芫茜控不能錯過的拉麵～大埔隱世拉麵店推出"一嗚"驚人的芫茜豬骨湯！

香港人鍾意食拉麵就唔係第一日嘅事啦，就算條隊幾長龍要等幾耐，大家都絕對唔會介意。事關拉麵呢家野，何謂係日本嘅譚仔。同朋友一齊食又得，自己毒毒地食又得。近排又興起一鼓芫茜熱，一大堆芫茜乜乜乜湧出。今次就等小編帶大家去覓食，去到大埔一間隱世地道拉麵店搵一碗期間限定嘅芫茜拉麵啦～

呢間拉麵店係大埔都開左一段時間，人氣都頗高。而且價錢貼地，好受一班學生哥同街坊歡迎。
佢地嘅裝修似足日本嘅拉麵店，以木作為主題，有一列嘅吧枱，唔知真係以為自己去左轉日本呀～

Photo from Presslogic


佢除左原本4款招牌嘅拉麵之外，仲會有一款名叫限定・鳴嘅拉麵，久唔久就會轉一次。

而呢期推出嘅係最近炒到滿城熱烘烘嘅芫茜湯底，而且仲幫換拉麵升左呢，加入帶子配番原本必有嘅日本叉燒／豬軟骨。價錢都只係70-80蚊左右一碗，相比起港島區嘅拉麵，價錢會較為平民！

Photo from Presslogic

湯底當然保持係豬骨湯底啦，而芫茜版就再佐以大量芫茜經長時間熬煮而成嘅，所以個濃度絕對唔可以睇少。嘩～一上枱個陣香濃嘅芫茜味簡直直衝鼻腔，芫茜控一定對佢愛不釋手。

個芫茜味果然好香濃，再配埋佢原本好濃厚豬骨湯嘅Texture，真係想飲哂碗湯佢。

Photo from Presslogic

帶子有兩片，唔算話好厚切，但勝在夠鮮甜！而小編揀嘅直麵，相對曲麵無咁吸湯，配番濃郁嘅豬骨湯就岩岩好，唔會咁膩。

Photo from Presslogic

豬軟骨非常軟腍入味，而且都好厚肉。

Photo from Presslogic

食完碗拉麵仲係覺得唔夠喉的話，不用怕～ 除左碗芫茜拉麵之外，呢間舖頭最近係晚市都推出左好多新嘅菜式，例如港人去到日本餐廳必叫嘅玉子燒。

Photo from Presslogic

而新款就係紫菜櫻花蝦玉子燒喇！

上面灑上滿滿嘅木魚碎、紫菜、櫻花蝦同沙律醬，真係睇見都想食！份量都幾巨型，建議要同朋友開心share呀～

Photo from Presslogic

切開玉子燒可以見到佢地將紫菜卷係蛋入面，蛋味極度香濃，再配埋啲香口嘅櫻花蝦真係好正嫁！

Photo from Presslogic

一鳴拉麵

地址：
大埔運頭街20-26號廣安大廈地下E舖 （港鐵大埔墟站 A1 出口 步行約7分鐘）

電話：
3565 5415

營業時間：
星期一至日
12:00-16:00     18:00-00:00

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載