述6位英華女學生嘅成長故事。紀錄片經歷10年，喺2022年8月起放映，同時電影亦參加咗唔同嘅電影節，更於2023年1月15日，獲得《第29屆香港電影評論學會大獎》「最佳電影」。
不過2023年2月4日主角之一嘅阿聆（王卓聆）公開萬字文，指出拍攝團隊及校方漠視學生感受，唔尊重佢嘅意見同私隱，堅持將電影公開上映，令佢情緒受到困擾，另一位主角阿佘（佘麗薇）亦對部分拍攝手法感不滿。
李慧詩指自己對於受訪片段用於紀錄片內一事毫不知情
2023年2月5日「牛下女車神」李慧詩喺社交網站公開表示唔會睇呢套戲，力斥製作團隊未經同意，亦未曾知會佢就將受訪片段用於紀錄片內。導演張婉婷出席活動時宣佈電影將暫停公映。2023年2月6日，第三位主角江冰瀅亦喺IG發文表示製作團隊曾同佢講除咗佢所有人都已經簽咗公映同意書，所以佢亦簽下公映同意書，但事實上阿聆指自己從未簽署有關嘅同意書。
張婉婷及監製黃慧解釋有出入
之後張婉婷回應稱拍攝團隊係經單車總會嘅「名譽董事」協助訪問李慧詩，然而單車總會卻指總會不設「名譽董事」職位，之後監製黃慧發聲明指校方有為攝製團隊申請進入場館拍攝並獲得許可，又指訪問係由單車總會前名譽秘書長陳仲雨（已於2018年離世）安排，不過有關聲明就同導演張婉婷嘅講法有唔同。
英華女學校宣佈退選第41屆香港電影金像獎「最佳電影」
2023年2月9日英華女學校發聲明宣佈退選第41屆香港電影金像獎「最佳電影」，但香港電影金像獎協會表示金像奬無退出機制，因此《給19歲的我》仍然喺提名名單之內。3月《給19歲的我》獲《2022年度香港電影導演會年度大獎》「最佳電影」，《給19歲的我》於4月16日舉辦嘅《第41屆香港電影金像獎》再下一城，奪得「最佳電影」。
《給19歲的我》金像獎「最佳電影」，導演、監製感言再掀風波
當日導演張婉婷並未出席頒獎禮，但由製作團隊讀出佢所寫嘅親筆信同得獎感言。張婉婷感謝參與拍攝嘅同學：「感謝同學們面對自己、面對觀眾嘅勇氣。」監製黃慧亦抱恙缺席，佢喺得獎感言中多謝導演張婉婷，指對方喺呢段時間接受「無可理喻嘅折磨」，導演之一嘅郭偉倫則喺台上致辭時表示：「我個人想講一句，香港拍紀錄片嘅導演請你繼續努力去拍紀錄片，唔好驚，因為時代需要拍紀錄片，用鏡頭紀錄我哋發生嘅事。唔好熄機，繼續拍，唔好驚！拍咗先算，剪咗先算，上咗先算。」
金像獎協會主席爾冬陞回應爭議
事後金像獎協會主席爾冬陞提到《給19歲的我》獲得「最佳電影」引起爭議，佢表示按照規則獲得提名同票數，不論任何電影都可以入圍，協會唔會褫奪任何提名或得獎嘅資格。對於被指係「小圈子」選舉，爾冬陞稱金像獎係業內嘅獎，係工業獎，所以「小圈子」只係唔同角度嘅睇法，佢指影片入圍後會有過千位投票人投票，亦有75位專業評審選出得獎電影。
爾冬陞指得獎結果反映咗投票人嘅選擇，金像獎協會對事件並無立場：「所有結果都唔係我哋可以左右。」佢又稱由第一日已經知道呢件事唔會有任何一個方法令到所有人都認同。而《給19歲的我》出品方英華女學校喺影片得獎後亦發聲感謝評委對影片嘅肯定，又澄清絕對無意強迫拍攝或偷拍，校方係容許同學於拍攝期間退出。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
