全民造星5｜翻版MC太囂張激嬲網民，首位被評判收返藍燈／導師覺得老土唔想收？

By Wing Ws on 18 May 2023

Digital Content Writer

《全民造星V》昨晚（17日）播出第3集，其中一位參賽者陳彥熹(Philip)被網民稱為「翻版MC」，自認靚仔嘅作，面試嘅時候已經自信爆棚，但表演後就搞到被評判撳熄咗藍燈，連網民都唔buy，覺得佢太串。

Photo from Instagram @philippp.chan

自認靚仔？被指似MC揀《小心地滑》比賽

88號參賽者陳彥熹(Philip)係第3位出場，今年21歲嘅Philip身高169cm，係一名學生，早前參賽者造型照上傳後，唔少網民覺得似MC張天賦：「咁多中算靚仔」、「攝衫版MC」，連評判都覺得似MC。Philip表示，仲有人覺得佢似馬國明、王力宏。首輪面試時，Philip揀咗MC嘅《小心地滑》，表現冇大問題，被問到認為自己會「憑咩入圍」，Philip指希望憑歌聲、毅力入圍，又指：「可能我個樣都OK啲！」音樂總監CMgroovy問：「即係你覺得自己靚仔嘅？」Philip回應：「由細聽到大啦」，監製聽到皺晒眉。

Photo from ViuTV

首位被撳熄藍燈：要謙虛啲

昨晚表演中Philip再度演唱MC嘅《小心地滑》，雖然中間有瑕疵，但最終都獲得評判嘅3盞藍燈。評判陳詠燊問到Profile中寫嘅擅長「扮型」係咩意思，Philip就即場示範，另一位評判Edward Chan問：「咁你覺得自己本身型唔型？」Philip反問：「你覺得呢？」陳詠燊表示：「你個扮型係真係做到，因為你淨係扮囉」，又提醒：「啲（藍）燈係收得返㗎」，隨即，Edward Chan撳熄咗藍燈：「我問你問題，你又問返我問題，咁呢個就唔係一個好嘅對答」、「同埋呢一個藍燈收返就係令你明白，有啲事情唔係你所控制呢，咁就要謙虛啲。」

Photo from ViuTV

3盞燈都冇人搶

對上幾位參賽者喺評判撳2盞藍燈後，導師已經爭住搶人，但今次4位導師都似乎都猶豫緊要唔要，到評判畀完評語後都不為所動，陳蕾就直指Philip「感覺老土，但佢先21歲」、「有啲江湖味」，主持強尼問Philip覺得入邊組嘅幫助更大，Philip表示：「我會想行一個比較型格嘅路線，我覺得陳蕾會喺呢方面會幫到我多些少。」最終由陳蕾同安仔撳燈。

Photo from ViuTV

網民留言嘲諷

節目播出後，有網民走到Philip嘅社交平台上留言：「以為自己好型仲要態度咁串學下做人先做星啦」、「咁串基本上人哋唔會再畀機會你」、「有幾型啊？睇過？嘩係，俾人收返藍燈好正常」。

Photo from Instagram @philippp.chan

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

全民造星5｜花姐叫Jay Fung辭職、參賽者被趕出門！首集6大尷尬位

16 May 2023

ViuTV《全民造星V》播出第一集，花姐今次唔再擔任節目監制，但依然有份出鏡，佢更「指導」今季導師Jay Fung（馮允謙）。另外同往季一樣今屆嘅參賽者都出現遲到問題，令花姐非常嬲！今季首度加入海外參賽者，同本港參賽者好有「火花」！

1. 花姐卸任節目監制

花姐由《全民造星》第一季起就擔任監制，但今季佢唔再做監制，佢忍唔住落淚，坦言：「呢個節目對我嚟講已經無意義。」花姐指第一季佢好投入，又創造咗MIRROR、ERROR出嚟，但從第二季開始，佢身份唔同咗，做咗經理人，已經投入唔到節目。雖然花姐退出幕後工作，但佢仍會出鏡協助拍攝。

2. Jay Fung自覺變衰人，要花姐「教導」

今屆4位導師：On仔（陳健安）、陳蕾、Jay Fung（馮允謙）、韋羅莎都係比較溫和嘅人，而喺面試階段要淘汰參賽者時，Jay Fung忍唔住表示：「I don't like this!」佢指覺得自己好似衰人咁，更要時間休息，重整身心！喺break time嗰陣佢同花姐談心時提到自己對住其中一個參賽者講：「我唔想睇你」好hurt人，心理唔好受。

花姐嘗試開解佢：「你唔好覺得你hurt咗佢，你要記住你係幫緊佢！」、「直接唔係一個問題，你唔好內疚，如果唔係你過唔到呢個節目㗎！你會好辛苦㗎！」Jay Fung稱佢唔想打沉人哋嘅夢想，亦唔習慣從佢口中講呢啲嘢出嚟，花姐直接問佢：「定係（你想）辭職呀？」Jay Fung表示參加呢個節目都係佢嘅一個成長。

3. 主題曲MV排舞遲到、唔背歌詞，當玩O camp

同過往一樣，第一次召集已經有成20幾人遲到！參賽者有好多不同嘅藉口，更有人帶埋早餐上去舞室食，完全唔似有歉意！而班參賽者練舞遲到不特止，更無背歌詞，有一位參賽者Jackson直言：「我連首歌名叫咩名都唔知！」旁白都忍唔住話：「豈有此理呀！年年首主題曲都叫《前傳》㗎啦！做咩啫你！」

參賽者態度散漫，有唔少參賽者都表示入到嚟玩已經好開心，同其他人嘅關係似乎更重要，更直言《造星》好似入咗大學O camp識朋友咁！

4. 舞蹈老師發火鬧參賽者

31號參賽者Andy唔練舞仲拎部電話出嚟拍片被舞蹈老師斷正，佢聲稱自己跟唔到，老師發火直斥：「有邊個跟到？咁點解你拍片，佢哋跳舞呀？」、「你今日嚟做咩㗎！」最後更趕佢出去舞室：「你要拍喺出面拍！」場面超尷尬！Andy最後向老師道歉，指唔應該喺當時拍片，應該點都要跟住跳先。

5. 花姐直斥今屆質素差

花姐睇完主題曲表演後直言：「你哋呢啲咁嘅質素，上到節目都係畀人恥笑㗎啫！」佢指今屆嘅質素係比較差：「鬧唔落呀呢班，真係太差喇！呢班搞唔掂呀！」

6. 海外參賽者同香港參賽者火藥味濃！

今屆首度由MIRROR正副隊長Lokman、AK；ERROR正副隊長肥仔、阿Dee分別去加拿大、馬來西亞招募海外參賽者，而實力上海外參賽者似乎比香港嘅更好，佢哋更對香港參賽者嘅表現直言不諱，又指如果係自己演繹一定會畀對方好。而香港參賽者就表示：「我覺得佢哋有啲囂，好似係喺高處望我哋嘅感覺。」有人直言：「時間好快過，一兩個月好快，到時（馬來西亞參賽者）就飛返去。」