胡杏兒大方晒素顏無懼臉上瑕疵曝光！與老公戴百萬名錶出遊好富貴

娛樂新聞

By Jennifer on 10 May 2023

Digital Editor

今晚食乜餸：小二，嚟一碟花生！

胡杏兒自從離巢後曾北上出演綜藝節目，近嚟佢留喺香港陪伴兒子。上月佢同老公去咗越南旅遊，難得二人世界，佢哋喺IG公開甜蜜合照，胡杏兒更素顏上陣。不過最引人注目嘅係佢同老公李承德手上所戴嘅名錶，價值過百萬！

Photo from 胡杏兒IG

現年43歲嘅胡杏兒2015年宣佈約滿離開TVB，之後佢就北上發展，除咗出演內地劇之外，更參加真人騷節目《演員請就位》第二季，大騷演技之餘仲一舉奪得冠軍，胡杏兒又出演人氣綜藝節目《乘風破浪3》挑戰唱歌跳舞。

Photo from 胡杏兒微博

最近胡杏兒就留喺香港專心陪伴家人，更同從加拿大返港嘅鍾嘉欣見面。胡杏兒同仔仔一齊參加親子活動，又同老公出街拍拖。原來上個月佢同老公李承德二人世界去咗越南富國島旅行。

Photo from 鍾嘉欣IG

Photo from 胡杏兒IG

杏兒丈夫喺IG公開咗旅行嘅相片，佢哋喺海邊影咗唔少合照，杏兒手上鑽戒十分搶鏡，佢同老公有好多攬肩貼面照，可能因為出海嘅原因，胡杏兒並未化妝，但喺近鏡之下佢仍大方晒素顏，雖然臉上略有痘痘印，但整體嚟講皮膚狀態都好好！

Photo from 李承德IG

其實胡杏兒平時喺個人IG都經常素顏出鏡，部分同兒子嘅合照中打扮亦十分樸素，有時戴住黑框眼鏡嘅居家look非常貼地，相信唔少媽媽日常嘅造型都同胡杏兒差唔多。

Photo from 胡杏兒IG

不過胡杏兒同老公嘅甜蜜合照卻令唔少網民「錯重點」關注佢哋手上所戴嘅手錶。胡杏兒手上嘅錶係手錶品牌Patek Philippe（百達翡麗）AQUANAUT系列嘅5968A，Patek Philippe作為手錶界頂級品牌，售價向來唔平民，5968A官網售價為$395,800港元，但網上嘅炒價高達$100萬！

Photo from 李承德IG

而老公李承德嘅手錶則係瑞士奢華腕錶品牌愛彼（Audemars Piguet）嘅皇家橡樹Royal Oak系列，愛彼（Audemars Piguet）同百達翡麗（Patek Philippe）、江詩丹頓（Vacheron Constantin）同為三大頂級鐘錶品牌，李承德手上嘅錶同樣炒價都達$100萬。胡杏兒夫婦雖然並未悉心打扮，但手錶已透露出低調嘅奢華。