日本旅遊｜東京Top 5高質壽司任食放題 100款壽司/每日新鮮運到/現場即叫即整

By Pat on 31 Oct 2024

Digital Editor

日本人對食物講究，無論食咩都好都細心都極致，又點會估到原來壽司都有放題食？而且日本仲有好多間專門食壽司放題嘅餐廳，而且性價比極高！又平又新鮮！去日本唔再需要挨貴嘅高級餐廳啦！以下就嚟介紹5間東京旅遊必食嘅壽司放題餐廳一齊放心咁去食啦！想了解更多其他東京自由行的資訊，速速來睇東京自由行景點+交通+住宿+美食推薦！花費預算、行程規劃超級攻略！

Photo from shutterstock

1）雛鮨

「雛鮨」係一間喺當地好出名嘅高級壽司放題連鎖店，已經有30幾年歷史，喺東京已經有六間分店，而且店家堅持每日漁獲由漁港新鮮到運，所有壽司更加由師傅現場即叫即整，有超過60種壽司食材，拖羅、油甘魚、海膽、甜蝦、三文魚籽、鯛魚等，總之講得出嘅都有！放題時間為120分鐘，重點係各種酒精飲料可以無限暢飲，價錢都唔過400蚊！女性食客定價為5,400円（約港幣315元），而男性食客定價則為5,700円（約港幣333元），由於大受當地人歡迎，記得要預約啊！

地址：104-0061 東京都中央區銀座4丁目1西銀座百貨店2F
電話：+81-3-3566-4077

Photo from 雛鮨@Facebook

2）築地玉寿司

全國擁有22間連鎖店嘅「築地玉寿司」，壽司種類超過30多款，包括海膽、吞拿魚、三文魚、鰤魚等等，而且佢哋仲係無限時壽司任食！不過大家要留意嘅係，並唔係每一間分店都有提供壽司放題，目前只有東急PLAZA澀谷店、Kotama Lumine EST店、淺草EKIMISE店、LUMINE立川店、Sushidama LUMINE橫濱店、橫濱港未來六間分店提供。而且每間分店收費亦有不同，女性定價由3,800日圓（港幣$224）起，男性則為4,900日圓（港幣$289）起。

Photo from 築地玉寿司

3）鮨アカデミー

「鮨アカデミー」由日本東京壽司學院營運，大部分師傅都係學院嘅畢業生，經歷過嚴格嘅訓練，喺銀座及新宿均設有分店，每日由豐洲新鮮採購海鮮，提供超過65種以上嘅壽司。午市與及晚市放題同樣係90分鐘。除咗壽司之外亦可以任食各款炸物、茶碗蒸、甜點等等，價錢由3,980日圓（港幣$233）起，可以話係絕對經濟又實惠！

地址：東京都中央區銀座 2-4-6 銀座 Velvia Hall 7F
電話：03-6228-6441

Photo from 鮨アカデミー

4）ぎんざまぐろや築地店

「ぎんざまぐろや」係高級壽司店，所有食材都由築地市場新鮮直送，平日係不設放題，但每逢星期六同公眾假期都會提供放題，因為星期日係休息日，可以清走食材保證新鮮。放題時間雖然係朝早11點開始，但店家朝早8點已經開放比客人填寫預約紙，不設電話預約，價格為女性4,000日圓（港幣$234），男性為4,500日圓（港幣$264），而且店入面只有20個位置，想食到高級壽司都唔係咁容易㗎！

地址：東京都中央区築地 6-8-10 1F
放題營業時間：星期六及公眾假期 11:00-17:00 （每位限時90分鐘，食材售完即止，只收現金）
休息日：星期日

Photo from ぎんざまぐろや築地店

5）絆魚壽司（きづなすし)

「絆魚壽司（きづなすし)」係由經營「鳥良」和「磯丸水產」企業旗下嘅餐廳，店內主打120分鐘內任食100款壽司，除咗壽司之外仲有味噌湯、沙拉、烤魚、其他特殊菜餚等等都包括在內，，但要留意嘅係店家分別於新宿歌舞伎町同秋葉原都有分店，而2間分店嘅價錢係唔一樣嘅，秋葉原分店只提供80種壽司，價錢相對比較平，女性為3,580日圓（港幣$210）起，男性為3,980日圓（港幣$233）起。而新宿歌舞伎町價錢為女性3,980日圓（港幣$233）起，男性4,380日圓（港幣$257）起。